យុវជនម្នាក់ហេតុតែស្រឡាញ់ម៉ូតូធំស្ទើរឆ្កួត លែងគិតពីផ្លូវច្បាប់ ហ៊ានទៅលួចម៉ូតូអ្នកដទៃ ទីបំផុតត្រូវបានប្រជាពលរដ្ឋរួមជាមួយកម្លាំងសមត្ថកិច្ចចាប់បាន បញ្ជូនទៅតុលាការ
ខេត្តកំពង់ស្ពឺ៖ ករណីចោរកម្ម(លួចម៉ូតូ)កាលពីថ្ងៃទី២១កុម្ភៈ២០១៩ វេលាម៉ោង១៦:០០នាទី នៅចំណុចភូមិអង្គទន្លាប់ ឃុំសំរោងទង ស្រុកសំរោងទង ខេត្តកំពងើស្ពឺ បង្កឡើងដោយជនសង្ស័យម្នាក់ឈ្មោះស៊ុន វិចិត្រ ភេទប្រុស អាយុ ២៥ឆ្នាំ រស់នៅភូមិរបងច្រុះ ឃុំសំរោងទង ស្រុកសំរោងទង បានធ្វើសកម្មភាពលួចយកម៉ូតូ ១ គ្រឿង ម៉ាក ស៊ី.អ.អេហ្វ(CRF) ពណ៌ស គ្មានស្លាកលេខ ជារបស់ឈ្មោះម៉ិច វណ្ណរ៉ា ភេទប្រុស អាយុ២៥ឆ្នាំ មានទីលំនៅសង្កាត់ទួលទំពូង២ ខណ្ឌចំការមន រាជធានីភ្នំពេញ ពេលជនរងគ្រោះកំពុងវាស់ដីឡូត៍ ហើយពុំបានដកសោរម៉ូតូចេញ។
តាមចម្លើយជនសង្ស័យថាមកពីខ្លួនប៉ងស្រឡាញ់ម៉ូតូធំយូហើយ ពេលឃើញម៉ូតូទុកចោលដោយមានសោផង ក៏ឆ្លៀតឱកាសលួចឡើងជិះរត់តែម្ដង នៅពេលជនសង្ស័យ ជិះម៉ូតូចេញបានប្រហែល៥០ម៉ែត្រ ទើបម្ចាស់បានដឹងហើយស្រែកថាចោរៗលួចម៉ូតូហើយ ក៏នាំគ្នាជិះម៉ូតូដេញតាមពីក្រោយ ចាប់បានជនសង្ស័យ រួមជាមួយភស្ដុតាងម៉ូតូដកហូតមកវិញ រួចប្រគល់ជូន សមត្ថកិច្ចស្រុកសំរោងទង ចាត់ការតាមច្បាប់។
លោកវរសេនីយ៍ឯក ឃុត សុផល អធិការស្រុកសំរោងទង បញ្ជាក់ឲ្យដឹងថា ជនសង្ស័យមុនពេលធ្វើសកម្មភាពលួចម៉ូតូគឺបានជិះម៉ូតូរបស់ខ្លួន C125 ពណ៌ខ្មៅ យកមកទុកចោលក្បែរម៉ូតូជនរងគ្រោះ ហើយឆ្លៀតឱកាសម្ចាស់ម៉ូតូ មិនដកសោចេញពីម៉ូតូ ពេលវេលាអំណោយផលជនសង្ស័យ ក៏លួចឡើងបញ្ឆេះម៉ូតូជិះរត់តែម្ដង។
ជនសង្ស័យត្រូវបានជំនាញ ការិយាល័យនគរបាល ព្រហ្មទណ្ឌកំរិតស្រាល កសាងសំណុំរឿង បញ្ជូនទៅស្ថាប័នអយ្យការ អមសាលាដំបូងខេត្តកំពង់ស្ពឺ ចាត់ការតាមនីតិវិធីច្បាប់ រីឯម៉ូតូត្រូវបាននគរបាលធ្វើការប្រគល់ជូនម្ចាស់វិញ៕
