នគរបាលច្បារអំពៅ ឃាត់ខ្លួនជនសង្ស័យ ២នាក់ ពីបទឆក់ទូរស័ព្ទ

ភ្នំពេញ ៖ ជនសង្ស័យជាចោរឆក់ទូរស័ព្ទ ២នាក់ ត្រូវនគរបាលប៉ុស្តិ៍ព្រែកប្រា ឃាត់ខ្លួនខណៈឆក់ទូរស័ព្ទហើយជិះគេចខ្លួនទៅបុកម៉ូតូអ្នកដំណើរបណ្តាលអោយដួល នៅមុខផ្ទះគ្មានលេខ ផ្លូវ៣៦៩ ភូមិជ្រោយបាសាក់ សង្កាត់ព្រែកប្រា ខណ្ឌច្បារអំពៅ កាលពីម៉ោង២២និង៣០នាទី ថ្ងៃទី០៨ ខែកក្កដា ឆ្នាំ២០១៩។

លោក ម៉ៅ សឿត អធិការរងខណ្ឌច្បារអំពៅ បានអោយដឹងថា ជនសង្ស័យដែលឃាត់ខ្លួន០២នាក់ ទី១-ឈ្មោះវៀទ វាសនា ភេទ ប្រុស អាយុ២០ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅភូមិជ្រោយបាសាក់ សង្កាត់ព្រែកប្រា ខណ្ឌច្បារអំពៅ។ ទី២-ឈ្មោះខុម រាជ ភេទប្រុស អាយុ១៩ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅភូមិព្រះពន្លា សង្កាត់ព្រែកប្រា ខណ្ឌច្បារអំពៅ។

ចំណែកជនរងគ្រោះឈ្មោះ Lyu GuoNing ភេទ ប្រុស អាយុ៥០ឆ្នាំ ជនជាតិចិន មុខរបរ បុគ្គលិករោងចក្រយីវ៉ូ ស្នាក់នៅភូមិអូរអណ្តូង សង្កាត់ព្រែកប្រា ខណ្ឌច្បារអំពៅ(កាន់លិខិតឆ្លងដែនលេខ E69430084)។

លោកអធិការរងបន្តថា មុនពេលកើតហេតុជនរងគ្រោះ ឈរនិយាយទូរសព្ទ័នៅចំណុចកើតហេតុ ស្រាប់តែមានជនសង្ស័យ០២នាក់ខាងលើ ជិះម៉ូតូ១គ្រឿង ពណ៍ខ្មៅ ម៉ាកC110ប្រើប៊ិច ពាក់ស្លាកលេខ កណ្តាល1S 3256 មកជិតជនរងគ្រោះ រួចឆក់ទូរសព្ទ័ដៃជនរងគ្រោះម៉ាកHua wei ពណ៍ខ្មៅ ជិះគេចខ្លួនទៅបុក ជាមួយម៉ូតូអ្នកធ្វើដំណើរបណ្តាលឲ្យដួល ពេលនោះក៏មានសមត្ថកិច្ចយើងល្បាតក្បែរនោះ ឃាត់ខ្លួនជនសង្ស័យទាំង២នាក់ រួមនិងវត្ថុតាង បញ្ចូនមកអធិការដ្ឋាននគរបាលខណ្ឌច្បារអំពៅ ចាត់ការតាមច្បាប់៕