ជិះម៉ូតូទៅបុកជាមួយរថយន្តដឹកអំបិល ស្លាប់២នាក់ របួសធ្ងន់ម្នាក់ នៅខណ្ឌដង្កោ

ភ្នំពេញ ៖ យុវជនពីរនាក់ស្លាប់ទន្ទឹមគ្នានៅនិងកន្លែងយ៉ាងម្នាក់ទៀតរងរបួសធ្ងន់ក្រោយពួកគាត់ជិះម៉ូតូមួយគ្រឿងឌុបគ្នាចេញពីរាំលេងនៅក្លឹបមួយកន្លែងហើយជ្រុល ទៅបុកជាមួយរថយន្តកូរ៉េ២តោនកន្លះក្នុងទិសដៅបញ្ច្រាស់ទឹស គ្នាយ៉ាងពេញទំហឹង ។
គ្រោះថ្នាក់ចរាចរខាងលើកើតឡើងកាលពីម៉ោងជិត២រំលងអធ្រាត្រ ឈានចូលថ្ងៃទី៩ ខែកក្កដា ឆ្នាំ២០១៨ នៅចំណុច មុខ ធនាគារ វឌ្ឈនៈ២ តាមបណ្ដោយផ្លូវជាតិលេខ៣ ស្ថិតក្នុងភូមិទឹកថ្លា សង្កាត់ក្រាំងពង្រ ខណ្ឌដង្កោ ។

យុវជនរងគ្រោះដែលស្លាប់នៅកន្លែងកើតហេតុមានពីរនាក់ ៖ ទី១មានឈ្មោះ សុិន សុគា អាយុ២១ឆ្នាំ មុខរបប កម្មកររោងចក្រ អាសយដ្ឋាន ក្នុងភូមិគោកត្រប់ ឃុំគោកត្រប់ ស្រុកកណ្ដាលស្ទឹង ខេត្តកណ្ដាល ។ ជនរងគ្រោះដែលស្លាប់ម្នាក់ និងរបួសធ្ងន់ម្នាក់ទៀតនោះ នៅមិនទាន់ស្គាល់អត្តសញ្ញាណនោះទេ ។
ម៉ូតូរងគ្រោះខាងលើម៉ាក ហុងដាឌ្រីម ពណ៌ខ្មៅស៊េរី២០១៧ ពាក់ស្លាក លេខ កណ្ដាល 1W-8828 ។ ចំណែករថយន្តបង្កម៉ាក ហុីយ៉ាន់ដាយ ពណ៌ស ពាក់ស្លាក លេខ តាកែវ3A-1622 ។

មិត្តភ័ក្តរបស់ជនរងគ្រោះទាំង៣នាក់ខាងលើ បានឲ្យដឹងថា ពួកគាត់មានគ្នា៦នាក់ ជិះម៉ូតូ២គ្រឿង(មួយគ្រឿងជិះគ្នា៣នាក់) បានចេញពីរាំលេង នៅក្លឹបនៅម្ដុំចោមចៅ ហើយជិះម៉ូតូតាមបណ្ដោយផ្លូវជាតិលេខ៣ ទិសដៅពីជើងទៅត្បូងបំណងត្រឡប់ទៅផ្ទះវិញ ខណះជិះជិតដល់កន្លែងកើតហេតុ ភាគីម្ខាងដែលជិះម៉ូតូមួយគ្រឿងគ្នា៣នាក់ បានឈប់បត់ជើងតូច ហើយភាគីម្ខាងជនរងគ្រោះ៣នាក់ខាងលើបានបន្តទៅមុខមុន តែអកុសល ជនរងគ្រោះខាងលើបានជ្រុលទៅបុកជាមួយរថយន្តហុីយ៉ាន់ដាយ (ដឹកអំបិល) តាមបណ្តោយផ្លូវជាតិលេខ៣ទឹសដៅពីត្បូងទៅជើង បញ្ច្រាស់ទឹសគ្នាយ៉ាងពេញទំហឹង បណ្ដាលឲ្យជនរងគ្រោះបោកក្បាលជាមួយនិង រថយន្ត ស្លាប់2នាក់នៅនិងកន្លែង និងម្នាក់ទៀតរង របួសធ្ងន់។

ក្រោយពេលកើតហេតុភ្លាមៗ រថយន្តបង្កបានព្យាយាមបើក រត់ហូសវិទ្យាល័យពងទឹកបន្តិចក៏ឈប់រថយន្តទុកចោល ហើយចុះគេចខ្លួនបាត់។ចំណែកជនរងគ្រោះដែលរបួសធ្ងន់ ត្រូវបានរថយន្តសាមុយដឹកបញ្ចូនទៅកាន់មន្ទីពេទ្យភ្លាមៗផងដែរ ។ក្រោយមក សមត្ថកិច្ចមូលដ្ឋានបានចុះទៅដល់កន្លែងកើតហេតុ ហើយទាក់ទងទៅជំនាញមកធ្វើការវាស់វែង យករថយន្តនិងម៉ូតូរងគ្រោះ ទៅរក្សាទុកនៅស្នងការដ្ឋានគរបាលរាជធានីភ្នំពេញ ដើម្បីរងចាំដោះស្រាយតាមផ្លូវច្បាប់ ។
ចំណែកឯសពជនរងគ្រោះទាំងពីរ សមត្ថកិច្ចបានទាក់ទងទៅសាច់ញាតិក្រុមគ្រួសារឲ្យមកទទួល យកទៅស្រុកកំណើត៕