ករណីផ្ទុះអាវុធ បន្ទាប់ពីជម្លោះពាក្យសម្ដីគ្នារវាងអ្នកជិតខាង និងអ្នកជិតខាង រហូតឈានដល់ការដកអាវុធភ្ជង់គ្នាទៅវិញទៅមក
(ភ្នំពេញ)៖ មានករណីផ្ទុះអាវុធមួយ បានកើតមានឡើង បន្ទាប់ពីជម្លោះពាក្យសម្ដីគ្នារវាងអ្នកជិតខាង និងអ្នកជិតខាង រហូតឈានដល់ការដកអាវុធភ្ជង់គ្នាទៅវិញទៅមក រហូតដល់ថ្នាក់ផ្ទុះអាវុធចំនួន៣គ្រាប់ផ្ទួនៗ ហេីយបានបង្កឲ្យមានការភ្ញាក់ផ្អើលយ៉ាងខ្លាំងដល់បងប្អូនប្រជាពលរដ្ឋ។
ហេតុការណ៍នេះបានកើតមានឡើងនៅវេលាម៉ោង ៤និង៤០នាទីល្ងាច ថ្ងៃទី០៤ ខែកុម្ភៈ ឆ្នាំ២០១៩ ដែលស្ថិតនៅចំណុចមុខគ្លីនិក មួយកន្លែង យីហោ កង សំអូន ផ្លូវ១៣៩ សង្កាត់អូរឫស្សីទី៣ ខណ្ឌ៧មករា រាជធានីភ្នំពេញ។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃេីញ បុរស ២នាក់ បានឈ្លោះទាស់សំដីគ្នា បិទបាំងផ្លូវមិនឲ្យដើរ ស្រាប់តែពេលនោះ ក៏បានឈ្លោះប្រកែតគ្នារហូតឈានដល់ការយកអាវុធមកភ្ជង់គ្នាទៅវិញទៅមក ដោយមិនទាន់ដឹងមូលហេតុច្បាស់លាស់នៅឡេីយទេ។ ប៉ុន្តែក្រោយមកក៏ឮសំឡេងផ្ទុះឡេីងចំនួន ៣គ្រាប់ផ្ទួនៗគ្នា បង្កឲ្យមានការភ្ញាក់ផ្អើលដល់បងប្អូនប្រជាពលរដ្ឋ ដោយមានការភិតភ័យយ៉ាងខ្លាំង។ ភ្លាមៗនោះ គេក៏ឃេីញមានកម្លាំងសមត្ថកិច្ចមូលដ្ឋានប៉ុស្តិ៍ និងកម្លាំងកងរាជអាវុធហត្ថខណ្ឌ៧មករា ចុះមកអន្តរាគមន៍ភ្លាមៗផងដែរ។
ក្រោយពីមានការផ្ទុះអាវុធ លោកមេបញ្ជាការរងកងរាជអាវុធហត្ថខណ្ឌ៧មករា បញ្ជាឲ្យឃាត់ខ្លួនបុរសម្នាក់បញ្ជូនទៅធ្វើការសាកសួរនៅមូលដ្ឋានកងរាជអាវុធហត្ថខណ្ឌ៧មករា។ ចំណែកឯភាគីម្ខាងទៀតបានរត់គេចខ្លួនបាត់ស្រមោលតែម្តង។
ពាក់ព័ន្ធនឹងករណីផ្ទុះអាវុធខាងលេីនេះ លោកមេបញ្ជាការរងកងរាជអាវុធហត្ថខណ្ឌ៧មករា មិនទាន់អាចធ្វេីការបញ្ជាក់បាននៅឡេីយទេ ដោយពេលនេះ លោកកំពុងស្រាវជ្រាវរកមូលហេតុ៕
