រដ្ឋមន្រ្តីក្រសួងសាធារណការ ចេញ សេចក្តីប្រកាសសម្រេចសម្រួល ភារកិច្ចលោក ណុប ហេង ចេញពីប្រធានមន្ទីរសាធារណការខេត្តព្រះសីហនុ ដាក់ជំនួស ដោយលោក បូរី វង្សសានិត្យ

ភ្នំពេញ៖ រដ្ឋមន្រ្តីក្រសួងសាធារណការ និងដឹកជញ្ជូន លោក ស៊ុន ចាន់ថុល នៅថ្ងៃទី១៦ ខែកក្កដា ឆ្នាំ២០១៩នេះ បានចេញសេចក្តីប្រកាសសម្រេចសម្រួល ភារកិច្ចលោក ណុប ហេង ចេញពីប្រធានមន្ទីរសាធារណការ និងដឹកជញ្ជូន ខេត្តព្រះសីហនុ ឲ្យទៅបម្រើការនៅទីស្តីការក្រសួងនិងបានសម្រេចដាក់លោក បូរី វង្សសានិត្យ ជាប្រធានមន្ទីរជំនួសវិញ។

នេះបើយោងតាមតាមសេចក្តីប្រកាស ដែលក្នុងសេចក្តីប្រកាសនេះបានបញ្ជាក់ថា ប្រការ១៖ ផ្ទេរសម្រួលភារកិច្ចលោក ណុប ហេង ក្របខណ្ឌ ក.១.៥ ពីប្រធានមន្ទីរសាធារណការ និងដឹកជញ្ជូន ខេត្តព្រះសីហនុ​ ឲ្យមកបម្រើការនៅទីស្តីការក្រសួងសាធារណការ និងដឹកជញ្ជូន​ដើម្បីទទួលភារកិច្ចថ្មី។  ប្រការ២៖ ផ្ទេរសម្រួលភារកិច្ចលោក បូរី វង្សសានិត្យ ក្របខណ្ឌ ក.៣.១ ពីអនុប្រធាននាយកដ្ឋានហេដ្ឋារចនាសម្ព័ន្ធសាធារណៈ នៃអគ្គនាយកដ្ឋានបច្ចេកទេស មកជាប្រធានមន្ទីរសាធារណការ និងដឹកជញ្ជូន ខេត្តព្រះសីហនុ៕