អគារកំពុងសង់ថ្មីមួយកន្លែងកំពស់៧ជាន់ នៅក្នុងសង្កាត់លេខ៤ក្រុងព្រះសីហនុ បានបាក់រលំរាបដល់ដី និងមានកម្មករជាច្រើនស្នាក់ក្នុងអគារនេះ

ក្រុងព្រះសីហនុ៖ អគារកំពុងសង់ថ្មីមួយកន្លែងកំពស់៧ជាន់នៅជិតកន្លែងលាងរថយន្តអារុណរះក្នុងសង្កាត់លេខ៤ក្រុងព្រះសីហនុ បានបាក់រលំនៅវេលាម៉ោងជិត៥ព្រឹកថ្ងៃទី២២មិថុនា២០១៩នេះ ក្នុងនោះកន្លែងលាងរថយន្តអារុណរះ និងផ្ទះពលរដ្ឋម្ខាងទៀត ដែលនៅជាប់នោះ ក៏ទទួលរងផលប៉ះពាល់ និងរងការខូចខាតរថយន្តនិងទ្រព្យសម្បត្តិមួយចំនួន ពីការបាក់រលំអគារនេះដែរ ។

សេចក្តីរាយការណ៍បឋមពីកន្លែងកើតហេតុមកថា មានមនុស្សមួយចំនួនភាគច្រើន ជាកម្មករបានជាប់ក្នុងគំនរអគាររំបាក់នេះ ប៉ុន្តែភ្លាមៗមិនទាន់ដឹងពីចំនួនពិតប្រាកដឬមានអ្នកស្លាប់និងរបួសប៉ុន្មាននាក់ឡើយ ។ ករណីនេះសមត្ថកិច្ចនិងក្រុមសង្គ្រោះកំពុងអន្តរាគមន៍ ជួយជនរងគ្រោះ ដែលជាប់ក្នុងគំនរបាក់បែកនោះ៕