សូត្រ ខេវិន និង ចិត្រ សុភីកក់កៅអីនៅជុំទី២
ភ្នំពេញ:ព្រឹត្តិការណ៍TV5 Boxing Knock-Out Serie by K-Cement នាយប់ថ្ងៃទី២០កក្កដាអ្នកប្រដាល់សូត្រ ខេវិនក្លិបបក្សីស្លាបដែកប្រកួតឈ្នះថន ភឿតក្លិបឃ្លាំងមឿងកីឡាដោយពិន្ទុ ។
ខេវិនមានប្រៀបលើគូប្រកួតខាងកំពស់ជាហេតុធ្វើឲ្យថន ភឿតលំបាកនឹងរកឱកាសដើម្បីវាយលុក ។ តែទោះជាយ៉ាងណាកៅអីសម្រាប់ប្រកួតនៅជុំទី២បានធ្លាក់មកក្នុងកណ្ដាប់ដៃសូត្រ ខេវិន ចំពោះថន ភឿតខ្ទាតចេញពីការប្រកួតតែត្រឹមនេះហើយ ។
សូមបញ្ចាក់ថាការប្រកួតរវាងអ្នកប្រដាល់ទាំង២រូបនេះមានលក្ខណៈតឹងតែងខ្លាំងណាស់ព្រោះការវាយប្រហារជើងក្រោមរបស់ថន ភឿត និងកណ្ដាប់ដៃរបស់គេធ្វើឲ្យខេវិនវេទនាមិនតិចឡើយ ។
ប្រកួតក្នុងព្រឹត្តិការណ៍នេះដែរអ្នកប្រដាល់លីន សុខចាន់ទីក្លិបបញ្ជាការដ្ឋានកងទ័ពជើងទឹកប្រកួតជាមួយអ្នកប្រដាល់ចិត្រ សុភីក្លិបរស្មីភូមិគាបខេត្តបន្ទាយមានជ័យ ។
សម្រាប់ការប្រកួតនហសុភីមានប្រៀបលើចាន់ទីតាំងពីដើមទឹកទី១មកម្ល៉េះ ។ ការវ៉ៃចេញរបស់ចាន់ទីច្រើនតែមិនសូវចំគោលដៅបានល្អដូចសុភីឡើយ ។ការប្រកួតដែលមានតែ៣ទឹកនោះសុភីមានប្រៀបលើចាន់ទីពេញទាំង៣ទឹកតែម្ដង ។
លីន សុខចាន់ទីខ្តាតចេញពីការប្រកួតតែត្រឹមនេះ រីឯចិត្រ សុភីដែលមិនសូវមាននរណាស្គាល់នោះកក់កៅអីជុំទី២រួចទៅហើយ ។
ចំពោះការប្រកួតជាមិត្តភាពកម្ពុជាថៃវិញនោះអ្នកប្រដាល់កម្ពុជាឡៅ ចិត្រាក្លិបទ័ពឆ័ត្រយោង៩១១បានប្រើកែងផ្ដួលអ្នកប្រដាល់ថៃផេត ថង(Phat Thong)ឲ្យដួលសន្លប់មុនស្នូរជួងបញ្ចប់ទឹកទី២ ។
ចំពោះការប្រកួតក្រៅព្រឹត្តិការណ៍ពានរង្វាន់វិញនោះអ្នកប្រដាល់ឌុន រ៉ៃយ៉ាក្លិបអេភូថងកីឡាដែលធ្លាប់ប្រកួតចាញ់អ្នកប្រដាល់ឡុង ពិសិដ្ឋក្លិបខ្លារខិនមានរិទ្ធនោះការជួបប្រកួតជាលើកទី៣ឡុង ពិសិដ្ឋបន្តឈ្នះម្ដងទៀត ។
ការប្រកួត២ទឹកដំបូងរ៉ៃយ៉ាហាក់ដូចជាមានប្រៀបខ្លាំងលើគូប្រកួតពិសេសកណ្ដាប់ដៃរបស់គេបញ្ចេញបានចំគោលដៅបានយ៉ាងល្អ ។ តែចាប់ពីទឹកទី៣ទៅរ៉ៃយ៉ាហាក់ដូចជាការពារច្រើនជាងវ៉ៃចេញមិនតែប៉ុណ្ណោះគេដកថយច្រើនជាងវាយសម្រុកឯពិសិដ្ឋគេសម្រុកចូលនិងវ៉ៃចំគោលដៅបានយ៉ាងល្អ ។
ពួកគេប្រកួតគ្នា៥ទឹកពេញហើយលទ្ធផលចុងក្រោយឌុន រ៉ៃយ៉ាចាញ់ពិន្ទុឡុង ពិសិដ្ឋ ។ សូមបញ្ជាក់ថានេះជាលើកទី៣ហើយដែលឌុន រ៉ៃយ៉ាចាញ់ពិន្ទុឡុង ពិសិដ្ឋ ។
