រថយន្តដឹកទំនិញ មកបុកម៉ូតូ នៅចំណុចអន្លង់តាកែវ លើផ្លូវជាតិលេខ 48 ស្លាប់ម្នាក់

កោះកុង៖ ករណីគ្រោះថ្នាក់ចរាចរ រថយន្តធុនធំប្រភេទដឹកទំនិញ បើក បុកនឹងម៉ូតូបណ្តាលមនុស្សស្លាប់ ០១នាក់ នៅថ្ងៃទី២២ ខែមិថុនា ឆ្នាំ២០១៩ នៅវេលាម៉ោង ១១:២៥នាទីថ្ងៃត្រង់ លើផ្លូវជាតិ ៤៨ នៅចន្លោះគីឡូម៉ែត្រលេខ ៨៤-៨៥ ចំណុចអន្លង់តាកែវ ស្ថិតនៅភូមិត្រពាំងរូង ឃុំត្រពាំងរូង ស្រុកកោះកុង ខេត្តកោះកុង ។

ស្នងការដ្ឋាននគរបាលខេត្តកោះកុង បានឲ្យដឹងថា រថយន្តបង្កម៉ាក ហាន់ដាយ ពណ៌ខៀវ ស ពាក់ផ្លាកលេខ ស្ទឹងត្រែង 3A-0009 អ្នកបើកបរត់គេចខ្លួនបាត់ បានបុកនឹងម៉ូតូ១គ្រឿង ម៉ាក Honda ពណ៌ខ្មៅ គ្មានផ្លាកលេខ អ្នកបើកបរដោយ ឈ្មោះ សាន់ ញៀន ភេទប្រុស អាយុ ១៦ឆ្នាំ មានទីលំនៅភូមិ ព្រែកស្មាច់ ឃុំកោះស្តេច ស្រុកគិរីសាគរ ខេត្តកោះកុង ស្លាប់នៅនឹងកន្លែងកើតហេតុ។
ក្រោយពេលកើតហេតុ កំលាំងអធិការដ្ឋាននគរបាលស្រុកកោះកុង បានចុះអន្តរាគមន៍ ដល់កន្លែងកើតហេតុ បច្ចុប្បន្នរថយន្ត និងម៉ូតូ កម្លាំងជំនាញអធិការដ្ឋាន បានធ្វើកំណត់ហេតុ ដកហូត រក្សាទុក នៅអធិការដ្ឋាននគរបាលស្រុកកោះកុង រង់ចាំដោះស្រាយតាមនីតិវិធីច្បាប់ ចំណែកសាកសព បានធ្វើកំណត់ហេតុ ប្រគល់អោយក្រុមគ្រួសារ ធ្វើបុណ្យតាមប្រពៃណីជាតិ៕