ចាប់៣នាក់ ដែលប្រើល្បិចបបួលម្ចាស់ផ្ទះសំណាក់ ផឹកស្រាបៀរ លាយថ្នាំសណ្តំ ហើយលួចយកទ្រព្យសម្បត្តិ
បាត់ដំបង៖ សមត្ថកិច្ចនគរបាល បានឃាត់ខ្លួនជនសង្ស័យចំនួន៣នាក់ ដែលប្រើល្បិច បបួលម្ចាស់ផ្ទះសំណាក់ ផឹកស្រាបៀរ លាយថ្នាំសណ្តំ ហើយលួចយកទ្រព្យសម្បត្តិ។
ស្នងការដ្ឋាននគរបាលខេត្តបាត់ដំបង បានឲ្យដឹងថា នៅថ្ងៃទី ២៨ខែ មករា ឆ្នាំ ២០១៩ នេះដោយអនុវត្តនូវបទបញ្ជារបស់លោកឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង និងដោយបានការសម្របសម្រួល លើនីតិវិធីពីលោក នួន សាន ព្រះរាជអាជ្ញាអមសាលាដំបូងខេត្តបាត់ដំបងផងនោះ លោកឧត្តមសេនីយ៍ត្រី ជេត វណ្ណនី ស្នងការរងទទួលផែនការងារព្រហ្មទណ្ឌ បានដឹកនាំកម្លាំងនគរបាលជំនាញ ក្នុងផែនសហការ ជាមួយសមត្ថកិច្ចនគរបាលខេត្តបន្ទាយមានជ័យធ្វើការស្រាវជ្រាវករណី (ដាក់ថ្នាំសណ្តំលួចយកទ្រព្យសម្បត្តិ) មួយកណីឃាត់ខ្លួនជនសង្ស័យចំនួន៣នាក់រួមមាន៖ 1-ឈ្មោះ ជា ចិន្តា ភេទ ស្រីម អាយុ៥៤ឆ្នាំ
2-ឈ្មោះ ឡុង ស្រីយ៉ា ភេទ ស្រីអាយុ១៦ឆ្នាំទាំងពីររស់នៅភូមិ៤ សង្កាត់ព្រះពន្លា ក្រុងសិរីសោភ័ណ្ឌ ខេត្តបន្ទាយមានជ័យ 3- ឈ្មោះ ឆេង សីហា ភេទប្រុស អាយុ២៤ឆ្នាំ ភូមិតាសិត ឃុំពេល ស្រុកត្រាំកក់ ខេត្តតាកែវ។ ដកហូតវត្ថុតាងបានទូរស័ព្ទដៃចំនួន១គ្រឿង នាឡិកាដៃចំនួន២គ្រឿង ជារបស់ជនរងគ្រោះ។
សូមជម្រាបជូនថា កាលពីថ្ងៃទី ២៧ ខែ មករា ឆ្នាំ២០១៩ ម៉ោង២១និង៣០នាទី ចំណុចក្រុមទី១៧ ភូមិពោធិ៍១ ឃុំគារ ស្រុកមោងឫស្សី ខេត្តបាត់ដំបង មានករណីដាក់ថ្នាំសណ្ដំ លួចយកទ្រព្យសម្បត្តិ បង្កដោយជនសង្ស័យជាស្រ្តីចំនួន២នាក់ បានធ្វើសកម្មភាព បបួលជនរងគ្រោះ ឈ្មោះសោរ យឹម ភេទប្រុស អាយុ៦៣ឆ្នាំ (ម្ចាស់ផ្ទះសំណាក់ យីហោសោរយឹម) ផឹកស្រាបៀរ ABC ជជែកគ្នាលេង ហើយក្នុងពេលឈ្មោះសោរ យឹម បាត់ការប្រុងប្រយ័ត្ន ជនស័ង្សយខាងលើបានយកថ្នាំងងុយដេក លាយជាមួយស្រាបៀរ របស់ជនរងគ្រោះ ហើយបន្តផឹកជជែកគ្នា លែងបន្តទៀត ប៉ុន្តែដោយសារឥទ្ធិពលស្រាបៀរ លាយជាមួយថ្នាំងងុយដេក ម្ចាស់ផ្ទះសំណាក់ បានដេកដួលសន្លប់បាត់ស្មារតី ហើយខណៈនោះជនស័ង្សយ បានលួចប្រមូលយកទ្រព្យសម្បត្តិមួយចំនួន រួមមាន ប្រាក់ខ្មែរចំនួន៦០ម៉ឺនរៀល ខ្សែកផ្លាកទីនចំនួន១ខ្សែទម្ងន់២តម្លឹង បន្តោងមាស់ទម្ងន់៥ជី ទូរស័ព្ទដៃម៉ាកអាយហ្វូនX ចំនួន១គ្រឿង នាឡិកាដៃចំនួន២គ្រឿង) រួចគេចខ្លួនបាត់ ។
នៅចំពោះមុខករណីខាងលើនេះ លោកឧត្តមសេនីយ៍ត្រី ជេត វណ្ណនី បានមានប្រសាសន៍ ផ្តាំផ្ញើដល់ប្រជាពលរដ្ឋ ក្នុងមជ្ឈដ្ឋានទូទៅ សូមមេត្តាយកចិត្តទុកដាក់ ប្រុងប្រយ័ត្ន ចំពោះករណីខាងលើ ព្រោះពួកជនល្មើសដែលមានជំនាញមួយនេះ តែងតែឆ្មក់ធ្វើសកម្មភាព នៅក្នុងពេលណាមួយ ដែលជនរងគ្រោះ បាត់ការប្រុងប្រយ័ត្ន ។
បច្ចុប្បន្នជនសង្ស័យ និងវត្ថុតាង នគរបាលកំពុងកសាងសំណុំរឿង បញ្ជូនទៅសាលាដំបូងខេត្តបាត់ដំបងចាត់ការតាមផ្លូវច្បាប់៕
