ប្រធានកាកបាទក្រហមកម្ពុជា បានផ្តល់អនុសាសន៍ណែនាំ ឱ្យយុវជនទាំងអស់ត្រូវបង្កើនសកម្មភាព មិត្តអប់រំមិត្ត និងមិត្តចេះជួយមិត្ត
ភ្នំពេញ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានមានប្រសាសន៍ថា ត្រូវរួមគ្នាបន្តពង្រឹង និងពង្រីកកម្លាំងយុវជនកាកបាទក្រហមកម្ពុជា តាមលទ្ធភាពជាក់ស្តែងរបស់សាខានីមួយៗ តាមរយៈការពង្រឹងសមត្ថភាពយុវជន ការផ្តល់ឱកាសស្វ័យភាព ការគ្រប់គ្រងសកម្មភាពការងារបណ្តុះបណ្តាលមុខជំនាញ ដើម្បីចូលរួមសកម្មភាពត្រៀមបង្ការទៅនឹងគ្រោះមហន្តរាយ ។
នៅព្រឹកថ្ងៃសៅរ៍ទី២០ ខែកក្កដា ឆ្នាំ២០១៩នេះ នៅមជ្ឈមណ្ឌលកោះពេជ្រ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានអញ្ជើញជាអធិបតីក្នុងពិធីបូកសរុបលទ្ធផលការងារកាកបាទក្រហមកម្ពុជាសាខា រាជធានីភ្នំពេញ និងបំពាក់កន្សែង ជូនដល់យុវជនកាកបាទក្រហមកម្ពុជា។
លោកឃួង ស្រេង អភិបាលរាជធានីភ្នំពេញ បានឱ្យដឹងថា ក្នុងឆ្នាំកន្លងទៅនេះ យុវជនកាកបាទក្រហមកម្ពុជាសាខា រាជធានីភ្នំពេញ នៃគ្រឹះស្ថានសិក្សាទាំង២៧ បានធ្វើយុទ្ធនាការអប់រំផ្សព្វផ្សាយ ស្តីពីសុវត្ថិភាពចរាចរណ៍ ចូលរួមផ្តល់ការបណ្តុះបណ្តាលជំនាញសង្គ្រោះបឋម ជួយសង្គ្រោះសិស្សានុសិស្ស និងប្រជាពលរដ្ឋ និងចូលរួមធ្វើយុទ្ធនាការ បំផុសឱ្យមានការបរិច្ចាគឈាម ជាដើម។
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានផ្តល់អនុសាសន៍ណែនាំ ឱ្យយុវជនទាំងអស់ត្រូវបង្កើនសកម្មភាព មិត្តអប់រំមិត្ត និងមិត្តចេះជួយមិត្ត។
ក្នុងពិធីបូកសរុបសមិទ្ធផលការងារយុវជនកាកបាទក្រហមកម្ពុជា សាខារាជធានីភ្នំពេញឆ្នាំ២០១៨-២០១៩ និងទិសដៅអនុវត្តន៍បន្ត និងបំពាក់កន្សែង យុវជនកាកបាទក្រហមកម្ពុជា ចំនួន ៣.៨០០ពាន់នាក់មកពីបណ្តាវិទ្យាល័យ និងគ្រឹះស្ថានឧត្តមសិក្សានានា ក្នុងរាជធានីភ្នំពេញ។
សម្តេចកិត្តិព្រឹទ្ធបណ្ឌិត បានអញ្ជើញមានប្រសាសន៍បន្តថា៖ ទោះបីរយ:ពេលកន្លងមក ពុំទាន់មានឯកសណ្ឋានត្រឹមត្រូវជាផ្លូវការសម្រាប់សម្គាល់អត្តសញ្ញាណជាយុវជនកាកបាទក្រហមកម្ពុជាក៏ដោយ ក៏ក្មួយៗ បានចូលរួមចំណែកយ៉ាងសកម្ម ដើម្បីសម្រេចបាននូវយុទ្ធសាស្ត្រ២០១១-២០២០ របស់កាកបាទក្រហមកម្ពុជា ស្របតាមវិស័យស្នូលទាំង៧ រួមមាន៖
១-ត្រូវរួមគ្នាបន្តពង្រឹង និងពង្រីកកម្លាំងយុវជនកាកបាទក្រហមកម្ពុជា តាមលទ្ធភាពជាក់ស្តែងរបស់សាខានីមួយៗ តាមរយៈការពង្រឹងសមត្ថភាពយុវជន ការផ្តល់ឱកាសស្វ័យភាព ការគ្រប់គ្រងសកម្មភាពការងារបណ្តុះបណ្តាលមុខជំនាញ ដើម្បីចូលរួមសកម្មភាពត្រៀមបង្ការទៅនឹងគ្រោះមហន្តរាយ ការផ្សព្វផ្សាយច្បាប់ស្តីពីចរាចរណ៍ផ្លូវគោក ការបរិច្ចាគឈាម ការសម្អាតបរិស្ថាន និងការដាំដើមឈើឱ្យបានច្រើន ដើម្បីបង្កើតបរិស្ថានឱ្យបានកាន់តែល្អប្រសើរ សម្រាប់សង្គមជាតិ
២-ត្រូវរួមគ្នាបន្តពង្រឹងសកម្មភាព មិត្តអប់រំមិត្ត មិត្តជួយមិត្ត នៅគ្រប់ក្លិបយុវជនកាកបាទក្រហមកម្ពុជា តាមរយ:ការជួយឧបត្ថម្ភគាំទ្រដល់សិស្ស-និស្សិត ដែលមានជីវភាពលំបាកក្នុងការសិក្សា និង ការរស់នៅប្រចាំថ្ងៃ នៅតាមសាលា និង សាកលវិទ្យាល័យ ប្រកបដោយប្រសិទ្ធភាព ត្រូវរួមចំណែកផ្តល់ចំណេះដឹង ស្តីពី វិជ្ជាសង្គ្រោះបឋម ការថែទាំអនាម័យ និង សុខភាព ការការពារជំងឺឆ្លង ជំងឺមិនឆ្លងក្នុងសហគមន៍ ត្រូវជួយផ្សព្វផ្សាយអប់រំសុខភាពក្នុងគ្រាអាសន្ន នៅតាមសាខាទាំង២៥ រាជធានី-ខេត្ត
៣-ត្រូវរួមគ្នាបន្តពង្រឹងយន្តការគ្រប់គ្រងយុវជនកាកបាទក្រហមកម្ពុជា ដែលមានស្រាប់តាមរយ:ការផ្តល់ប័ណ្ណសម្គាល់ខ្លួនដល់យុវជន និង ការពង្រឹងកិច្ចសហប្រតិបត្តិការថ្នាក់ជាតិ និង អន្តរជាតិ តាមរយ:ការធ្វើទស្សនកិច្ចសិក្សា ផ្លាស់ប្តូរបទពិសោធន៍ សិក្ខាសាលា វេទិកាយុវជន និង វគ្គបណ្តុះបណ្តាលនានា ដើម្បីធានាសុខដុមនីយកម្ម និង រឹតចំណងមិត្តភាព សាមគ្គីភាព ក្នុងចំណោមយុវជនទាំងក្នុងក្របខ័ណ្ឌជាតិ តំបន់ និង អន្តរជាតិ
៤-ត្រូវបន្តឱ្យមានវគ្គបណ្តុះបណ្តាលជាបន្តបន្ទាប់ដល់យុវជន រួមទាំងការបន្តផ្សព្វផ្សាយនូវសេចក្តីណែនាំនានា របស់កាកបាទក្រហមកម្ពុជា ឱ្យបានប្រកបដោយប្រសិទ្ធភាព និង ទូលំទូលាយ ដើម្បីងាយស្រួលក្នុងការបំពេញសកម្មភាពមនុស្សធម៌ នៅគ្រប់មជ្ឈដ្ឋានទូទាំងប្រទេស
៥-ត្រូវបន្តបង្កើនការយកចិត្តទុកដាក់ខ្ពស់ថែមទៀត ជាពិសេសការលើកទឹកចិត្តយុវជនឱ្យចូលរួមជាកម្លាំងស្ម័គ្រចិត្ត ដើម្បីធានាបាននូវវឌ្ឍនភាព និងចីរភាពនៃកម្លាំងមនុស្សធម៌វ័យក្មេង សម្រាប់បន្តវេនក្នុងសកម្មភាពជួយសហគមន៍ នៅគ្រប់រាជធានី-ខេត្ត
៦-ត្រូវបន្តពង្រឹងសាមគ្គីភាព មិត្តភាព និងការចេះជួយគ្នាទៅវិញទៅមក ជាមួយអង្គការយុវជននានា និងបណ្តាញយុវជននៅគ្រប់ជំនាន់ ដោយមិនត្រូវមើលស្រាលអ្នកដទៃ និងការបែងចែកប្រកាន់បក្ខពួក ដែលអាចធ្វើឱ្យបែកបាក់សាមគ្គីភាព នៅក្នុងចំណោមយុវជនកាកបាទក្រហមកម្ពុជា
៧-យុវជនកាកបាទក្រហមកម្ពុជាទាំងអស់ត្រូវមានស្មារតីទទួលខុសត្រូវខ្ពស់ នៅពេលបំពេញភារកិច្ចរបស់ខ្លួន ក្មួយៗត្រូវផ្សារភ្ជាប់ចំណេះវិជ្ជារបស់ក្មួយៗ ដែលមានស្រាប់ទៅនឹងការអនុវត្ត និង ការសិក្សាជំនាញថ្មីៗ ដែលទើបទទួលបាន ដើម្បីក្មួយៗអាចជួយដល់ជនរងគ្រោះ និងជនងាយរងគ្រោះ នៅក្នុងសហគមន៍ បានទាន់ពេលវេលា និង ប្រកបដោយប្រសិទ្ធភាព។
សម្ដេចកិត្តិព្រឹទ្ធបណ្ឌិត មានប្រសាសន៍ដែរថា ក្មួយៗយុវជនកាកបាទក្រហមកម្ពុជា បាននិងកំពុងបំពេញការងារយ៉ាងសកម្មជាមួយអង្គការ យុវជននានារួមមាន៖
សហភាពសហព័ន្ធយុវជនកម្ពុជា កាយរិទ្ធជាតិកម្ពុជា ដែលសុទ្ធសឹងជាកម្លាំងស្នូល និងជាសេនាធិការរបស់រាជរដ្ឋាភិបាល ដើម្បីរួមចំណែកក្នុងការងារសង្គម និងការងារមនុស្សធម៌ នៅគ្រប់រាជធានី-ខេត្ត និងទីជនបទដាច់ស្រយាលនៅទូទាំងប្រទេស។
យុវជនគឺជាភ្នាក់ងារនៃការផ្លាស់ប្ដូរឥរិយាបថជាវិជ្ជមាន នៅក្នុងសង្គម ដូច្នេះយុវជនត្រូវចូលរួមឱ្យកាន់តែទូលំទូលាយ និងធ្វើសកម្មភាពកាន់តែប្រសើរឡើង ប្រកបដោយប្រសិទ្ធភាពក្នុងការផ្ដល់សេវាមនុស្សធម៌ ជួយដល់ជនរងគ្រោះ និងងាយរងគ្រោះ ឱ្យបានទាន់ពេលវេលា នៅគ្រប់មជ្ឈដ្ឋានទូទាំងប្រទេសកម្ពុជា៕
