ស្លាប់៣នាក់ទាំងព្រឹក ដោយសាររថយន្តដឹកដែក បុកជាមួយរថយន្តកាមេរី នៅ ផ្លូវជាតិលេខ៤
ភ្នំពេញ: ករណីគ្រោះថ្នាក់ចរាចរ នាព្រឹកថ្ងៃទី៦មីនានេះ នៅម្តុំលក់សាច់ក្រក បណ្តោយផ្លូវជាតិលេខ៤ ខណ្ឌពោធិសែនជ័យ រវាងរថយន្តកាមរី និងរថយន្តដឹកដែក។ ហេតុការណ៍រន្ធត់នេះ បណ្តាលអោយមនុស្ស៣នាក់ស្លាប់ និងរបួស ២នាក់ ដោយដែកសង្កត់ក្នុងប្រឡាយទឹក។
ជនរងគ្រោះ ដែលស្លាប់ទាំងបីនាក់ មិនទាន់ស្គាល់អត្តសញ្ញាណនៅឡើយទេ ក្នុងនោះភាគីរថយន្តកាមរី បានស្លាប់ពីរនាក់ និងភាគីរថយន្តសណ្ដោងកន្ទុយរ៉ឺម៉កស្លាប់ម្នាក់ ដោយសារពេលឡានរេចង្កូតធ្លាក់ផ្លូវ ហើយធ្លាក់ដែកសង្កត់លើទាំងអស់គ្នា តែក្នុងនោះស្ត្រីម្នាក់ ភាគីខាងរថយន្តកាមរីឆ្លាមបានរងរបួសធ្ងន់។
ប្រជាពលរដ្ឋដែលឃើញហេតុការណ៍ បានឲ្យដឹងថា មុនពេលកើតហេតុគេឃើញ រថយន្តកាមរីឆ្លាម ពណ៌ទឹកប្រាក់ ពាក់ស្លាកលេខភ្នំពេញ 2H-2239 បើកបរតាមបណ្ដោយផ្លូវជាតិលេខ៤ ក្នុងទិសដៅពីកើតទៅលិចយ៉ាងលឿន លុះមកដល់ចំណុចកើតហេតុរថយន្តនេះ បានវ៉ាជែងរថយន្តដឹកដែកខ្នាតវែងពណ៌ខៀវចាស់ ពាក់ស្លាកលេខ ភ្នំពេញ 3D-9712 ដែលកំពុងបើកបរស្របទិសគ្នា។
ប្រភពបន្ដថា ពេលកំពុងបើកវ៉ាជែងនោះ ស្រាប់តែមានរថយន្តមួយគ្រឿងទៀត បើកមកពីខាងមុខបញ្ច្រាសទិសគ្នាជាមួយរថយន្តកាមរីឆ្លាម ពេលឃើញស្ថានភាពបែបនេះ រថយន្តកាមរីឆ្លាមបានបើកងាកគេចចូលខាងស្ដាំដៃវិញ ទើបបណ្ដាលឲ្យរថយន្តដឹកដែកបុកពីក្រោយរថយន្តកាមរីតែម្ដង ពេលនោះរថយន្តទាំងពីរគ្រឿងបានរេចង្កូតទៅធ្លាក់ចូលប្រឡាយទឹកស្អុយតាមចិញ្ចើមផ្លូវទាំងអស់គ្នាតែម្ដង។
ប្រភពបន្ដថា មុនពេលធ្លាក់ចូលប្រឡាយទឹករថយន្តដឹកដែក ក៏ជ្រុលទៅបុកនឹងដើមអំពិលទឹកបាក់អស់មួយដើមទៀត ហើយទើបធ្លាក់ដែកសង្កត់លើតៃកុងរថយន្តស្លាប់ដោយកៀបជាប់នៅក្នុងរថយន្ត ហើយជនរងគ្រោះដែលជិះនៅក្នុងរថយន្តកាមរីឆ្លាម បានខ្ទាតចេញមនុស្សមកខាងក្រៅ តែក៏ត្រូវបានស្លាប់ដោយសារតែដែកសង្កត់លើទាំងពីរនាក់ភ្លាមៗផងដែរ។ ដោយឡែក ស្ដ្រីរងរបួសនោះស្ថិតនៅក្នុងរថយន្តមិនបានខ្ទាតចេញមកក្រៅនោះទេ។
ក្រោយពេលកើតហេតុ សមត្ថកិច្ចជំនាញចរាចរណ៍ និងសមត្ថកិច្ចមូលដ្ឋាន បាននាំគ្នាចុះទៅពិនិត្យវាស់វែងយករថយន្តមករក្សាទុកនៅប៉ុស្តិ៍កន្ទោកជាបណ្ដោះអាសន្នសិន ហើយបានប្រគល់សពជនរងគ្រោះទាំងបីឲ្យក្រុមគ្រួសារយកទៅធ្វើបុណ្យតាមប្រពៃណីរៀងៗខ្លួន ដោយរង់ចាំសាច់ញាតិក្រុមគ្រួសារចូលខ្លួនមកដោះស្រាយគ្នានៅពេលក្រោយ៕
