រថយន្ត២គ្រឿងបុកគ្នា ស្លាប់២នាក់និងរបួសធ្ងន់៤នាក់
ស្វាយរៀងៈ មនុស្ស២នាក់បានស្លាប់ និង ៤នាក់ បានរងរបួសធ្ងន់ នៅក្នុងករណីគ្រោះថ្នាក់ចរាចរ រថយន្ត២គ្រឿងបុកគ្នា នៅ ថ្ងៃទី៦ ខែមករា ឆ្នាំ២០១៩ វេលាម៉ោង៣និង២៥នាទីទៀបភ្លឺ នៅចន្លោះគីឡូម៉ែត្រលេខ១៥៩-១៦០ ស្ថិតក្នុងភូមិតាបឹប សង្កាត់បាវិត ក្រុងបាវិត ខេត្តស្វាយរៀង។
សមត្ថកិច្ចបានឱ្យដឹងថា មុនពេលកើតហេតុ មានរថយន្ត១គ្រឿងម៉ាកឡិចស៊ីស RX330 ពណ៌ទឹកមាស គ្មានស្លាកលេខ បើកបរដោយឈ្មោះ សៀង បូរ៉ា ភេទប្រុស អាយុ២៥ឆ្នាំ មុខរបរលក់ដូរ រស់នៅភូមិតារាងបាល់ សង្កាត់គយត្របែក ក្រុងស្វាយរៀង ខេត្តស្វាយរៀង បានបើក ក្នុងទិសដៅពីលិចទៅកើត លុះមកដល់ចំណុចកើតហេតុ បានបុកប៉ះនិងធុងសាំងគំនរដី ដែលការដ្ឋានកំពុងសាងសង់ស្ពាន រួចក៏ជ្រុលចង្កូតទៅបុកប៉ះនិងរថយន្ត១គ្រឿងទៀត ដែលធ្វើដំណើរពីកើតទៅលិច ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ3B-2272 បើកបរដោយឈ្មោះ ស៊ីណា ផានិត ភេទប្រុស អាយុ៣៧ឆ្នាំ មុខរបរបើកបររថយន្ត រស់នៅភូមិតាព្រហ្ម សង្កាត់ព្រែកឯង ក្រុងច្បារអំពៅ រាជធានីភ្នំពេញ ស្លាប់នៅកន្លែងកើតហេតុ។ អ្នករងរបួសធ្ងន់ទាំង៤នាក់់ រួមមានទី១-ឈ្មោះអ៊ំ សាវាក់ ហៅសៅ ភេទប្រុស អាយុ២៨ឆ្នាំ មុខរបរលក់ដូរ រស់នៅភូមិសង្កាត់ជាមួយគ្នា ស្លាប់នៅកន្លែងកើតហេតុ ទី២-ឈ្មោះប៉ាង បូរិន ភេទប្រុស អាយុ៣៧ឆ្នាំ រស់នៅភមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ រងរបួសធ្ងន់ និង២នាក់ទៀតមិនទាន់ស្គាល់អត្តសញ្ញាណ រងរបួសធ្ងន់ ។មូលហេតុ នៃគ្រោះថ្នាក់នេះ អ្នកបើកបររថយន្តឡិចស៊ីស RX330 ប្រើប្រាស់ល្បឿនលឿន៕
