គម្រោងសាងសង់ស្ពានឆ្លងទន្លេល្ពៅតភ្ជាប់កម្ពុជា ឡាវនឹងធ្វើឱ្យខេត្តព្រះវិហារក្លាយជាសរសៃឈាមសេដ្ឋកិច្ច បម្រើឱ្យវិស័យ ពាណិជ្ជកម្ម សេដ្ឋកិច្ច និងទេសចរណ៍

ព្រះវិហារ៖  ស្របពេលដែលនៅទូទាំងប្រទេសកម្ពុជាមានការអភិវឌ្ឍជាបន្តបន្ទាប់ សម្រាប់ខេត្តព្រះវិហារ ដែលជាខេត្តដាច់ស្រយាលមួយ ក៏កំពុងប្រឹងប្រែងប្រែមុខមាត់ជាបន្តបន្ទាប់ផងដែរ ជាមួយនឹងហេដ្ឋារចនាសម្ព័នគមនាគមន៍ខ្វាត់ខ្វែង អាគារខ្ពស់ៗ ។បន្ថែមលើនេះគម្រោងសាងសង់ស្ពានឆ្លងទន្លេ ឆ្លងប្រទេស ក៏បានសិក្សារួចហើយដែរ នោះគឺ ស្ពានតភ្ជាប់រវាងប្រទេសកម្ពុជា និងប្រទេសឡាវ ដែលនឹងក្លាយជាសរសៃឈាមសេដ្ឋកិច្ច បម្រើឱ្យវិស័យ ពាណិជ្ជកម្ម សេដ្ឋកិច្ច និងទេសចរណ៍ជាមួយការវិនិយោគរបស់ក្រុមហ៊ុនចិន ហុងកុង លើទឹកប្រាក់ប្រមាណ៤០០០លានដុល្លារ ។

    អាជ្ញាធរខេត្តព្រះវិហារបានឱ្យដឹងថា ខេត្តព្រះវិហារបាននឹងកំពុងរីកចម្រើន ទាំងមានផ្លូវថ្នល់ ការតុបតែង កែលំអរសួនច្បារនិងវិស័យផ្សេងៗក៏ប្រែមុខមាត់ថ្មីយ៉ាងឆាប់រហ័ស ។ ជាមួយគ្នានេះគម្រោងសាងសង់ស្ពានឆ្លងទន្លេល្ពៅ ដែលជាដែនខណ្ឌចែករវាងប្រទេសកម្ពុជា ជាមួយនឹងប្រទេសឡាវ ក៏ត្រូវបានសិក្សា និងរៀបចំទីតាំងសម្រាប់សាងសង់ផងដែរ ។ ជាការពិតប្រសិនបើស្ពាននេះលេចជារូបរាង្គ ស្ពាននេះនឹងធ្វើឱ្យខេត្តព្រះវិហារកាន់តែប្រមុខមាត់ថ្មីបន្ថែមទៀត តាមរយៈការផ្លាស់ប្ដូរទំនាក់ទំនងរវាងប្រទេស និងប្រទេស ការវិនិយោគ ការផ្លាស់ប្ដូរទំនិញ ទេសចរណ៍ ពិសេសប្រយោជន៍ដល់ប្រជាពលរដ្ឋជាធំតែម្ដង។

  លោកអ៊ុន ចាន់ដា អភិបាលខេត្តព្រះវិហារបានអោយដឹងថា គម្រោងសាងសង់ស្ពាននេះ អាជ្ញាធរខេត្តព្រះវិហារ និងអាជ្ញាធរខាងខេត្តចំប៉ាសាក់ ប្រទេសឡាវបានសិក្សារួចហើយ រួចទាំងទីតាំង ហើយវានឹងផ្ដល់ប្រយោជន៍ជាច្រើនដល់ប្រជាពលរដ្ឋនៅពេលមានស្ពានឆ្លងប្រទេសនេះមួយទៀត។

   ស្ពានឆ្លងទន្លេ ឆ្លងប្រទេសនេះ គឺជាគម្រោងស្ពានបេតុង ដែលស្ថិតក្នុងឃុំកំពង់ស្រឡៅ ស្រុកឆែប ខេត្តព្រះវិហារ ជាប់ព្រំប្រទល់ ខេត្តចំប៉ាសាក់ ប្រទេសឡាវ ហើយគម្រោងនេះទទួលបាននូវការគាំទ្រយ៉ាងខ្លាំងពីសំណាក់ប្រជាពលរដ្ឋខេត្តព្រះវិហារបាន ក្រោមការដឹកនាំរបស់រាជរដ្ឋាភិបាល ដែលមានសម្តេច តេជោ ហ៊ុន សែន ជាប្រមុខដឹកនាំ។

   លោក សំ លាង ទ្រី ប្រធានមន្ទីរសាធារណៈការ និងដឹកជញ្ជូន ខេត្តព្រះវិហារ បានឱ្យដឹងដែរថា ស្ពានទន្លេល្ពៅ ដែលគ្រោងសាងសង់នេះមានប្រវែងប្រមាណជាង១០០ ម៉ែត្រ ទទឹងជាង១០ម៉ែត្រ គ្រោងចំណាយប្រមាណ២លានដុល្លារអាមេរិក

ជាមួយនឹងការសាងសង់ផ្លូវកៅស៊ូប្រភេទ DBST ប្រវែងប្រមាណ៧៥គីឡូម៉ែត្រទៅគល់ស្ពាននេះផងដែរ។ ជាងនេះទៅទៀតតំបន់នេះក៏នឹងក្លាយជាសរសៃឈាមសេដ្ឋកិច្ចសំខាន់ បម្រើឱ្យវិស័យ ពាណិជ្ជកម្ម សេដ្ឋកិច្ច និងពិសេស ទេសចរណ៍ ជាមួយការវិនិយោគរបស់ក្រុមហ៊ុនចិន ហុងកុង លើទឹកប្រាក់ប្រមាណ៤០០០លានដុល្លារ ៕