ឧកញ៉ា ម៉ុង ឫទ្ធី អំពាវនាវដល់អ្នកចិញ្ចឹមជ្រូក សូមចូលរួមបង្ការហានិភ័យជំងឺជ្រូក ខណៈផ្ទុះជំងឺនៅវៀតណាម
ភ្នំពេញ៖ នាយកដ្ឋានសុខភាពសត្វរបស់វៀតណាម បានឃើញថាមានតំបន់ ASF ចំនួន 8 ក្នុងខេត្ត Hung Yen និងខេត្ត Thai Binh បានបណ្តាលឲ្យជ្រូកងាប់ ហើយម្ចាស់កសិដ្ឋានបានយកជ្រូកទាំងនោះ ទៅកប់ចោល។
បើតាមផេកហ្វេសប៊ុក ឯកឧត្ដមបណ្ឌិត ម៉ុង ឫទ្ធី H.E Oknha Mong Reththy នៅថ្ងៃទី២០ខែកុម្ភៈ ថា នារសៀលថ្ងៃទី១៩ ខែកុម្ភៈឆ្នាំ ២០១៩ នាយកដ្ឋានសុខភាពសត្វ (ក្រសួងកសិកម្មនិងអភិវឌ្ឍន៍ជនបទវៀតណាម) បានប្រារព្ធធ្វើសន្និសីទសារព័ត៌មាន ជាផ្លូវការ នៅវៀតណាម និងបានរកឃើញថា មានតំបន់ ASF ចំនួន 8 ក្នុងខេត្ត Hung Yen និងខេត្ត Thai Binh ។
លោកឧកញ៉ា បានថ្លែងថា ដើម្បីឆ្លើយតប និងបង្ការទប់ស្កាត់ករណីនេះ ខ្ញុំបានអំពាវនាវដល់ តាមបណ្ដាកសិដ្ឋានក្រោម ឱវាទទាំងខ្នាតតូច មធ្យម និងខ្នាតធំឲ្យកោះប្រជុំជាបន្ទាន់ ដើម្បីដាក់បទបញ្ជាឲ្យបង្កើនការប្រុងប្រយ័ត្ន លើជីវសុវត្ថិភាពឲ្យបានខ្ពស់បំផុត ។
ទន្ទឹមគ្នានេះផងដែរ ខ្ញុំសូមអំពាវនាវដល់ប្រជាកសិករ ដែលប្រកបមុខរបរចិញ្ចឹមជ្រូក ទាំងអស់គ្នា សូមចូលរួមបង្ការហានិភ័យនេះ ដោយបង្កើន ការប្រុងប្រយ័ត្នលើជីវសុវត្ថិភាពឲ្យបានខ្ពស់បំផុត បើមានករណីនេះកើតឡើងនៅតំបន់ណា សូមកុំលាក់ព័ត៌មាន និងត្រូវតែយកសត្វនោះ ទៅកប់ចោល និងកុំយកទៅលក់នៅលើទីផ្សារ ឲ្យសោះនាំឲ្យមានបញ្ហដល់សុខភាពមនុស្ស៕
