រថយន្តក្រុមហ៊ុនដឹកស្រាបៀរអង្គរ បុកម៉ូតូមួយគ្រឿងរងរបួសធ្ងន់២នាក់
បន្ទាយមានជ័យ ៖ ក្មេងប្រុស២នាក់ បានរងរបួសធ្ងន់ ម្នាក់បាកជើងនិងដៃ ម្នាក់ទៀតបែកក្បាលក្នុងករណីគ្រោះថ្នាក់ចរាចរ រវាងរថយន្តក្រុមហ៊ុនដឹកស្រាបៀរអង្គរ បុកគ្នាជាមួយម៉ូតូមួយគ្រឿង នៅត្រង់ចំណុចខាងជើងផ្លូវអក្សរT ចំងាយ150ម៉ែត្រ ស្ថិតនៅភូមិត្រាង ឃុំភ្នំដី ស្រុកភ្នំស្រុក ខេត្ដបន្ទាយមានជ័យ កាលពីម៉ោង១៨:៣០នាទី កាលពីទី៨ ខែមករា ឆ្នាំ២០១៩ ។
សមត្ថកិច្ចមូលដ្ឋាន បានប្រាប់ឲ្យដឹងថា ៖ នៅវេលាម៉ោងកើតហេតុ ក្មេងប្រុស២នាក់ បានជិះម៉ូតូ RSX សេរី២០១៥ ពណ៌ក្រហមខ្មៅ ពាក់ស្លាកលេខ បន្ទាយមានជ័យ 1M.6583 ដែលអ្នកបើកបរម៉ូតូដោយ ឈ្មោះ ឡុញ អ៊ីស៊ិញ អាយុ១៤ឆ្នាំ នៅរស់ភូមិថ្នល់ដាច់ ឃុំភ្នំដី ស្រុកភ្នំស្រុក ខេត្ដបន្ទាយមានជ័យ និងអ្នករួមដំណើរដោយឈ្មោះ ព្រាន ចាន់សួន ប្រុសអាយុ១២ឆ្នាំ រស់នៅភូមិឃុំជាមួយ។ ពួកគេទាំង២នាក់ បានជិះម៉ូតូធ្វើដំណើរក្នុងទិសដៅពីខាងត្បូងទៅជើង លុះមកដល់ចំណុចកើតហេតុ ស្រាប់តែមានរថយន្តម៉ាក Hyandai ពណ៌ក្រហម ជារថយន្ដក្រុមហ៊ុនដឹកស្រាបៀរអង្គរ ចង្កូតស្ដាំពាក់ស្លាកលេខBMC 0017 បើកច្រាសទិសគ្នា បើកបរដោយឈ្មោះ សាន ម៉ាន់ទី ភេទប្រុស អាយុ ២២ឆ្នាំ រស់នៅភូមិរោងគុន ឃុំឫស្សីក្រោក ស្រុកមង្គលបូរី បានបុកម៉ូតូពេញទំហឹង បណ្តាលឲ្យឈ្មោះ ឡុញ អ៊ីស៊ិញ បាក់ជើងខាងឆ្វេង និងបាក់ដៃខាងឆ្វេង រីឯអ្នករួមដំណើរឈ្មោះ ព្រាន ចាន់សួន រងរបួសបែកក្បាល និងរបួសខ្នងជើងខាងឆ្វេង។
ក្រោយពីកើតហេតុ ជនរងគ្រោះទាំង២នាក់ ត្រូវបានបញ្ជូនទៅមន្ទីរពេទ្យគុន្ធបុប្ផា ខេត្ដសៀមរាប ដើម្បីធ្វើការសង្គ្រោះបន្ទាន់ ។
រថយន្តបង្ក និងម៉ូតូ ជនរងគ្រោះត្រូវបានយកទៅរក្សាទុក នៅអធិការរដ្ឋាននគរបាលស្រុក ដើម្បីរង់ចាំដោះស្រាយដោយសន្តិវិធីច្បាប់ ៕