ឡង់គ្រីស័រស៊េរីទំនើបបើកទៅបុកគូទរថយន្តកូរ៉េ កំពុងចតនៅចិញ្ចើមផ្លូវបណ្ដាលឲ្យរងការខូចខាតយ៉ាងដំណំ
ភ្នំពេញ ៖ បុរសម្នាក់បេីករថយន្តឡង់គ្រីស័រ ស៊េរីទំនើបមួយគ្រឿងមិនប្រយ័ត្ន ទៅបុកគូទរថយន្តកូរ៉េកំពុងចតនៅចិញ្ចើមផ្លូវបណ្ដាលឲ្យរងការខូចខាតផ្នែកមុខយ៉ាងដំណំ តែសំណាងល្អ មិនមាននរណាម្នាក់រងរបួសឡេីយ កាលពីវេលាម៉ោងជាង១១យប់ថ្ងៃទី១៦ ខែកុម្ភៈ ឆ្នាំ២០១៩ស្ថិតនៅតាមបណ្តោយផ្លូវព្រះនរោត្តម ជិតនិងវត្តថាន់ ក្នុងសង្កាត់ទន្លេរបាសាក់ ខណ្ឌចំការមន ក្រុងភ្នំពេញ។
បេីតាមប្រភពព័ត៌មានពីកន្លែងកេីតហេតុបានប្រាប់ដឹងថានៅមុនពេល កើតហេតុគេឃើញបុរសម្នាក់បើករថយន្តមួយគ្រឿងម៉ាកLand cruiser ពណ៌សពាក់ស្លាកលេខភ្នំពេញ2AD-2992ដោយធ្វើដំណើរតាមទិសដៅពីត្បូងទៅជើង លុះមកដល់ចំណុចកើតហេតុស្រាប់តែរថយន្តខាងលើបានរេចង្កូតមកខាងស្តាំក៏ជ្រុលទៅបុកគូទរថយន្តកូរ៉េមួយគ្រឿង ពណ៌ក្រហមលាយសពាក់ស្លាកលេខភ្នំពេញ3E-9535ដែលកំពុងចតតាមចិញ្ចើមផ្លូវរង ចាំដឹករថយន្តមួយគ្រឿងទៀត បណ្តាលអោយ រថយន្តឡង់គ្រីស័រ ផុងជាប់និងកន្ទុយរថយន្តកូរ៉េខាងក្រោយ រងការខូចខាតយ៉ាងដំណំ ។
ក្រោយកើតហេតុសមត្ថកិច្ចមូលដ្ឋានបានធ្វើការវាស់វែង ហើយយករថយន្តទាំងពីរ ទៅរក្សាទុកនៅ ការិយាល័យចរាចរណ៍ផ្លូវគោករាជធានីភ្នំពេញដេីម្បីរងចាំដោះស្រាយគ្នាទៅ តាមផ្លូវច្បាប់នៅពេលក្រោយ៕
