នាយឧត្តមសេនីយ៍ សៅ សុខា ដាក់បទបញ្ជាដកគ្រវាត់ចោលលើមន្ដ្រីអាវុធហត្ថទាំងឡាយណា ទោះមានបុណ្យស័ក្ដិខ្ពស់ប៉ុណ្ណា បើ សិនរកឃើញនៅជាប់ពាក់ព័ន្ធបទល្មើសជាមួយក្រុមឈ្មួញឈើ
ភ្នំពេញ៖ លោកនាយឧត្តមសេនីយ៍ សៅ សុខា បានប្រកាសដាក់ជីវិតរបស់ខ្លួនជាមួយនឹងប្រតិបត្តិការបង្ក្រាបបទល្មើសព្រៃឈើ នៅក្នុងប្រទេសនាដំណាក់កាលចុងក្រោយនេះ ឲ្យខាងតែបាន ដើម្បីទុកជូនក្មេងជំនាន់ក្រោយ និងបានដាក់បទបញ្ជាដកគ្រវាត់ចោលលើមន្ដ្រីអាវុធហត្ថទាំងឡាយណា ទោះមានបុណ្យស័ក្ដិខ្ពស់ប៉ុណ្ណា បើ សិនរកឃើញនៅជាប់ពាក់ព័ន្ធបទល្មើសជាមួយក្រុមឈ្មួញឈើ។
ព្រឹកថ្ងៃសុក្រ ទី១៩ ខែកក្កដា ឆ្នាំ២០១៩ នៅបញ្ជាការដ្ឋាន កងរាជអាវុធហត្ថលើផ្ទៃប្រទេស លោក នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិ ដើម្បីទប់ស្កាត់និងបង្ក្រាបបទល្មើសធនធានធម្មជាតិ បានដឹកនាំកិច្ចប្រជុំគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ ត្រួតពិនិត្យការអនុវត្តបទបញ្ជារបស់រាជរដ្ឋាភិបាល។
លោកនាយឧត្តមសេនីយ៍ សៅ សុខា ក៏បានបញ្ជាឲ្យសមាជិក និងមន្ដ្រីទាំងអស់នៅក្នុងគណៈកម្មការជាតិរបស់ខ្លួនកត់ ឈ្មោះ អ្នកដែលយក ឈ្មោះថ្នាក់ដឹកនាំរបស់ជាតិទៅបន្លាចសមត្ថកិច្ចដើម្បីប្រព្រឹត្តបទល្មើសព្រៃឈើ ដើម្បីមានវិធានការតាមផ្លូវច្បាប់ និងបញ្ជាឲ្យសមត្ថកិច្ចតាមចាប់ខ្លួនបុគ្គលទាំងឡាយណា បូករួមទាំងជន បរទេស ដែលបានជះលុយឲ្យមកកាប់ឈើនៅលើទឹកដីខ្មែរ
ដែលជាប់ពាក់ព័ន្ធ បើទោះបីលាក់ខ្លួននៅក្នុងប្រទេស ឬគេចទៅកាន់បរទេសក៏ដោយ។ លោក នាយឧត្តមសេនីយ៍ សៅ សុខា បានមានប្រសាសន៍ថា សរុបសេចក្ដីមកត្រឹម ការពារដាច់ក្បាលចោល ខុសប្រឆាំងដាច់ខាតកាត់ក្បាលក្រវាត់ចោលអស់ អាយុជីវិតក៏ធ្វើដែរ ដើម្បីព្រៃឈើនៅសេសសល់តាមបទបញ្ជារបស់រាជរដ្ឋាភិបាល គឺមានតម្លៃ ហើយសូមគ្រប់ខេត្តទាំងអស់ ធ្វើការផ្សព្វផ្សាយការងារនេះឲ្យបានច្បាស់។ អាវុធហត្ថណាដែលប្រើឲ្យទៅធ្វើការងារ បែរជាឆ្លៀតឱកាសទៅសមគំនិតជាមួយគេយកលុយ ខ្ញុំរកឃើញគឺមុនគេបំផុតអនុវត្តន៍វិន័យទូទៅច្បាប់ នៃកងយោធពលខេមរភូមិន្ទ បើជាបទល្មើសត្រូវបញ្ជូនទៅតុលាការ ហើយរហូតមក ដល់ម៉ោងនេះ គ្មានទេពាក្យថា ខ្លាចនិងគ្មានទេពាក្យថាចាញ់ ដែលពាក្យទាំងពីរម៉ាត់នេះ មិនត្រូវយកមកប្រើទៀតនោះឡើយ។ ជាមួយគ្នានេះ លោក នាយឧត្តមសេនីយ៍ សៅ សុខា ក៏បានផ្ញើសារជូនមន្រ្តីទាំងអស់ថា បើស្ទាក់ស្ទើរក្នុងភារកិច្ចនេះ សូមសរសេរលិខិតមកដើម្បីឲ្យលោកស្នើសុំទៅប្រមុខនៃរាជរដ្ឋាភិបាល សម្ដេចតេជោ ហ៊ុន សែន និងសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្រ្តីក្រសួងការពារជាតិ ដើម្បីសុំបញ្ឈប់តំណែង។ សូមបញ្ជាក់ថា គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ កំពុងធ្វើប្រតិបត្តិការយ៉ាងក្តៅគគុក ក្នុងការបង្ក្រាបបទល្មើសព្រៃឈើនៅទូទាំងប្រទេសកម្ពុជា។ ប្រតិបត្តិការលើកនេះ ត្រូវបានមន្ត្រីបញ្ជាក់ថា គ្មានការបន្ធូរបន្ថយ ឬយោគយល់ទៀតនោះឡើយ អ្នកប្រព្រឹត្តបទល្មើសទោះអ្នកតូច អ្នកធំ អ្នកមានលុយ មានឥទ្ធិពល គឺត្រូវបង្ក្រាបទាំងអស់៕
