ឪពុកកំណាច ចាប់កូនបោកស្លាប់ ព្រោឈ្លោះជាមួយប្រពន្ធ
សៀមរាប ៖ សមត្ថកិច្ចនគរបាលមូលដ្ឋាន ស្រុកប្រាសាទបាគង បានឲ្យដឹងថា មានករណីហិង្សាក្នុងគ្រួសារ ឪពុកទុរយសចាប់កូនខ្លួនឯងបោកនឹងសសរផ្ទះបាយ បណ្ដាលឲ្យស្លាប់ ព្រោះឈ្លោះឈ្លោះគ្នាជាមួយប្រពន្ធ។ បន្ទាប់ពីធ្វើសកម្មភាពរួច ជនសង្ស័យជាឪពុកនេះបានរត់គេចខ្លួនបាត់ ខណៈសមត្ថកិច្ចកំពុងស្រាវជ្រាវចាប់យកមកផ្តន្ទាទោស។
ហេតុការណ៍នេះ កើតឡើងនៅវេលាម៉ោង០៧និង៣០នាទីយប់ ថ្ងៃទី២៧ ខែមិថុនា ឆ្នាំ២០១៩ ក្នុងភូមិតាប្រាក់ ឃុំមានជ័យ ស្រុកប្រាសាទបាគង។
អធិការនគរបាលស្រុកប្រាសាទបាគង លោកវរសេនីយ៍ឯក មិន ចន្ថា បានឲ្យដឹងថា កុមារនោះ មានឈ្មោះ ផាង ផល្លា អាយុ ១ខួប២ខែ និងម្តាយឈ្មោះ សោម សុខម អាយុ២៨ឆ្នាំ រស់នៅភូមិតាប្រាក់ ឃុំមានជ័យ ស្រុកប្រាសាទបាគង្គ ខេត្តសៀមរាប។ ចំណែកឯជនសង្ស័យជាឪពុក មានឈ្មោះផ្លាយ វិភាត់ ភេទប្រុស អាយុ៣១ឆ្នាំ។ កុមាររងគ្រោះដែលត្រូវឪពុកបង្កើតចាប់បោកនឹងសសរផ្ទះបាយបណ្តាលឲ្យសន្លប់បាត់ស្មារតី ក្រោយមកបានស្លាប់ ពេលយកទៅសង្គ្រោះបន្ទាន់នៅមន្ទីរពេទ្យ។
បើតាមសមត្ថកិច្ច ៖ នៅថ្ងៃទី២៧មិថុនា វេលាម៉ោង១៩និង២០នាទី ឈ្មោះ ផ្លាយ វិភាត់ ជាប្តី និងជាឪពុកបង្កើតរបស់កុមាររងគ្រោះ បានឈ្លោះប្រកែកគ្នាជាមួយប្រពន្ធ រឿងទិញបន្លែមិនល្អយកមកធ្វើម្ហូប ។ ឈ្លោះគ្នាមួយសន្ទុះក្រោយមក ពេលប្រពន្ធដើរទៅយកទឹក ប្តីក៏បានចាប់លើកកូន រួចយកទៅបោកនឹងសសរផ្ទះបាយបណ្តាលឲ្យកូនសន្លប់ ថែមទាំងយកកាំបិតប្រុងរកកាប់កូនទៀត។ បន្ទាប់ពីធ្វើសកម្មភាពរួច ជនសង្ស័យជាឪពុកនេះបានរត់គេចខ្លួនបាត់ភ្លាមៗតែម្តង។ សមត្ថកិច្ច កំពុងធ្វើការស្រាវជ្រាវ ដើម្បីស្វែងរកចាប់ខ្លួនជនសង្ស័យ និងកសាងសំណុំរឿងតាមនីតិវិធី៕
