អាវ វ៉ាតានបង្អួតខ្សែក្រវាត់មុនជួបជាមួយរឿង សោភ័ណ្ឌ

​ភ្នំពេញ:អ្នកប្រដាល់កម្ពុជារឿង សោភ័ណ្ឌក្លិបម្កុដរាជសីហ៍ត្រៀមខ្លួនរួចជាស្រេចហើយដើម្បីប្រកួតជាមួយអ្នកប្រដាល់ថៃចំណូលថ្មីមួយរូបផ្សេងទៀតឈ្មោះអាវ វ៉ាតាន(Ao Watan)ដោយប្រកួតគ្នាក្នុងប្រភេទទម្ងន់៦៩គីឡូក្រាម ។

​អាវ វ៉ាតានគេទើបតែមកប្រកួតនៅស្រុកខ្មែរជាលើកដំបូងនេះទេ ។ អ្នកប្រដាល់ថៃរូបនេះបានបង្អួតខ្សែក្រវាត់ចំនួន៣របស់ខ្លួនតែមិនដឹងថាជាខ្សែក្រវាត់ខ្ចីគេមកបង្អួតឬជាខ្សែក្រវាតរបស់ខ្លួននោះឡើយ ។ប្រសិនបើនេះជាខ្សែក្រវាត់របស់អាវ វ៉ាតានមែននោះបញ្ជាក់ថាអ្នកប្រដាល់រូបនេះពិតជាមិនធម្មតានោះទេ ។

​ចំពោះសោភ័ណ្ឌជាអ្នកប្រដាល់ដែលខ្លាំងឆ្វេង ។ទាំងដៃទាំងជើងរបស់គេគឺច្បាស់ឆ្វេង ហើយក៏ធ្ងន់ខាងឆ្វេងដែរ ។អាវុធខាងឆ្វេងរបស់គេតែងតែធ្វើឲ្យគូប្រកួតដួលក្រោកលែងរួចតែបើជួបគូប្រកួតខ្លាំងវិញនោះ​ អ្នកប្រដាល់រូប
នេះចិត្តតូចមែនទែនហើយចូលចិត្តបន្លំអាជ្ញាកណ្ដាលថា គេទាត់ចំពងរបស់ខ្លួនទៀតផង ។

​សោភ័ណ្ឌមានប្រវត្តិប្រកួតចំនួន១៦៦ដង ឈ្នះ១៤៥ដង ចាញ់១៧ដង និងស្មើពិន្ទុ៤ដង ។ ចំពោះអ្នកប្រដាល់ថៃអាវ វ៉ាតានវិញគេមានប្រវត្តិប្រកួតចំនួន១០៨ដង ឈ្នះ៨៨ដង ចាញ់១៨ដង និងស្មើពិន្ទុ ២ ដង ។ ជំនួបរវាងអ្នកខ្លាំងទាំង២រូបនេះនរណាឈ្នះ ?

​អ៊ូច ធារិទ្ធក្លិបអាណាចក្រគុនខ្មែរដែលមិនមាននរណាធ្លាប់ស្គាល់នោះត្រូវបានដាក់ឲ្យប្រកួតជាមួយអ្នកប្រដាល់ថៃកៅ ថាប់(Kao Thap)ដោយប្រកួតគ្នាក្នុងប្រភេទទម្ងន់៥៧គីឡូក្រាម ។
​ធារិទ្ធទំនងជាមិនខ្សោយទេទើបគេដាក់ឲ្យប្រកួត ជាមួយអ្នកប្រដាល់ថៃបែបនេះ ។ ការប្រកួតមួយនេះធារិទ្ធ ត្រូវការឈ្នះខ្លាំងណាស់ព្រោះវាជាឱកាសដើម្បីធ្វើឲ្យគេមានការប្រកួតជាមួយអ្នកប្រដាល់បរទេសកាន់តែច្រើន ។
​អ៊ូច ធារិទ្ធមានប្រវត្តិប្រកួតចំនួន៧១ដង ឈ្នះ៤៩ដង ចាញ់១៨ដង និងស្មើពិន្ទុ៤ដង ។ចំពោះអ្នកប្រដាល់ថៃកៅ ថាប់វិញគេមានប្រវត្តិប្រកួតចំនួន៥៩ដង ឈ្នះ៥១ដង និងចាញ់៨ដង ។ អ្នកប្រដាល់ដែលទើបតែលេចមុខមករូប
នេះអាចដណ្ដើមជ័យជំនះលើអ្នកប្រដាល់ថៃបានឬទេ ?