AIMFនិងអាជ្ញាធររាជធានី ពិភាក្សាការងារលើការផ្ដល់ហិរញ្ញប្បទានដល់ការសិក្សាលទ្ធភាពបឋម នៃការសាងសង់ស្ថានីយប្រព្រឹត្តកម្មកាកសំណល់ភក់បង្គន់សាកល្បង
ភ្នំពេញ៖ គណៈប្រតិភូរបស់សមាគមអន្តរជាតិនៃអភិបាលក្រុងប្រើប្រាស់ភាសាបារាំង ( AIMF ) និងអាជ្ញាធររាជធានីភ្នំពេញកាលពី រសៀលថ្ងៃព្រហស្បតិ៍ ១២កើត ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៧ ខែមករា ឆ្នាំ២០១៩ បានពិភាក្សាការងារគ្នាលើការផ្ដល់ហិរញ្ញប្បទានដល់ការសិក្សាលទ្ធភាពបឋម នៃការសាងសង់ស្ថានីយប្រព្រឹត្តកម្មកាកសំណល់ភក់បង្គន់សាកល្បងនិងការគ្រប់គ្រងកាកសំណល់រាវ និងការ ពិនិត្យតាមដានការងារបន្តលើគម្រោងពីរផ្សេងទៀត ។
មន្ត្រីរដ្ឋបាលរាជធានីភ្នំពេញបានអោយដឹងថា ការជួបពិភាក្សាការងារគ្នានេះធ្វើឡើងក្នុងគោលបំណង ធានាដល់ការផ្ដល់ហិរញ្ញប្បទានបង្គ្រប់សម្រាប់គម្រោងដែលបានចុះកិច្ចព្រមព្រៀង កាលពីខែឧសភាឆ្នាំ២០១៨ ពាក់ព័ន្ធនឹងការពិនិត្យមើលលទ្ធភាពនៃការផ្ដល់ហិរញប្បទាន ដល់ការសិក្សាលទ្ធភាពបឋម និងការសាងសង់ស្ថានីយប្រព្រឹត្តកម្មកាកសំណល់ភក់បង្គន់សាកល្បង។
ក្នុងជំនួបសម្ដែងការគួរសមរវាងលោក ឃួង ស្រេង អភិបាល នៃគណៈអភិបាលរាជធានីភ្នំពេញ ជាមួយគណៈប្រតិភូរបស់សមាគមអន្តរជាតិនៃអភិបាលក្រុងប្រើប្រាស់ភាសាបារាំង ( AIMF )នោះដែរ ក៏បានពិភាក្សាលើការងារជាមួយដៃគូអភិវឌ្ឍន៍នានា ដែលកំពុងធ្វើកិច្ចការងារទាក់ទងនឹងសុខមាលភាពសាធារណៈ និងការគ្រប់គ្រងកាកសំណល់រាវ ពិនិត្យនិងតាមដានការងារបន្តលើគម្រោងពីរផ្សេងទៀត ដែលមានក្នុងកិច្ចព្រមព្រៀងចុះហត្ថលេខាកាលពីខែឧសភាឆ្នាំ២០១៨ដែលក្នុងនោះរួមមាន គម្រោងស្ដីពីការត្រៀមខ្លួនទល់នឹងហានិភ័យ( គ្រោះទឹកជំនន់ ) និងគម្រោងស្ដីពីបេតិកភណ្ឌទីក្រុងនិងលំហសាធារណៈ៕
