អនុវត្តតាមបទបញ្ជារបស់រាជរដ្ឋាភិបាល អាជ្ញាធរពាក់ព័ន្ធរួមគ្នា ដោះស្រាយផលប៉ះពាល់លើគម្រោងខ្សែបញ្ជូនចរន្តអគ្គិសនីក្នុងរាជធានី
ភ្នំពេញ៖ អនុវត្តតាមបញ្ជារបស់រាជរដ្ឋាភិបាល ស្តីពី វិធានការដោះស្រាយបន្ទាន់ ចំពោះផលប៉ះពាល់ពីគម្រោងសាងសង់ខ្សែបញ្ជូនចរន្តអគ្គិសនីក្នុងរាជធានីភ្នំពេញ រដ្ឋបាលរាជធានីភ្នំពេញកាលពីរសៀលថ្ងៃទី១១ ខែមេសា នេះបាន ប្រជុំបន្ទាន់មួយជាមួយអាជ្ញាធរពាក់ព័ន្ធ រួមមាន អាជ្ញាធរអគ្គិសនី មន្រ្តីមូលដ្ឋាន ខណ្ឌ សង្កាត់ និង អ្នកពាក់ព័ន្ធផ្សេងទៀត ដើម្បីពិនិត្យ និងដោះស្រាយទៅតាមគោលនយោបាយ និងបញ្ជារបស់រាជរដ្ឋាភិបាល។ នៅក្នុងកិច្ចប្រជុំនោះ មន្រ្តីពាក់ព័ន្ធក៏បានបង្ហាញពីផលប៉ះពាល់គម្រោងខ្សែបញ្ជូន ២៣០ គីឡូវ៉ុល និង ៥០០គីឡូវ៉ុល ដែលជាខ្សែបញ្ជូនអទិភាព ដែលរាជរដ្ឋាភិបាលយកចិត្តទុកដាក់យ៉ាងខ្លាំង ដើម្បីបញ្ជូនថាមពលពីប្រភពខាងត្បូង មកប្រើប្រាស់ក្នុងប្រព័ន្ធបណ្តាញជាតិទាំងមូល ជាពិសេសក្នុងរាជធានីភ្នំពេញ ហើយត្រូវបញ្ចប់ឱ្យបានមុនចុងខែមករា ឆ្នាំ២០២០ខាងមុខនេះ។
ដើម្បីធានាឱ្យការសាងសង់គម្រោងខ្សែបញ្ជូននេះ បញ្ចប់ការសាងសង់និងដាក់ឱ្យដំណើរការ តាមផែនការ រាជរដ្ឋាភិបាល បានដាក់ចេញនូវបទបញ្ជា ដល់ក្រសួងស្ថាប័នពាក់ព័ន្ធ និងអាជ្ញាធររាជធានី\ខេត្តទាំង៤មានរាជធានីភ្នំពេញ កណ្តាល កំពង់ស្ពឺ និងខេត្តព្រះសីហនុ ។អភិបាលរាជធានី ខេត្តទាំងនោះត្រូវធ្វើជាប្រធានដឹកនាំការងារដោះស្រាយផលប៉ះពាល់ដោយផ្ទាល់។
អនុវត្តតាមបទបញ្ជាខាងលើ អភិបាលរាជធានីភ្នំពេញលោក ឃួង ស្រេង ក៏បានប្រជុំជម្រុញឱ្យមន្រ្តីពាក់ព័ន្ធអនុវត្តដោយយកចិត្តទុកដាក់បំផុត ដោះស្រាយលើផលប៉ះពាល់ពីគម្រោងនេះ ពិសេសបង្គោលទាំង១០ ក្នុងទឹកដីរាជធានីឱ្យបានតាមផែនការ។
លោកអភិបាល បានស្នើឱ្យមន្រ្តីអនុវត្តទាំងអស់ ត្រូវសហការគ្នា ធ្វើការឱ្យមានប្រសិទ្ធភាព តម្លាភាព និងយុត្តិធម៌ មិនលំអៀង ឬ ទំនោទៅរកបុគ្គលណាមួយនោះឡើយ ។ ត្រូវសិក្សាឱ្យបានល្អិតល្អន់ តាមគន្លងខ្សែបញ្ជូនចរន្តអគ្គិសនីទាំង១០បង្គោល ដោយអញ្ជើញគ្រប់ភាគីពាក់ព័ន្ធមកប្រឹក្សា ពិភាក្សាតាមផ្លូវច្បាប់ ស្វែងរកយន្តការ ដោះស្រាយឱ្យបានលឿន និងតាមគោលនយោបាយរបស់រាជរដ្ឋាភិបាល។
ជាមួយគ្នានោះលោក អភិបាល ក៏បានអំពាវនាវ ដល់បងប្អូនប្រជាពលរដ្ឋ ដែលមានផលប៉ះពាល់ខាងលើ មេត្តយោគយល់ អធ្យាស្រ័យ និងចូលរួមសហការឱ្យបានល្អ ជាមួយមន្រ្តីគ្រប់ផ្នែក ដោយគិតគូរពីផលប្រយោជន៍រួម ប្រសើរជាងផលប្រយោជន៍ឯកជន ដោយទទួលយកនូវការដោះស្រាយគោលនយោបាយរបស់រាជរដ្ឋាភិបាល ដើម្បីធានាឱ្យការសាសង់ទទួលបានជោគជ័យតាមផែនការ៕