កម្ពុជានិងវៀតណាម បានបើកកិច្ចប្រជុំរួមគ្នា ពង្រឹងប្រតិបត្តិការ បង្ក្រាបគ្រឿងញៀនតាមព្រំដែន
វៀតណាម ៖ កម្ពុជានិងវៀតណាម បានបើកកិច្ចប្រជុំរួមគ្នាមួយ នៅថ្ងៃទី១៣ មិថុនា ឆ្នាំ២០១៩នេះ ដើម្បីការរៀបចំ ផែនការរួម គ្នាមួយដ៏ជាក់លាក់លើការបង្ក្រាបគ្រឿងញៀនតាមបណ្តោយព្រំដែនរួមរវាងប្រទេសទាំង២ ។
កិច្ចប្រជុំនៅព្រឹកថ្ងៃព្រហស្បតិ៍នេះ បានប្រព្រឹត្តទៅក្នុងទឹកដីវៀតណាម ក្នុងសាលប្រជុំក្នុងសណ្ឋាគារមួយ ក្នុងខេត្តតៃនិញ ដោយមានការអញ្ជើញចូលរួមពីគណៈប្រតិភូរតិភូនៃភាគីកម្ពុជាដឹកនាំដោយលោក នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងគណៈប្រតិភូនៃភាគីវៀតណាម ដឹកនាំដោយ ប្រធាននាយកដ្ឋានតម្រួត ស៊ើបអង្កេតបទល្មើសគ្រឿងញៀន លោក ឧត្តមសេនីយ៍ទោ ផាម វ៉ាន់កាក់ ។
ក្រោយស្តាប់នូវរបាយការណ៍អំពីសភាពការណ៍គ្រឿងញៀន ទាំងអង្គភាពប្រឆាំងគ្រឿងញៀនទាំង២នៃប្រទេសកម្ពុជានិងវៀតណាម និងរបាយការណ៍ស្តីពីសភាពការណ៍ និងលទ្ធផលតស៊ូបង្ការ បង្ក្រាបបទល្មើសគ្រឿងញៀន និងអំពើរត់ពន្ធទំនិញខុសច្បាប់នៅតាមខ្សែបន្ទាត់ព្រំដែនវៀតណាម និងកម្ពុជារួចមក លោកនាយឧត្តមសេនីយ៍ សន្តិបណ្ឌិត នេត សាវឿន បានមានប្រសាសន៍បង្ហាញការចាប់អារម្មណ៍អំពីសភាពការណ៍ដែលកើត ឡើងពាក់ព័ន្ធនឹងបទល្មើសឆ្លងដែន ជាពិសេសវិធានការ និងសំណូមពរដើម្បីការទប់ស្កាត់អំពើជួញដូរគ្រឿងញៀនតាមខ្សែបណ្តោយព្រំដែននៃប្រទេសទាំងពីរ ។
លោកអគ្គស្នងការនគរបាលជាតិកម្ពុជា បានដាក់ចេញនូវសំណូមពរចំនួន៤ និងបានពន្យល់បន្ថែមនូវភាព ចាំបាច់អំពីអ្វីដែលគេនឹងត្រូវធ្វើដើម្បីកាត់បន្ថយការនាំចូល ការប្រើប្រាស់ និងការជួញដូរគ្រឿងញៀន តាមបណ្តោយព្រំដែនកម្ពុជានិងវៀតណាម ។ សំណូមពរទាំង៤រួមមាន ៖
១/ ការស្នើសុំឲ្យកំណត់ជាទស្សនៈមួយច្បាស់លាស់នូវការឯកភាពគ្នាទាំងភាគី កម្ពុជានិងវៀតណាម ក្នុងឆន្ទៈប្រឆាំង និងបង្ក្រាបគ្រឿងញៀន ដើម្បីឈានទៅការរៀបចំធ្វើយុទ្ធនាការបង្ការ និងបង្ក្រាបគ្រឿងញៀន នៅតាមបន្ទាត់ព្រំដែនកម្ពុជា-វៀតណាម។
២/ ការស្នើសុំឲ្យធ្វើផែនការលំអិតនៃយុទ្ធនាការជាក់ស្តែង រវាងនាយកដ្ឋានបង្ក្រាបគ្រឿងញៀនវៀតណាម និងកម្ពុជា និងការធ្វើជាសេនាធិការដើម្បីរៀបចំផែនការយុទ្ធនាការជាក់ស្តែង។
ក្នុងចំណុចទី២នេះ ក៏រួមមានចំណុចទាក់នៃការស្នើទាក់ទង នឹងកញ្ចប់នៃការអនុវត្តច្បាប់ និងភារកិច្ចដែលជាប់ទាក់ទងនឹងកម្លាំងពាក់ព័ន្ធនីមួយៗ ទាំងកម្លាំងនគរបាល កម្លាំងបញ្ជាការព្រំដែន ភាពពាក់ព័ន្ធតាមបណ្តាខេត្ត ភាពពាក់ព័ន្ធនឹងថ្នាក់ជាតិ និងកម្លាំងផ្សេងដទៃទៀត ដោយកំណត់ថា តើពួកគេត្រូវធ្វើអ្វីខ្លះ? ក្នុងចំណុចដដែលនេះទៀត នៅមានរួមកញ្ចប់អប់រំ កញ្ចប់ផ្នែករដ្ឋបាល ដែលទាក់ទងលើផ្នែកត្រួតពិនិត្យ នៃអង្គភាពតាមបណ្តាយព្រំដែន។
៣/ សំណើចំពោះអ្នកអនុវត្តច្បាប់ និងអ្នកស្រាវជ្រាវ ដោយការបង្កើតជាគណៈបញ្ជាការមួយ ទាំងខាងវៀតណាម និងទាំងខាងកម្ពុជា ។ គណៈបញ្ជាការនេះ គឺជាកន្លែងបើកច្រកឲ្យធ្វើទំនាក់ទំនង និងផ្តល់ព័ត៌មានគ្នាទៅវិញទៅមក និងទី៤/ សំណូមពរជំរុញភាពរូតរះ ទាំងសងខាង ដើម្បីជួយតាមចាប់ ជនសង្ស័យដែលស្នើដោយភាគីពាក់ព័ន្ធ កម្ពុជានិងវៀតណាម ៕
