ចិន ដាក់ដំណើរការ នាវាចម្បាំងពិឃាតថ្មីពីរគ្រឿង ដែលបំពាក់មីស៊ីលប្រដេញ

ប៉េកាំង៖ ប្រទេសចិន បានប្រកាសដាក់ដំណើរការ នាវាចម្បាំងថ្មីចំនួន២គ្រឿងប្រភេទ Type 052D ដែលមានបំពាក់មីស៊ីលប្រដេញ នៅឯទីក្រុង Dalian ភាគឦសានប្រទេសចិន កាលពីថ្ងៃសុក្រ។ នេះបើតាមការដកស្រង់ការផ្សាយចេញពីសារព័ត៌មានរុស្ស៊ី Sputnik នៅយប់ថ្ងៃសៅរ៍ ទី១១ ខែឧសភា ឆ្នាំ២០១៩។

នាវាចម្បាំងទាំងពីរគ្រឿងមានឈ្មោះថា Tangshan និង Suzhou គឺជានាវាចម្បាំងទី១៩និងទី២០ ដែលជាប្រភេទ Type 052D ។ នាវាចម្បាំងប្រភេទ Type 052D គឺជាប្រភេទនាវាពិឃាតធុនធំ មានទម្ងន់៧៥០០តោន ដែលបានត្រូវបានដាក់ ឲ្យប្រើប្រាស់លើកដំបូង កាលពីខែមីនា ឆ្នាំ២០១៤។ នាវាចម្បាំងប្រភេទនេះ មានបំពាក់ប្រព័ន្ធរ៉ាដាទំនើប រួមជាមួយប្រព័ន្ធកាំភ្លើងក៏ដូចជា ប្រព័ន្ធមីស៊ីល ដែលអាចបំពាក់មីស៊ីលបាញ់ឆ្ពោះទៅរកគោលដៅ នៅផ្ទៃអាកាស មីស៊ីលប្រឆាំងនាវាលើផ្ទៃទឹក និងសូម្បីតែមីស៊ីល ប្រឆាំងនាវាមុជទឹក ហើយពួកវាក៏អាចផ្ទុកឧទ្ធម្ភាគចក្រ បានមួយគ្រឿងផងដែរ៕