រថយន្តបែនដឹក បុកជាមួយរថភ្លើង នៅខេត្តព្រះសីហនុ
ព្រះសីហនុ៖ រថភ្លើងមានល្បឿនយឺតបែបនេះហើយនៅតែមានគ្រោះថ្នាក់ចរាចរ ចុះទម្រាំរថភ្លើងមានល្បឿនលឿនទៀតនោះតើនឹងមានគ្រោះថ្នាក់ច្រើនយ៉ាងណាទៅ។ ជាក់ស្តែង រថយន្តបែនដឹកបុកជាមួយរថភ្លើង បណ្តាលឱ្យរថភ្លើងធ្លាក់ចេញពីផ្លូវដែក ឯរថយន្តធ្លាក់ចុះទៅដល់ស្រែ ហើយសំណាងមិនបង្កឲ្យមានមនុស្សរបួស កាលពីថ្ងៃទី១១ ខែកុម្ភៈ ឆ្នាំ២០១៩ វេលាម៉ោង១០នឹង១៥នាទី លើផ្លូវដែក ត្រង់ចំណុចភូមិព្រែកទល់ ឃុំទឹកថ្លា ស្រុកព្រៃនប់ ខេត្តព្រះសីហនុ។
លោកឧត្តមសេនីយ៍ អ៊ី សុខា ស្នងការរងនគរបាលខេត្តព្រះសីហនុ បានឲ្យដឹងថា ករណីគ្រោះថ្នាក់ចរាចរ បង្កដោយ រថយន្តបែនដឹកដី ១គ្រឿងម៉ាក HYUNDAI ពណ៌ ទឹកប្រាក់ គ្មានស្លាកលេខ អ្នកបើកបរមិនស្គាល់អត្តសញ្ញាណ មានទិសដៅពីលិចឆ្ពោះទៅ កើតលុះដល់ចំណុចខាងលើបានបុករថភ្លើង ដែលមានទិសដៅពីខេត្តព្រះសីហនុ ឆ្ពោះទៅភ្នំពេញ បណ្ដាលឲ្យធ្លាក់ក្បាលរថភ្លើងចេញពីលើផ្លូវដែក។
ចំណែកអ្នកបើកបររថយន្ត រត់គេចខ្លួនបាត់។ រីឯវត្ថុតាង រថយន្ត ១គ្រឿងបានយកមករក្សាទុក នៅអធិការដ្ឋាននគរបាលស្រុកព្រៃនប់ ៕