ឃាត់ខ្លួនជនសង្ស័យពីរនាក់ប្តីប្រពន្ធ ខ្ចីប្រាក់គេជាងពីរម៉ឺនដុល្លារ ពីជនរងគ្រោះចំនួន០៣នាក់ មិនសង
កម្លាំងការិយាល័យព្រហ្មទណ្ឌកំរិតធ្ងន់ស្នងការនគរបាលខេត្តឧត្ដរមានជ័យ។ ដឹកនាំដោយលោកវរសេនីយ៍ឯក យិន ណារ៉េត សហការជាមួយលោកជ័យ វាសនា មេប៉ុស្តិ៍នគរបាលរដ្ឋបាលអូរស្មាច់ចុះសហការជា មួយកម្លាំងនាយកដ្ឋាននគរបាលព្រហ្មទណ្ឌក្រសួងមហាផ្ទៃ និងកម្លាំងសមត្ថកិច្ចនៃស្នងការដ្ឋាននគរបាលខេត្តកំពត ដោយមានការសម្របសម្រួលពន្លាតដែនសមត្ថកិច្ចពីលោក កូយ កាន់យ៉ា ព្រះរាជអាជ្ញា កម្លាំងបានចុះអនុវត្តន៍ដីកាបញ្ជាឲ្យចូលខ្លួនរបស់លោកព្រះរាជអាជ្ញាអមសាលា ដំបូងខេត្តឧត្តរមានជ័យ។
នៅវេលាម៉ោង១៨និង០០នាទី ថ្ងៃទី២៦ ខែកក្កដា ឆ្នាំ២០១៩ បានធ្វើការឃាត់ខ្លួនជនសង្ស័យពីរនាក់ប្តីប្រពន្ធនៅចំណុចផ្ទះជួលក្នុងភូមិត្រពាំងធំ ,ឃុំត្រពាំងធំ ស្រុកទឹកឈូ ខេត្តកំពត។
ជាប់ចោទពីបទរំលោភលើទំនុកចិត្ត (ខ្ចីប្រាក់គេជាងពីរម៉ឺនដុល្លារ)ពីជនរងគ្រោះចំនួន០៣នាក់មិនសងហើយរត់គេចខ្លួន។
សមត្ថកិច្ចបានឲ្យដឹងថា ជនសង្ស័យឈ្មោះម៉ៅភារុន ភេទប្រុស អាយុ៣២ឆ្នាំ រស់នៅភូមិប៉េសេ សង្កាត់ទឹកថ្លា ខណ្ឌសែនសុខ រាជធានីភ្នំពេញ។
ប្រពន្ធឈ្មោះចែស្រី អាយុ៥០ឆ្នាំ ស្រុកកំណើតនៅខេត្តព្រៃវែង រស់នៅភូមិប៉េសេ សង្កាត់ទឹកថ្លា។ សមត្ថកិច្ចបន្តថា ក្នុងប្រតិបត្តិការនេះបានធ្វើការដកហូតរថយន្តម៉ាក Camry ឆ្នាំ២០០០ ពណ៌ឆ្លូញ០១គ្រឿងពាក់ស្លាកលេខ1G-1187។ បច្ចុប្បន្នកំពុងនាំខ្លួនពីខេត្តកំពតមកឧត្តរមានជ័យ ដើម្បីចាត់ការតាមនីតិវិធី ៕
