គំរាមកំហែងថានឹងសម្លាប់ចាប់តៃកុងអេស្កាវ៉ាទ័រ បម្រុងអារក សមត្ថកិច្ចចាប់ខ្លួនជនដៃដល់

ខេត្តកណ្តាល៖ មិនដឹងរឿងអីសោះ បុរសម្នាក់ស្ទុះឡើងទៅលើអេស្កាវ៉ាទ័រ កំពុងកាយដី ចាប់តៃកុង បម្រុងអារក ដែលករណីគំរាមកំហែងថានឹងសម្លាប់ ដែលគួរឲ្យភ្ញាក់ផ្អើលនេះ កើតហេតុ នៅថ្ងៃ សុក្រ ០៤កើត ខែអាសាឍ ឆ្នាំ កុរ ឯកស័ក ព.ស ២៥៦៣ ត្រូវនឹងថ្ងៃទី ០៥ ខែកក្កដា ឆ្នាំ២០១៩ វេលាម៉ោង ១៧និង៣០នាទី នៅចំណុចចុងព្រែកឌុច ស្ថិតក្នុងភូមិព្រែកក្រាញ់ ឃុំព្រែកអំបិល ស្រុកស្អាង ខេត្តកណ្តាល ។

នគរបាលស្រុកស្អាង បានឲ្យដឹងថា ជនរងគ្រោះ៖ឈ្មោះ វុទ្ធី កុសល់ ភេទប្រុស អាយុ ១៧ឆ្នាំ ជនជាតិខ្មែរ មុខរបរកសិករ មានទីលំនៅភូមិកោះខែល ឃុំកោះខែល ស្រុកស្អាង ខេត្តកណ្តាល ។
ជនសង្ស័យ ឈ្មោះ ហាក់ វែង ភេទប្រុស អាយុ ៣៤ឆ្នាំ ជនជាតិខ្មែរ មុខរបរកសិករ មានទីលំនៅភូមិព្រែកក្រាញ់ ឃុំព្រែកអំបិលស្រុកស្អាង ខេត្តកណ្តាល (ឃាត់ខ្លួន) ។ វត្ថុតាងចាប់យក៖ កណ្តៀវដងឈើចំនួន០១។

សភាពរឿងហេតុ៖ នៅថ្ងៃ ខែ ឆ្នាំ កើតហេតុខាងលើជនរងគ្រោះកំពុងតែបើកអេស្កាវ៉ាទ័រកាយដី ភ្លាមនោះស្រាប់តែជនសង្ស័យ មានកាន់កណ្តៀវនៅដៃ បានស្ទះឡើងលើអេស្កាវ៉ាទ័រ ហើយចាប់ជនរងគ្រោះអារក ប៉ុន្តែត្រូវបានជនរងគ្រោះរើបម្រាស់រួចខ្លួន ហើយក៏រត់ទៅរកឲ្យគេជួយ ។
ក្រោយពីទទួលព័ត៌មានភ្លាមនោះកម្លាំងប៉ុស្តិ៍ព្រែកអំបិល បានចុះទៅកន្លែងកើតហេតុធ្វើការឃាត់ខ្លួនជនសង្ស័យ មកធ្វើការសាកសួរ និងចាត់ការតាមនីតិវិធី៕