បញ្ជាឲ្យចាប់ខ្លួន បុគ្គល ហេង សំរេច ត្រូវជាប្អូនថ្លៃស្នងការនគរបាលខេត្តកំពង់ស្ពឺ ជាអ្នកនៅពីក្រោយខ្នង ល្បែងកន្ទុយលេខ នៅមូលដ្ឋានខេត្តកំពង់ស្ពឺ
កំពង់ស្ពឺ៖ បន្ទាប់ពីថ្មីៗនេះ មានព័ត៌មានមួយចំនួនដែលបង្ហោះតាមបណ្តាញសង្គមហ្វេសប៊ុក ដោយចោទមកលើបុគ្គលម្នាក់ ឈ្មោះ ហេង សំរេច ថាជាអ្នកនៅពីក្រោយខ្នង ល្បែងកន្ទុយលេខ នៅមូលដ្ឋានខេត្តកំពង់ស្ពឺ ត្រូវជាប្អូនថ្លៃស្នងការនគរបាលខេត្ត ។ ស្នងការដ្ឋាននគរបាលខេត្ត សូមបញ្ជាក់ថា បុគ្គលឈ្មោះ ហេង សំរេច ត្រូវជាប្អូនថ្លៃរបស់លោកស្នងការនគរបាល ពិតប្រាកដមែន ប៉ុន្តែជាគោលការណ៍ក្នុងកិច្ចប្រជុំគ្រប់ពេល លោកស្នងការនគរបាលតែងតែដាក់បទបញ្ជាដល់គ្រប់ការិយាល័យជំនាញ ឲ្យធ្វើការបង្រ្កាបល្បែងស៊ីសងខុសច្បាប់ មិនថាតែល្បែងកន្ទុយលេខ។
ជាមួយករណីនេះ កាលពីថ្ងៃទី១១ខែមីនា ឆ្នាំ២០១៩ ផេកហ្វេសប៊ុករបស់ស្នងការដ្ឋាននគរបាលខេត្តកំពង់ស្ពឺ PL បានបញ្ជាក់ជូនសាធារណជនថា “ស្នងការដ្ឋាន នគរបាលខេត្តកំពង់ស្ពឺ សូមធ្វើការប្រកាស យ៉ាងដាច់អហង្ការ ចំពោះបុគ្គលណាដែលបានយកតួនាទី និងកំពុងប្រព្រឹត្ដខ្លួនជាប់ពាក់ព័ន្ធទៅនឹងបទល្មើស ឬស្ថិតនៅពីក្រោយខ្នងនៃបទល្មើស សូមធ្វើការដកខ្លួនជាបន្ទាន់និងបញ្ឈប់សកម្មភាពទាំងឡាយណា ដែលផ្ទុយនឹងច្បាប់រដ្ឋ មិនត្រូវយកឈ្មោះថ្នាក់ដឹកនាំស្នងការ ទៅប្រើប្រាស់ជាដាច់ខាត ក្នុងនាមស្នងការដ្ឋាននគរបាលខេត្ត សូមធ្វើការអំពាវនាវលើកទឹកចិត្តដល់គ្រប់ស្ថាប័នមានសមត្ថកិច្ចអ្នកអនុវត្ដច្បាប់ទាំងអស់ មេត្តាជួយសហការនិងបង្រ្កាប ករណីមានជនឬបុគ្គលណា ដែលអះអាងថា ជាបងប្អូនសែស្រឡាយថ្នាក់ដឹកនាំ នៅស្នងការដ្ឋាននគរបាលខេត្ដ ត្រូវតែអនុវត្តច្បាប់មុនគេ និងត្រូវបញ្ជូនខ្លួនជននោះ ទៅតុលាការដើម្បីធ្វើការផ្ដន្ទាទោសតាមច្បាប់ជាធរមាន”៕
