អគ្គនាយកស៊ីម៉ាក់ បបានអំពាវនាវដល់ជាងដំដែកធ្វេីកាំបិតពូថៅ សូមបញ្ឈប់ការប្រេីប្រាស់គ្រាប់ជាទ្រនាប់ដំ
ភ្នំពែញ: បន្ទាប់ពីករណីគ្រោះថ្នាក់ផ្ទុះគ្រាប់ផ្លោង១០៥មីលីម៉ែត្រ ដោយសារជាងដំដែក យកគ្រាប់១០៥មីលីម៉ែត្រនេះធ្វេីជាទ្រនាបដំដែក លោកអគ្គនាយកស៊ីម៉ាក់ បានអំពាវនាវបងប្អូនប្រជាពលរដ្ឋ ជាពិសេសជាងដំដែកធ្វេីកាំបិតពូថៅ សូមបញ្ឈប់ការប្រេីប្រាស់គ្រាប់ជាទ្រនាប់ដំជាដាច់ខាត។
លោកហេង រតនា អគ្គនាយកស៊ីម៉ាក់ បានថ្លែងតាមរយ:ផេកហ្វេសប៊ុកថា
នៅព្រឹកថ្ងៃទី១៦ ខែមីនា ឆ្នាំ២០១៩ មានករណីគ្រោះថ្នាក់ផ្ទុះគ្រាប់ផ្លោង១០៥មីលីម៉ែត្រ ដោយសារជាងដំដែកយកគ្រាប់១០៥មីលីម៉ែត្រនេះធ្វេីជាទ្រនាបដំដែក គ្រោះថ្នាក់នេះបណ្តាលឱយស្លាប់ជាងដំដែកឈ្មោះភាព ផល អាយុ៥៩ឆ្នាំ និងចៅរបស់គាត់អាយុ៤ឆ្នាំរងរបួសស្រាល ស្ថិតនៅភូមិ៦៧ ឃុំថ្មពេជ្រ ស្រុកត្បូងឃ្មុំ ខេត្តត្បូងឃ្មុំ។ សូមចូលរួមមរណទុក្ខដ៍ក្រៀមក្រំជាមួយគ្រួសារសព។
លោកបានបន្តថា តាមរូបភាពគ្រោះថ្នាក់និងលក្ខណ:បច្ចេកទេសអាចវាយតំលៃបឋមថា គ្រាប់១០៥មីលីម៉ែត្រអាចយកក្បាលផ្ទុះចេញហេីយ និងអាចមានសល់រំសេវនៅក្នុងសំបកគ្រាប់នោះ។ នៅពេលការប្រេីប្រាស់កាន់តែយូរ ទ្រនាបដុំឈេីនៅទ្រពីក្រោមគ្រាប់នេះអាចបិទរន្ធគ្រាប់នោះ ហេីយនាំឱយសម្ពាធខាងក្នុងគ្រាប់ងាយនឹងបង្កផ្ទុះនៅពេលមានកំដៅខ្ពស់ឬប៉ះទង្គិចខ្លាំង!
សូមអំពាវនាវបងប្អូនប្រជាពលរដ្ឋ ជាពិសេសជាងដំដែកធ្វេីកាំបិតពូថៅ សូមបញ្ឈប់ការប្រេីប្រាស់គ្រាប់ជាទ្រនាបដុំជាដាច់ខាត។ (រូបភាពទ្រនាបគ្រាប់១០៥មម ដែលទេីបដកហូតនៅខេត្តកំពង់ឆ្នាំង)៕