អភិបាលព្រះសីហនុថ្មី ប្រកាសពីជំហរ របស់ខ្លួនថា នឹងប្រើវិធានការផ្លូវច្បាប់ ទៅលើជនទាំងឡាយណា ដែលរំលោភយកដីចំណីមាត់អូរ និងប្រឡាយ ធ្វើកម្មសិទ្ធិខុសច្បាប់
ព្រះសីហនុ ៖ ប្រព័ន្ធប្រឡាយអូរ សំខាន់ៗ មមួយចំនួនធំនៅក្រុងព្រះសីហនុត្រូវបានគេឃុបឃិតគ្នា ចាក់ដីលុប វាតទីយកធ្វើកម្មសិទ្ធិ ដោយខុស ច្បាប់ និង ប្រឡាយ អូរ ខ្លះ ត្រូវបាន គេសាងសង់ផ្ទះ រំលោកដី អូរ ត្រង់ៗ តែម្តង ជាហេតុធ្វើឲ្យប្រព័ន្ធអូរប្រឡាយទឹកទាំងនោះ រួមតូចចង្អៀត ទឹកភ្លៀងធ្លាក់ម្តងៗ ជន់លិចដោយសារទឹក ហូរមិនទាន់។ ទឹកជន់លិច ក្លាយជាបញ្ហាប្រឈម មកដល់សព្វថ្ងៃនេះ គឺដោយសារតែ ការអនុវត្តច្បាប់មានភាពធូររលុង កង្វះការទទួលខុសត្រូវ របស់ថ្នាក់ដឹកនាំខេត្ត ក៏ជាមន្ត្រីជំនាញពាក់ព័ន្ធ។
ប៉ុន្តែសម្រាប់ពេលនេះ លោក គួច ចំរើន អភិបាល នៃគណៈខេត្តព្រះសីហនុ ដែលទើបឡើងកាន់ តំណែងថ្មី ក្នុងពេលចុះ ពិនិត្យជាក់ស្តែង លើស្ថានទឹកជន់លិច លោកបានមានប្រសាសន៍ថា នាពេលខាងមុខ បញ្ហាទឹកភ្លៀងលិចផ្លូវ នឹងលែងមានទៀតហើយ សម្រាប់ក្រុងព្រះសីហនុ ដោយនៅ ចំពោះមុខ បញ្ហានេះ ក្រុមការងារថ្នាក់ជាតិចុះជួយខេត្តព្រះសីហនុ និងរដ្ឋបាលសាលាខេត្ត បាននិង កំពុងរកដំណោះស្រាយ ដោយកំណត់ថាប្រឡាយបង្ហូរទឹកភ្លៀង និងលូទឹកកខ្វក់ នឹងត្រូវតែស្តារ កាយយក សំរាម ដែលកក ស្ទះចេញ និងរៀបចំបោះបង្គោលព្រំប្រឡាយទៅតាមកម្រិតស្តង់ដាររបស់ប្រឡាយ ដើម្បីការពារទប់ស្កាត់ការ ទន្ទ្រាន និងរៀបចំប្រព័ន្ធលូខ្នែង ដើម្បីសម្រួលក្នុងការលំហូរទឹកកខ្វក់ ជៀសវាងការកកស្ទះជន់លិច។
បញ្ហានេះ លោក គួច ចំរើន ក៏បាន ប្រកាសពីជំហរ របស់ខ្លួនផងដែរថា នឹងប្រើវិធានការផ្លូវច្បាប់ ទៅលើជនទាំងឡាយណា ដែលរំលោភយកដីចំណីមាត់អូរ និងប្រឡាយ ធ្វើកម្មសិទ្ធិខុសច្បាប់។ ជាមួយគ្នានេះ លោក គួច ចំរើន ក៏សូមអំពាវនាវផងដែរទៅដល់ ប្រជាពលរដ្ឋ សូមឲ្យមានការចូលរួមទាំងអស់គ្នា ដើម្បីសម្រេច កិច្ច ការនេះ ប្រកបដោយភាពជោគជ័យ។
គួរបញ្ជាក់ផងដែរថា ប្រឡាយអូរ ដែលជាប្រឡាយមេក្នុងរំដោះ ទឹកភ្លៀងជនលិច ក្នុងក្រុងព្រះសីហនុ មានចំនួន១៣ខ្សែ ដោយប្រឡាយអូរនីមួយៗទាំងនោះ បើតាម មន្ត្រីជំនាញ បានធ្វើការអះអាងថា មានទំហំ ទទឹង មិនតូចជាង២០ម៉ែត្រ នោះទេ (គឺទំហំក្នុងប្លង់ប្រព័ន្ធ) ប៉ុន្តែបច្ចុប្បន្ន ប្រឡាយអូរ បង្ហូរទឹក ទាំងនោះ មួយ ចំនួន ខ្លះនៅសល់មិនដល់ទំហំ៣ម៉ែត្រ នោះទេ ដោយសារតែការឃុបឃិតគ្នា ចាក់ដីលុប វាតទីយកធ្វើកម្មសិទ្ធិ ដោយខុសច្បាប់ ជាក់ស្តែង ដូចជាប្រឡាយអូរ តំបន់ ស្រែ ត្រកួន តំបន់ អិលវី .តំបន់ក្រុមហ៊ុន លក់ផ្ទះល្វែង (BS) តំបន់ បឹងព្រៃកទប់ .តំបន់ម្លប់ តាប៉ាងជាដើម ដោយសារតែបញ្ហានេះហើយ ទើបឲ្យមានការជន់លិច ទីក្រុង ជាប្រចាំក្នុងពេលមានភ្លៀងធ្លាក់។
តែទោះបីយ៉ាងណាក៏ដោយ ប្រជាពលរដ្ឋ ក្រុងព្រះសីហនុ សង្ឃឹមថា លោក គួច ចំរើន អភិបាល ខេត្តព្រះសីហនុថ្មីនឹងមានចំណាត់ការរឿងនេះ បានជោគជ័យ ជាមួយនឹងការអនុវត្តច្បាប់លើការស្តារ ប្រឡាយ អូរ ឡើងវិញទៅតាមទំហំដើម របស់អូរ ដែលបាន កំណត់ ក្នុង ប្លង់ប្រព័ន្ធរួចជាស្រេច ដល់ពេលនោះ ទឹកលិច ដោយសារ ទឹក ភ្លៀងនោះ នឹងលែងមានទៀតហើយ ប៉ុន្តែក្នុងករណី អនុវត្តមិនបាន ទីក្រុងព្រះសីហនុ គឺចប់ហើយ គ្មានអ្វីដែល ត្រូវនិយាយទៀតទេ៕