ឃាត់ខ្លួនជនសង្ស័យ២នាក់ ពាក់ព័ន្ធករណីឆក់កាបូប នៅស្ទឹងមានជ័យ៣
ភ្នំពេញ ៖ នគរបាលប៉ុស្តិ៍ស្ទឹងមានជ័យ៣ ឃាត់ខ្លួនជនសង្ស័យ២នាក់ ក្នុងករណីឆក់កាបូប នៅចំណុចក្បែរហាងសាំងតេលា ផ្លូវបេតុង ភូមិ ដំណាក់ធំ២ សង្កាត់ ស្ទឹងមានជ័យទី៣ ខណ្ឌ មានជ័យ រាជធានីភ្នំពេញ កាលវេលាម៉ោង២២ម៉៣០នាទី ថ្ងៃទី២៦ ខែ មិថុនា ឆ្នាំ២០១៩ ។
លោក ឯម ភារី នាយប៉ុស្តិ៍ស្ទឹងមានជ័យ៣ បានអោយដឹងថា ជនសង្ស័យទី១ ឈ្មោះ សោម សំបូរ ភេទ ប្រុស អាយុ ២៣ឆ្នាំ ទីលំនៅផ្ទះជួល ផ្លូវលំ ភូមិ កោះនរា សង្កាត់និរោធ ខណ្ឌច្បារអំពៅ រាជធានីភ្នំពេញ មុខរបរជាងចំលាក់ (ឃាត់ខ្លួនមានផ្ទុកសារធាតុញៀន) ។ ជនសង្ស័យទី២ ឈ្មោះ ហរ ពិសេស ភេទប្រុស អាយុ ១៨ឆ្នាំ ទីលំនៅផ្ទះគ្មានលេខ ផ្លូវលំ ភូមិតាងូវ សង្កាត់ និរោធ ខណ្ឌច្បារអំពៅ រាជធានីភ្នំពេញ មុខរបរ កម្មករ (ឃាត់ខ្លួនមានផ្ទុកសារធាតុញៀន) ។
ចំណែកជនរងគ្រោះឈ្មោះ វ៉ាត ហឿង ភេទស្រី អាយុ១៧ឆ្នាំ ទីលំនៅផ្ទះជួល ផ្លូវលំ ភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ មុខរបរកម្មការនីរោងចក្រ ។
ជាមួយគ្នានេះ សមត្ថកិច្ចដកហូតវត្ថុតាង ៖ ម៉ូតូ០១គ្រឿងម៉ាកស្មាស់ ពណ៍ខ្មៅ ពាក់ស្លាកលេខ ភ្នំពេញ 1W 6251 (ជារបស់ជនសង្ស័យ) និង កាបូបស្ពាយ ពណ៍លឿង ចំនួន ០១ (ខាងក្នុងមានប្រាក់ចំនួន៣០ដុល្លារ ជារបស់ជនរងគ្រោះ) ។
លោកនាយប៉ុស្តិ៍ បញ្ជាក់ថា កាលពីថ្ងៃទី២៦ ខែ មិថុនា ឆ្នាំ២០១៩ វេលាម៉ោង២២ម៉៣០នាទី ជនរងគ្រោះឈ្មោះ វ៉ាត ហឿង និង ក្រុមគ្រួសារចំនួន០៥នាក់ បានជិះម៉ូតូចំនួន០២គ្រឿងចេញមកពីដើរលេងនៅកោះពេជ្រ (ដោយជនរងគ្រោះឈ្មោះ វ៉ាត ហឿង បានស្ពាយកាបូប០១ពណ៍លឿងខាងក្នុងមានប្រាក់ចំនួន៣០ដុល្លារ) ពេលមកដល់ចំណុចក្បែរហាងសាំងតេលា ផ្លូវបេតុង ភូមិដំណាក់ធំ២ ស្រាប់តែមានជនសង្ស័យ០២នាក់ឈ្មោះ សោម សំបូរ និង ឈ្មោះ ហរ ពិសេស ជិះម៉ូតូ០១គ្រឿងម៉ាកស្មាស់ ពណ៍ខ្មៅ ពាក់ស្លាកលេខ ភ្នំពេញ 1W 6251(ជនសង្ស័យឈ្មោះ សោម សំបូរ ជាអ្នកបើកម៉ូតូ, ចំណែកជនសង្ស័យឈ្មោះ ហរ ពិសេស ជាអ្នកអង្គុយខាងក្រោយ) បានធ្វើសកម្មភាពឆក់យកកាបូបស្ពាយរបស់ជនរងគ្រោះបណ្តាលឲ្យដួលម៉ូតូ ពេលនោះជនរងគ្រោះ និង ក្រុមគ្រួសារ បានស្ទុះទៅចាប់ជនសង្ស័យទាំង០២នាក់ក៏មានការប្រតាយប្រតប់គ្នា ទន្ទឹមនោះកម្លាំងល្បាតនគរបាលប៉ុស្តិ៍ស្ទឹងមានជ័យទី៣ បានមកដល់ក៏ឃាត់ខ្លួនជនសង្ស័យទាំង០២នាក់ឈ្មោះ សោម សំបូរ និង ឈ្មោះ ហរ ពិសេស យកមកសាកសួរនៅស្នាក់ការប៉ុស្តិ៍តែម្តង ។
បច្ចុប្បន្នជនសង្ស័យឈ្មោះ សោម សំបូរ និង ឈ្មោះ ហរ ពិសេស ឃាត់ខ្លួននៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់តាមនីតិវិធី ៕