បើករថយន្តបុកក្បាលថ្ម ទ្រូងផ្លូវ ស្លាប់ខ្លួនឯង

ភ្នំពេញ ៖ រថយន្តមួយគ្រឿងបើកយ៉ាងលឿន ជ្រុលគេចមិនទាន់ ទៅបុកចំក្បាលថ្មពុះចែកទ្រូងផ្លូវ បាក់ខ្ទេច៣កង់ ខ្ទេចរថយន្ត ស្លាប់ខ្លួនឯង កាលពីវេលាម៉ោង៥ព្រឹក ថ្ងៃទី៩ ខែឧសភា ឆ្នាំ២០១៩ ស្ថិតនៅតាមបណ្តោយផ្លូវសហព័ន្ធរុស្សី មុខច្រកចូលព្រលានថ្មី ភូមិក្បាលដំរី២ សង្កាត់កាកាប២ ខណ្ឌពោធិសែនជ័យ ។

រថយន្តម៉ាក morning ពណ៌ទឹកសមុទ្រ ពាក់ស្លាកលេខ ភ្នំពេញ 2Z-9375 បើកបរដោយឈ្មោះ ម៉ុន តៃជរ ភេទប្រុស អាយុ២៦ ឆ្នាំ មុខរបរ បកប្រែភាសាចិន រោងចក្រ ស្នាក់នៅផ្ទះជួល ភូមិកន្ទោកជើង សង្កាត់កន្ទោក ខណ្ឌកំបូល មានស្រុកកំណើតភូមិខ្ពបតាងួន ឃុំខ្ពបតាងួន ស្រុកស្ទឹងត្រង់ ខេត្តកំពង់ចាម ។ រថយន្តបង្ក បើកល្បឿនលឿនពីកើតទៅលិច លុះដល់ចំណុចកើតហេតុ ទើបជ្រុលទៅបុកក្បាលថ្មពុះចែកទ្រូងផ្លូវ វិលមួយជុំ ក្បាលនាគ ទ្រូងផ្លូវ បាក់ បែក អស់ចំនួន៣កង់។
បើតាមសាច់ញាតិ មិត្តភ័ក្ររួមការងារ បានឲ្យដឹងថា ពួកគាត់ មិនបានឃើញជនរងគ្រោះ ដេកស្នាក់នៅបន្ទប់ជួលដែរ កាលពីយប់មិញ មិនដឹងថា ជនរងគ្រោះទៅដេកឯណាដែរ ស្រាប់តែ នៅវេលាម៉ោងខាងលើ ឮដំណឹងថាជនរងគ្រោះជួបរឿងអកុសលបែបនេះទៅវិញ ៕