រកឃើញ ផ្នែកខ្លះនៃកំណាត់ផ្លូវលេខ២១ សាងសង់មិនស្របតាមលក្ខណៈបច្ចេកទេស
ភ្នំពេញ៖ សាងសង់ផ្លូវមានគុណភាពល្អ រឹងមាំ គុណភាពជាប់បានយូរ ជាចក្ខុវិស័យរបស់ក្រសួងសាធារណការ និងដឹកជញ្ជូន នេះជាប្រសាសន៍របស់លោកទេសរដ្ឋមន្ត្រី ស៊ុន ចាន់ថុល ក្នុងដំណើរចុះពិនិត្យគុណភាពស្ថានភាពសាងសង់ផ្លូវជាតិលេខ២១។
នៅថ្ងៃសៅរិ៍ ៥កើត ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៦ ខែកក្កដា ឆ្នាំ២០១៩ លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ត្រីក្រសួងសាធារណការ និងដឹកជញ្ជូនបានអញ្ជើញជិះកង់ ចុះពិនិត្យមើលគុណភាពស្ថានភាពសាងសង់ផ្លូវជាតិលេខ២១ ចាប់ពីពហុកីឡដ្ឋានស្រុកកោះធំ រហូតដល់ភូមិជ្រៃធំ ឃុំសំពៅពូន (ព្រំប្រទល់ប្រទេសវៀតណាម) ស្ថិតក្នុងស្រុកកោះធំ ខេត្តកណ្ដាល ដោយមានការចូលរួមពីថ្នាក់ដឹកនាំក្រសួង អាជ្ញាធរដែនដី មន្ត្រីរាជការ អ្នកសារព័ត៌មាន និងប្រជាពលរដ្ឋផងដែរ។
ក្នុងដំណើរជិះកង់ចុះត្រួតពិនិត្យគុណភាពស្ថានភាពសាងសង់ផ្លូវជាតិលេខ២១ ក្រសួងបានរកឃើញថា៖ ផ្នែកខ្លះនៃកំណាត់ផ្លូវនេះសាងសង់មិនស្របតាមលក្ខណៈបច្ចេកទេស ដោយត្រង់ចំណុចដែលបានជួសជុលរួចមានស្នាមបែក ប្រេះ និងសម្បុកមាន់ជាច្រើនកន្លែង និងបានកំពុងទទួលរងការខូចខាតបណ្តើរៗ។
ថ្លែងនៅក្នុងឱកាសនោះ លោកទេសរដ្ឋមន្ត្រី បានគូសបញ្ជាក់ថា ក្រសួងសាធារណការ និងដឹកជញ្ជូន លែងទទួលយកផ្លូវធ្វើជាប់រហូតទៀតហើយ តែទទួលយកផ្លូវរឹងមាំ និងមានគុណភាពខ្ពស់តាមស្តង់ដារអន្តរជាតិ។ ទន្ទឹមនឹងនេះ លោកទេសរដ្ឋមន្ត្រី បានបញ្ជាក់ពីគោលជំហរ ក្នុងការពង្រឹងការគ្រប់គ្រងលើការសាងសង់ឲ្យបានម៉ឺងម៉ាត់ ដើម្បីធានាគុណភាពផ្លូវប្រើប្រាស់ជាប់បានយូរអង្វែង។
លោកទេសរដ្ឋមន្ត្រី បានណែនាំឱ្យក្រុមហ៊ុនសាងសង់ ក្រុមហ៊ុនទីប្រឹក្សាបច្ចេកទេស និងមន្ត្រីបច្ចេកទេស របស់ក្រសួង ត្រូវតែធ្វើការដោយផ្ដោតលើគុណភាពជាចម្បង ពោលគឺត្រូវតាមដានគុណភាពសាងសង់ តាំងពីចាប់ផ្ដើមបើកការដ្ឋានសាងសង់ រហូតដល់ការប្រគល់ទទួល។
លោកទេសរដ្ឋមន្ត្រី បានស្នើឱ្យមន្ត្រីក្រោមឱវាទទាំងអស់ និងក្រុមការងារបច្ចេកទេសសាងសង់ផ្លូវ ពិនិត្យឡើងវិញ នូវវិធានការ និងនីតិវិធីសាងសង់ឱ្យបានម៉ត់ចត់ ជាពិសេសគម្រោងសាងសង់ផ្លូវកំពុងអនុវត្តន៍នានា ធ្វើយ៉ាងណាឱ្យគុណភាពផ្លូវ មានភាពរឹងមាំ ប្រើប្រាស់ ជាប់បានយូរ ស្របតាមស្តង់ដារដែលអាចទទួលយកបាន។
លោកទេសរដ្ឋមន្ត្រីបានសង្កត់ធ្ងន់ថា៖ ក្រសួងសាធារណការ និងដឹកជញ្ជូន ក៏ដូចជា រាជរដ្ឋាភិបាលកម្ពុជា ប្រកាន់យកគោលការណ៍ ធ្វើផ្លូវឱ្យជាប់រឹងមាំ មិនមែនធ្វើផ្លូវជាប់រហូតទេ។
លោកទេសរដ្ឋមន្ត្រី ក៏បានសំណូមពរដល់ក្រុមហ៊ុនដឹកជញ្ជូន សូមចូលរួមគោរពច្បាប់ ធ្វើការត្រួតពិនិត្យលក្ខណៈបច្ចេកទេសយានយន្ត ឱ្យបានត្រឹមត្រូវ កុំដឹកទំនិញលើទម្ងន់កម្រិតកំណត់ និងត្រូវមានប័ណ្ណបើកបរតាមប្រភេទយានយន្ត សម្រាប់អ្នកបើកបរ។
ឆ្លៀតក្នុងឱកាសនោះផងដែរ លោកទេសរដ្ឋមន្ត្រី បានជំរុញឱ្យមន្ត្រីក្រសួងទាំងអស់ ក៏ដូចជាប្រជាពលរដ្ឋ ទាញយកកម្មវិធីថែទាំផ្លូវ ROAD CARE Mobile App ដើម្បីប្រើប្រាស់ក្នុងការរាយការណ៍ផ្លូវជង្ហុកសម្បុកមាន់ និងផ្លូវខូច និងបានណែនាំឱ្យប្រធានមន្ទីរទាំង២៥រាជធានី-ខេត្តទាំងអស់ ទទួលខុសត្រូវចំពោះបណ្តាញផ្លូវថ្នល់ ដែលស្ថិតនៅក្នុងដែនសមត្ថកិច្ចរបស់ខ្លួន មិនថាផ្លូវនោះជាផ្លូវរបស់ក្រុមហ៊ុន ឬស្ថាប័ន ណាជាអ្នកសាងសង់ទេ៕
