នាយឧត្តមសេនីយ៍ផ្កាយមាស ៥ផុតលេខ ដាក់បទបញ្ជាលើកំណែទម្រង់ស័ក្តិ ទុកផ្កាយមាស៤ តែ២នាក់ ក្រៅពីនោះទម្លាក់ផ្កាយមួយថ្នាក់
ភ្នំពេញ៖ នាយឧត្តមសេនីយ៍ផ្កាយមាស ៥ផុតលេខ សម្តេចតេជោ ហ៊ុនសែន នាយករដ្ឋមន្ត្រី បានធ្វើការកំណែរទម្រង់ក្រសួងការពារជាតិ ដោយកំណត់ឲ្យមាននាយឧត្តមសេនីយផ្កាយមាស ៤ មានតែចំនួន ២ រូបគត់ គឺ៖ ១-សម្តេច ពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ២-នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ ។ក្រៅពីនេះនិងសូមឲ្យស្ម័គ្រ្មចិត្ តទម្លាក់ពីផ្កាយ ៤មកត្រឹម ៣ ផ្កាយ៣ មកត្រឹម២ អគ្គនាយកគឺនៅត្រឹមផ្កាយ ៣ មេភូមិភាគ នៅត្រឹម២ ទាំងនេះបើយោងតាមការចុះផ្សាយក្នុងគេហទំព័រ នាយរងសេនាធិការចំរុះអគ្គបញ្ជាការដ្ឋាន កាលពីថ្ងៃទី២៧ មេស ឆ្នាំ២០១៩។
តាមរយៈទំព័រហ្វេសបុក “នាយរងសេនាធិការចំរុះអគ្គបញ្ជាការដ្ឋាន” បានឲ្យដឹងថា សម្តេច ហ៊ុន សែន បានកំណត់ឲ្យមាន នាយឧត្តមសេនីយ៍ផ្កាយមាស៤ ចំនួន២រូបគត់គឺ សម្តេច ទៀ បាញ់ និង លោកវង្ស ពិសេន អគ្គមេបញ្ជាការនៃកងយោធពលខេមរភូមិន្ទ ក្រៅពីនេះទម្លាក់ពីផ្កាយ៤មកត្រឹម៣ ផ្កាយ៣មកត្រឹម២ អគ្គនាយកគឺនៅត្រឹម៣ មេភូមិភាគនៅត្រឹម២ ដែលសូម្បីតែ លោកហ៊ីង ប៊ុនហៀង ផ្កាយ៤ ក៏ត្រូវទម្លាក់មកត្រឹមផ្កាយ៣ដែរ ។ “សម្តេចតេជោ ហ៊ុនសែន ៖ នាយឧត្តមសេនីយ៍ផ្កាយមាស ៤នឹងមាន ២រូបគត់ សម្រាប់កងទ័ព ក្របខណ្ឌក្រសួងការពារជាតិ ។ 🙏🙏🙏💐💐💐 ក្រៅពីនិង និងសូមឲ្យស្ម័គ្រចិត្តទម្លាក់ ពី ៤ មកត្រឹម ៣ »២»១ ។
អគ្គនាយកគឺនៅត្រឹម ៣ មេភូមិភាគ នៅត្រឹម២” នាយរងសេនាធិការចំរុះអគ្គបញ្ជាការដ្ឋាន បញ្ជាក់បែបនេះ។
ក្នុងសេចក្តីណែនាំផ្ទាល់មាត់ទៅកាន់រដ្ឋមន្ត្រីការពារជាតិ និងរដ្ឋមន្ត្រីមហាផ្ទៃ សម្តេចតេជោនាយករដ្ឋមន្ត្រី ហ៊ុន សែន បានដាក់ចេញនូវបទបញ្ជាកំណែទម្រង់ស័ក្តិ និងទប់ស្កាត់ការចុះហត្ថលេខា លើការដំឡើងស័ក្តិ ផ្នែកកងទ័ព និងផ្នែកនគរបាល។ នោះគឺទៅថ្ងៃខាងមុខ ថ្នាក់នាយឧត្តមសេនីយ៍ ផ្កាយ៤ នឹងមានតែ ២រូបប៉ុណ្ណោះ គឺរដ្ឋមន្ត្រីការពារជាតិ និងអគ្គមេបញ្ជាការកងយោធពលខេមរភូមិន្ទ។ រីឯមេបញ្ជាការកងទ័ពជើងគោក ជើងទឹក និងជើងអាកាស រួមទាំងអគ្គនាយក នៅក្រសួងការពារជាតិ ត្រឹមតែផ្កាយ៣ប៉ុណ្ណោះ។ មេបញ្ជាការរងកងទ័ពជើងគោក ជើងទឹក និងជើងអាកាស ព្រមទាំងមេបញ្ជាការភូមិភាគ និងមេកងពល នៅត្រឹមផ្កាយ ២ប៉ុណ្ណោះ។
សម្តេចតេជោ ហ៊ុន សែន លើកឡើងថា ថ្ងៃក្រោយ ក្នុងករណី មេបញ្ជាការកងទ័ពជើងអាកាស និងជើងទឹក ចចូលនិវត្តន៍ គឺមេបញ្ជាការកងទ័ពជើងអាកាស និងមេបញ្ជាការកងទ័ពជើងទឹក ឡើងថ្មី ឲ្យត្រឹមតែផ្កាយ ៣ទេ។ អំណេះតទៅ អាចអគ្គមេបញ្ជាការម្នាក់គត់ ដែលពាក់ផ្កាយ ៤។ ក្រៅពីនោះ គឺថា ឲ្យពាក់ផ្កាយ ៣ទាំងអស់។ នេះជាការយកភាពដាច់ណាត់មួយ នៅក្នុងកំណែទម្រង់កងទ័ព។ ឥឡូវនេះ ខាងបណ្តាអង្គភាពនៃក្រសួងការពារជាតិ នៅតែបន្តដំឡើង។ ឲ្យតែចាប់ផ្តើមឡើងអគ្គនាយក គឺឡើងផ្កាយ ៣។ ឥឡូវនេះ សូមឲ្យបញ្ចប់ត្រឹមប៉ុណ្ណឹងទៅ។ បើមិនអីចឹងទេ គឺថា នរណាចង់បានផ្កាយ នឹងរត់ទៅក្រសួងការពារជាតិហើយ ហើយក្មេងៗ ល្ហក់ៗ។ អគ្គនាយករង នៃក្រសួងការពារជាតិ សម្តេចមិនតែងតាំងទៀតទេ ហើយបើតែងតាំង ត្រឹមតែផ្កាយ ២ទេ។ សព្វថ្ងៃ រដ្ឋមន្ត្រីការពារជាតិ ផ្កាយ ៤ រីឯអ្នកដើរហែហម ក៏ផ្កាយ ៤ដែរ។ រីឯប្រធាន អគ្គនាយក ផ្កាយ ៤ ទាំងអាក្មេងៗ មួយចំនួន ឡើងផ្កាយ ៣ ជាអគ្គនាយករងដែរ។
ចាប់ពីពេលនេះតទៅ សម្តេចមិនតែងតាំងអគ្គនាយករងទៀតទេ នៅក្រសួងការពារជាតិ ក្នុងករណីថា នៅកន្លែងណុង មានអគ្គនាយករងច្រើននាក់ហើយ។ អគ្គនាយករងខ្លះ វាយកឈ្មោះ ទៅរកស៊ី។ អ្នកដែលជាអគ្គនាយករង ហើយមានផ្កាយ ៣ហើយ ឲ្យទៅចុះ។ រីឯអ្នកចង់ឡើងផ្កាយ៣ យើងឲ្យក្រៅប្រអប់។ កុំឲ្យមានអគ្គនាយករង ផ្កាយ ៣ទៀត។ អគ្គនាយករង កំណត់ត្រឹមតែផ្កាយ ២ទៀត។ រីឯអគ្គនាយក ឲ្យត្រឹមតែផ្កាយ ៣ទេ។ ដើម្បីឲ្យវាសមភាពជាមួយគ្នា ជាមួយបណ្តាអង្គភាព ជើងគោក ជើងទឹក និងជើងអាកាស។
សម្តេចតេជោ ហ៊ុន សែន បានបញ្ជាក់ថា “ដូច្នេះបន្ទាប់ពីចៅភារុណ ទៀ វិញ ឬក៏ស៊ុំ សំណាង ឬមួយចំនួនទៀត ចូលនិវត្តន៍យើងទុកអគ្គនាយក ត្រឹមតែផ្កាយ ៣ បានហើយ។ កុំឲ្យមានផ្កាយ៤។ កុំឲ្យមានអតិផរណាផ្កាយយើងច្រើនពេក។ ថ្ងៃក្រោយ ផ្កាយ៣ យើងទុកតែមេជើងគោក មេជើងទឹក និងមេជើងអាកាស”។ “អនាគតទៀត គឺនាយសេនាចម្រុះ និងអគ្គមេបញ្ជាការរងទាំងអស់ ឲ្យតែផ្កាយ ៣ទេ។ ផ្កាយ ៤ គឺឲ្យតែអគ្គមេបញ្ជាការ ១ទៀត។ រដ្ឋមន្ត្រីការពារជាតិ និងរដ្ឋលេខាធិការខ្លះ នៅក្រសួងការពារជាតិ ដែលទទួលផ្កាយ ៤។ ថ្ងៃក្រោយ គឺថា យើងនឹងសម្រិតសម្រាំង។ ឥឡូវ រដ្ឋលេខាធិការ និងអនុរដ្ឋលេខាធិការ ក៏ផ្កាយ៤។ ផ្កាយ ៤ច្រើន ឧទាហរណ៍ថា មាន ២០នាក់ តែអាផ្កាយ ៣ ឡើងដល់រយ”។
សម្តេចបន្តថា “អ៊ីចឹង យើងកំណត់ថា អគ្គនាយករងទាំងអស់ យើងមិនឡើងស័ក្តិទេ។ បើមកដល់ខ្ញុំ ខ្ញុំនឹងទុកឯកសារទាំងអស់ ដើម្បីយើងកំណែទម្រង់ទូទៅ។ យើងកំណែទម្រង់តែទ័ពប្រយុទ្ធ ឯទ័ពបម្រើ យើងមិនកំណែទម្រង់ ក៏មិនបានដែរ។ ឥឡូវនេះ ទាំងវង្សពិសេន ទាំងឥតសារ៉ាត ទាំងណែត បានខិតខំធ្វើខ្លួនឯងហើយ។ ខ្ញុំគាំទ្រ កុំឲ្យណែត ឡើងផ្កាយ ៤ឲ្យសោះ។ អនាគត ទុកតែផ្កាយ ៤តែពីរទេ គឺទុកផ្កាយ៤ ជារដ្ឋមន្ត្រីការពារជាតិ១ និងអគ្គមេបញ្ជាការកងទ័ព ១ បានហើយ។ ក្រៅពីនោះ គឺពាក់ផ្កាយ៣ ទាំងអស់”។ “ដោយឡែក ឥឡូវនេះ មេរងជើងគោក ថ្ងៃក្រោយក៏យើងត្រូវពិចារណា។ ឥឡូវនេះ វាផ្កាយ ៣ទាំងអស់ ទៅហើយ។ តែថ្ងៃក្រោយ យើងអាចនឹងបន្តបញ្ចុះទៅទៀត។ ឧទាហរណ៍ថា មេភូមិភាគបច្ចុប្បន្ន និងមេកងពលបច្ចុប្បន្ន សុទ្ធតែផ្កាយ ៣ទាំងអស់ ហើយសុទ្ធតែជាអនុជើងគោក។ តែថ្ងៃក្រោយ យើងអាចសម្រួលតទៅទៀត អនុជើងគោកតែមួយទេ ដែលអាចកាន់សេនាធិការ ហើយពាក់ផ្កាយ៣។ ឯអនុដទៃទៀត រាប់ទាំងមេបញ្ជាការភូមិភាគ ឲ្យពាក់ត្រឹមតែផ្កាយ ២ទេ”។ “អ៊ីចឹងយើងយករបៀបនេះ ដើម្បីកាត់បន្ថយនូវការតម្លើងស័ក្តិច្រើនពេក។ ខ្ញុំក៏ណែនាំបញ្ហានេះ ទៅខាងផ្នែកនគរបាល ដើម្បីកុំឲ្យនគរបាលដំឡើងថ្នាក់ច្រើនពេក ព្រោះកន្លងទៅ ថាមានជះឥទ្ធិពលគ្នាទៅវិញទៅមក។ ខាងនគរបាល ថាមានកម្លាំងតិច តែថ្នាក់ផ្កាយ៤ ផ្កាយ៣ ផ្កាយ២ វាច្រើនពេក។ ខ្ញុំក៏បានបញ្ជូនសារនេះ ទៅសម្តេចក្រឡាហោម ស ខេង កុំឲ្យមានការដំឡើងស័ក្តិច្រើនពេក ដើម្បីឲ្យមានសមធម៌ នៅក្នុងកងកម្លាំងប្រដាប់អាវុធរបស់យើង ជាទូទៅ។ បើមិនដូច្នោះទេ យើងចូលដល់រាប់ពាន់ ដែលវាអាចជាបញ្ហាមួយ”។
សម្តេចបន្ថែមថា “យើងកំណត់ថា មេភូមិភាគ ឲ្យត្រឹមតែផ្កាយ ២ទេ។ អនុភូមិភាគ ឲ្យផ្កាយ១។ ជាងកន្លះឆ្នាំហើយ ដែលណែតទៅកាន់មេបញ្ជាការជើងគោក ហើយពាក់ត្រឹមផ្កាយ៣ទេ ដោយមិនមានបញ្ហាមិនស្តាប់បញ្ជា ឬស្តាប់បញ្ជាអ្វីទេ។ អីចឹងថ្ងៃក្រោយ អាចប្រធានភូមិភាគណាមួយ ស្ម័គ្រចិត្ត ឲ្យពាក់ត្រឹមផ្កាយ២បានហើយ។ រីឯអ្នកឡើងមក អនុភូមិភាគ ត្រឹមតែផ្កាយ១ បានហើយ”។
លោកមុត ចន្ថា អតីតមន្រ្តីគណបក្សប្រឆាំង បានសរសេរលើហ្វេសប៊ុក នៅថ្ងៃទី២៧មេសានេះថា កំណែទម្រង់វិស័យការជាតិស៉ីជម្រៅ គឺជាកត្តាចាំបាច់ ដើម្បីធានាដល់ការការពារអធិបតេយ្យ និងបូរណភាពទឹកដី។
លោកថា ក្នុងនាមជាពលរដ្ឋខ្មែរម្នាក់ ខ្ញុំសូមគាំទ្រចំពោះកំណែទម្រង់កងទ័ព និងវិស័យការពារជាតិពិតប្រាកដ ព្រោះថាការធ្វើទំនើបកម្មវិស័យការពារជាតិ និងការពង្រឹងវិជ្ជាជីវៈនៃកងទ័ពជាតិ គឺមានសារសំខាន់បំផុត។
ជាងនេះទៅទៀត ការធ្វើឲ្យកងទ័ពជាតិមួយមានឯករាជ្យ និងអព្យាក្រឹត្យភាពពីនយោបាយ និងគណបក្សនយោបាយ កាន់តែមានសារសំខាន់ ដើម្បីទទួលបាននូវកិត្យានុភាព កិត្តិយស ការគោរព និងស្រឡាញ់ពីប្រជាពលរដ្ឋ។ កងទ័ពត្រូវតែស្មោះត្រង់ និងការពារចំពោះរដ្ឋធម្មនុញ្ញ ប៉ុន្តែមិនមែនការពារអ្នកនយោបាយនោះទេ៕
