ស្រូវរដូវវស្សានៅខេត្តបន្ទាយមានជ័យ ជាង២ម៉ឺនហិកតា កំពុងរងផលប៉ះពាល់ដោយសារគ្រោះរាំងស្ងួត ខណៈរដូវវស្សាមិនអំ ណោយ ផលឆ្នាំនេះ
បន្ទាយមានជ័យ ៖ មន្ត្រីជំនាញកសិកម្ម និងអាជ្ញាធរដែនដី បបានឲ្យដឹងនៅថ្ងៃ២៧ កក្កដានេះថា៖ បើទឹកភ្លៀង ប្រមាណមួយ ឬពីរសប្តាហ៍ទៀត នៅតែគ្មាន ភ្លៀងធ្លាក់ទេ ផលប៉ះពាល់ និងខូចខាតដំណាំស្រូវ នៅក្នុងស្រុកក្រុងចំនួន៧លើ៩ នៃខេត្តបន្ទាយមានជ័យ នឹងកើនឡើងទៀត ខណៈពេលនេះ ដំណាំ ស្រូវ និងរងផលប៉ះពាលជាង២ម៉ឺន៥ពាន់ហិកតាហើយ។
លោក ប៉ាង វណ្ណាសេដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ បានឲ្យដឹងថា កាលពីពេលកន្លងមក មានភ្លៀងធ្លាក់តិចតួច និងដល់កន្លែង ដែលមកដល់ពេលនេះ ផលប៉ះពាល់ ដំណាំស្រូវ បានកើនឡើងរហូតដល់ចំនួនជាង២ម៉ឺន៥ពាន់ហិកតា នៃផ្ទៃដីដែលបានដាំដុះសរុបចំនួន ចំនួនជាង២៤ម៉ឺន៣ពាន់ហិកតា។
លោកបានធ្វើការសន្និដ្ឋានថា ប្រសិនបើមិនមានភ្លៀងធ្លាក់ ក្នុងរយៈពេលពី៧ទៅ ១០ថ្ងៃទៀត ដំណាំស្រូវ ដែលរងផលប៉ះពាល់ទាំងនេះ នឹងខូចខាតជាបណ្ដើរៗ។ រីឯការរងផលប៉ះពាល់ ក៏នឹងកើនឡើង ជាបន្តទៅទៀត។ របាយការណ៍មន្ទីរកសិកម្មខេត្តបន្ទាយមានជ័យ បានឱ្យដឹងថា គ្រោះរាំងស្ងួតលើដំណាំស្រូវរដូវ វស្សា ឆ្នាំ២០១៩–២០ គីតត្រឹមថ្ងៃទី២៣ ខែកក្កដានេះ ក្នុងចំណោមផ្ទៃដីស្រូវ ដែលអនុវត្តបាន និងរងប៉ះ ពាល់ គឺមាននៅក្នុងស្រុកមង្គលបូរី ច្រើនជាងគេ បន្ទាប់មកស្រុកអូរជ្រៅ ស្រុកព្រះនេត្រព្រះ ស្រុកថ្មពួក ស្វាយចេក ក្រុងប៉ោយប៉ែត និងក្រុងសិរីសោភ័ណ។ ស្រុកដែលពុំមានផលប៉ះពាល់ គឺស្រុកភ្នំស្រុក និង ស្រុកម៉ាឡៃ។
លោក អ៊ុំ រាត្រី អភិបាលខេត្តបន្ទាយមានជ័យ បានឱ្យដឹងថា មន្ត្រីជំនាញកសិកម្ម ធនធានទឹក និងក្រុមការងារបច្ចេកទេស បានប្រើប្រាស់ម៉ាស៊ីនបូមទឹក កាយប្រឡាយសម្រាប់បញ្ជាទឹក បានស្ដារអាង ទឹក ទុកសម្រាប់ប្រជាពលរដ្ឋប្រើប្រាស់ និងបញ្ចេញទឹកស្រោចស្រពដំណាំស្រូវទាំងនោះ ឬបម្រុងទុក ដែលនេះជាការជួយអន្តរាគមដោះស្រាយបញ្ហាជូនពលរដ្ឋ៕
