ឃាត់ខ្លួនជនសង្ស័យម្នាក់ ដកហូតបានថ្នាំញៀនម៉ាទឹកកកមួយចំនួន

កណ្តាល៖ សមត្ថកិច្ចនគរបាលប៉ុស្តិ៍សិត្បូ ឃាត់ខ្លួនជនសង្ស័យម្នាក់ ដកហូតបានថ្នាំញៀនម៉ាទឹកកកមួយចំនួន ដែលប្រតិបត្តិការនេះ ធ្វើឡើងនៅថ្ងៃ ព្រហស្បត៍ ទី ១២ ខែកក្កដា ឆ្នាំ២០១៨ វេលាម៉ោង ២១និង១០នាទី នៅចំណុចភូមិព្រែកតាព្រីង ឃុំសិត្បូ ស្រុកស្អាង ខេត្តកណ្តាល ។

នគរបាលប៉ុស្តិ៍សិត្បូ បានឲ្យដឹងថា ជនសង្ស័យដែលសមត្ថកិច្ចឃាត់ខ្លួន ឈ្មោះ ឈុំ រី ហៅឆក ភេទប្រុស អាយុ
៣០ឆ្នាំ ជនជាតិខ្មែរ មុខរបររត់ម៉ូតូកង់បី មានទីលំនៅបច្ចុប្បន្នភូមិ ព្រែកតាព្រីង ឃុំសិត្បូ ស្រុកស្អាង ខេត្តកណ្តាល។ វត្ថុតាងចាប់យករួមមាន៖ ម្សៅក្រាមពណ៌សថ្លាសង្ស័យថាជាសារធាតុញៀន(ម៉ាទឹកកក) ចំនួន៥កញ្ចប់ ក្នុងនោះ ធំ ១កញ្ចប់ និងតូច ៤កញ្ចប់។

នៅថ្ងៃទីខែឆ្នាំវេលាម៉ោងកើតហេតុ ក្រោយទទួលបានព័ត៌មានពីប្រជាពលរដ្ឋល្អថា មានករណីជួញដូរគ្រឿងញៀន នៅចំណុចកើតហេតុខាងលើ ភ្លាមនោះកម្លាំងប៉ុស្ដិ៍សិត្បូ បានចុះដល់ចំណុចកើតហេតុ ហើយក៏ធ្វើការឃាត់ខ្លួន ជនសង្ស័យចំនួន ១នាក់ រកឃើញម្សៅក្រាមពណ៌សថ្លាសង្ស័យជាសារធាតុញៀន(ម៉ាទឹកកក)ចំនួន ៥កញ្ចប់ ក្នុងនោះ ធំ ១កញ្ចប់ តូច៤កញ្ចប់ រួចក៏ធ្វើការឃាត់ខ្លួនមកប៉ុស្តិ៍នគរបាលរដ្ឋបាលសិត្បូ ដើម្បីសាកសួរ។

នៅចំពោះមុខសមត្ថកិច្ចនគរបាល ឈ្មោះ ឈុំ រី ហៅឆក បានសារភាពថា ខ្លួនទិញគ្រឿងញៀន(ម៉ាទឹកកក)ចំនួន ១កញ្ចប់ធំ តម្លៃ២០០.០០០រៀល ពីមនុស្សប្រុសម្នាក់ មិនស្គាល់ឈ្មោះ នៅចំណុចវាលខ្សាច់ចាក់អង្រែលើ ខណ្ឌមានជ័យ រាជធានីភ្នំពេញ ក្នុងតម្លៃ ២០០.០០០រៀល ដើម្បីវេចខ្ចប់លក់បន្ដ ក្នុង១កញ្ចប់តម្លៃ ២០.០០០រៀល។
បច្ចុប្បន្នជនសង្ស័យបានបញ្ជូន ទៅអធិការដ្ឋាននគរបាលស្រុកស្អាង ដើម្បីបន្ដអនុវត្ដន៍តាមនីតិវិធី ៕