ចាន់ សំអាតទ្រហោរយំបន្ទាប់ចាញ់ នៅវគ្គពាក់កណ្ដាលផ្ដាច់ព្រ័ត្រ

​ភ្នំពេញ:អ្នកប្រដាល់កម្ពុជាចាន់ សំអាតក្លិបអប់រំកាយស្រុកអន្លង់វែងបានស្រែកទ្រហោរយំបន្ទាប់ពីប្រកួតចាញ់អ្នកប្រដាល់ថៃផេត ង៉ាម(Phat Ngam)ដោយពិន្ទុក្នុងការប្រកួតវគ្គពាក់កណ្ដាលផ្ដាច់ព្រ័ត្រនារសៀលថ្ងៃទី២០ កក្កដាក្នុងវគ្គពាក់កណ្ដាលផ្ដាច់ព្រ័ត្រខែក្រវាត់ខារ៉ាបាវទម្ងន់៦០គីឡូក្រាមលើសង្វៀនអាស៊ីអាគ្នេយ៍ ។

​ដោយស្ថិតនៅបង្គោលក្រហមនោះអ្នកគាំទ្រសំអាតមកស្រែកទ្រហោរគាំទ្រជាច្រើននាក់ ។ សំអាតបានព្យាយាមលេងកែង និងវាយប្រហារជើងក្រោមផេត ង៉ាមតែជង្គង់របស់ផេត ង៉ាមបានធ្វើឲ្យសំអាតស្ទើរតែគាំងម្ដងៗ ។ តែជើងរបស់ផេត ង៉ាម ក៏ស្ទើរតែមានបញ្ហាដែរ ។

​អ្នកប្រដាល់ទាំង២រូបនេះប្រកួតគ្នា៥ទឹកពេញ ។ មុនពេលប្រកាសលទ្ធផលពួកគេបានបង្ហាញពីជំនឿចិត្តថា ខ្លួនបានទទួលជ័យជំនះរៀងៗខ្លួន ។តែលទ្ធផលចុងក្រោយផេត ង៉ាមបានទទួលជ័យជំនះលើសំអាតដោយមិនឯកច្ឆន្ទ ទោះបីមិនឯកច្ឆន្ទក៏ដោយតែក្នុងចំណោមចៅក្រម៥រូបមាន៤រូបហើយដែលផ្ដល់ពិន្ទុឲ្យផេត ង៉ាមឈ្នះ ។

​ប្រកួតនៅវគ្គពាក់កណ្ដាលផ្ដាច់ព្រ័ត្រនេះដែរសុខ សាវិនក្លិបឆ្មា ស សែនសុខបានផ្ដួលអ្នកប្រដាល់ដៃដែន សាយ៉ាមឲ្យសន្លប់នៅចុងទឹកទី១ដោយទាត់មួយជើងយ៉ាងធ្ងន់ចំពោះធ្វើឲ្យអ្នកប្រដាល់ថៃរូបនេះ សន្លប់ក្រោកលែងរួចតែម្ដង ។

​សុខ សាវិន និង ផេត ង៉ាមត្រៀមខ្លួនជួបគ្នានៅវគ្គផ្ដាច់ព្រ័ត្រដើម្បីប្រជេងយកខ្សេក្រវាត់ដែលមានរង្វាន់អម ៤.០០០ដុល្លារ ។ចំពោះចាន់ សំអាត និង ដែន សាយ៉ាមប្រកួតគ្នាដណ្ដើមចំណាត់ថ្នាក់លេខ ៣ ។