នគរបាលខណ្ឌច្បារអំពៅឃាត់ខ្លួនជនសង្ស័យលួចម៉ូតូម្នាក់ នៅសង្កាត់ ក្បាលកោះ

ភ្នំពេញ ៖ នគរបាលខណ្ឌច្បារអំពៅ ឃាត់ខ្លួនជនសង្ស័យលួចម៉ូតូម្នាក់ នៅមុខសិប្បកម្មឡឥដ្ឋ កាលល្ងាចថ្ងៃទី០៦ ខែមិថុនា ឆ្នាំ២០១៩ នៅភូមិព្រែកធំ សង្កាត់ក្បាលកោះ ខណ្ឌច្បារអំពៅ។

ជនសង្ស័យឃាត់ខ្លួន ឈ្មោះ ខុម សត្យា ភេទប្រុស អាយុ២១ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅភូមិព្រែកធំ១ សង្កាត់ក្បាលកោះ ខណ្ឌច្បារអំពៅ។

ចំណែកជនរងគ្រោះឈ្មោះ យី សំណាង ភេទប្រុស អាយុ៦០ឆ្នាំ មុខរបរ រត់ម៉ូតូឌុប ស្នាក់នៅផ្ទះលេខ១៩២ស្ទួន ភូមិតាងៅកណ្តាល សង្កាត់និរោធ ខណ្ឌច្បារអំពៅ។

សមត្ថកិច្ចបានអោយដឹងថា មុនពេលកើតហេតុជនរងគ្រោះទុកម៉ូតូម៉ាក Honda C125 ពណ៌ខ្មៅ ស្លាកលេខ ភ្នំពេញ១BQ-៨៧០៨ នៅចំណុចកើតហេតុ រួចចូលទៅបេះស្លឹកគន្ធុំថេត ស្រាប់តែមានជនសង្ស័យ ០២នាក់ ឈ្មោះខុម សត្យា និងឈ្មោះ ខុម ចាន់ហេង ជិះម៉ូតូ០១គ្រឿង ម៉ាកយ៉ាម៉ាហាអ៊ិចសងទ័រ ពណ៌ខ្មៅ ស្លាកលេខ ភ្នំពេញ ១GB-២៩៣១ មកឈប់ក្បែរ រួចជនសង្ស័យឈ្មោះ ខុម ចាន់ហេង ធ្វើសកម្មភាពលួចម៉ូតូជនរងគ្រោះជិះគេចខ្លួនបាត់។ បន្ទាប់មកជនរងគ្រោះឆែកកាមេរ៉ាសុវត្តិភាពប្រជាពលរដ្ឋក្បែរនោះ ឃើញជនសង្ស័យទាំង០២នាក់ខាងលើលួច ម៉ូតូ ក៏មករាយការណ៍ប្រាប់សមត្ថកិច្ច។ លុះដល់ថ្ងៃទី០៦-០៦-២០១៩ ម៉ោង០៩និង៣០នាទី សមត្ថកិច្ចឃើញជនសង្ស័យឈ្មោះ ខុម សត្យា ជិះម៉ូតូម៉ាក Honda C125 ពណ៌ខ្មៅ ស្លាក លេខ ភ្នំពេញ ១CY-០៦៤២ នៅភូមិព្រែកធំ សង្កាត់ក្បាលកោះ ខណ្ឌច្បារអំពៅ ក៏ឃាត់ខ្លួន រួចត្រួតពិនិត្យសាលាឆទានដែលជនសង្ស័យស្នាក់នៅបណ្តោះអាសន្ន រកឃើញម៉ូតូម៉ាក Honda Zomer-X ពណ៌ក្រហម ស្លាក លេខ ភ្នំពេញ ១CR-២៣៧៤, កាងម៉ូតូ២គូ, ចង្អើម៉ូតូ០១, កូនកន្រ្តៃ០១, ម៉ូទ័រឆាប០១,ម៉ាល្វេន ម៉ូតូ០២, ដែកទួរណឺវីស០២, ដង្កាប់០១, កូនសោរ០៨ ,មួក សុវត្ថិភាពពណ៍ស១ និងអាវក្រៅពណ៌ឈាមជ្រូក១(ជនសង្ស័យពាក់ធ្វើសកម្មភាព) រួចក៏បញ្ជូនមកអធិការដ្ឋាន នគរបាលខណ្ឌច្បារអំពៅ ចាត់ការតាមច្បាប់។៕