កម្ពុជាបានបង្កើនទុនបម្រុងអន្តរជាតិដុលកើនដល់ប្រមាណ ១១,១ ប៊ីលានដុល្លារ អាចទប់បញ្ហា បានប្រមាណ 5ខែ
លោកស្រី ជា សិរី បានថ្លែងថា កម្ពុជាមានទុនបម្រុងអន្តរជាតិកើនដល់ប្រមាណ 11,1 ប៊ីលានដុល្លារអាមេរិក ដែលអាចធានាការចូលទំនិញ និងសេវាសម្រាប់គ្រាបន្ទាប់ បានប្រមាណ 5ខែ ហើយកម្រិតខ្ពស់នៃទុនបម្រុងអន្តរជាតិបានពង្រឹងជំនឿទុកចិត្តដល់វិនិយោគិនមកលើភាពធន់នៃសេដ្ឋកិច្ចកម្ពុជា។
នេះបើយោងតាមសេចក្តីសង្ខេបបទឧទ្ទេសនាមរបស់លោកស្រី ជា សិរី អគ្គនាយកបច្ចេកទេស ធនាគារជាតិនៃកម្ពុជា នៅក្នុងសន្និបាតបូកសរុបលទ្ធផលការងារប្រចាំឆមាសទី១ និងទិសដៅការងារឆមាសទី២ ឆ្នាំ២០១៩ របស់ធនាគារជាតិនៃកម្ពុជា។
អគ្គនាយិកាបច្ចេកទេសនៃធនាគារជាតិ លោកស្រី ជា សិរី បានលើកឡើងថា ធនាគារជាតិនៃកម្ពុជា បានបង្កើនទុនបម្រុងអន្តរជាតិដុល កើនដល់ប្រមាណ ១១,១ ប៊ីលានដុល្លារ ដូច្នេះក្នុងករណីកម្ពុជាមានវិបត្តិ ឬក៏មានការហ៊ុមព័ទ្ធសេដ្ឋកិច្ចណាមួយ កម្ពុជានឹងមានលទ្ធភាពទប់ទល់បញ្ហាទាំងនោះ បានរយៈពេល ៥ ខែ ដែលអាចឲ្យរដ្ឋាភិបាលពិភាក្សា ដើម្បីរកដំណោះស្រាយ ឬចចារផ្នែកសេដ្ឋកិច្ចជាមួយ នឹងបណ្ដាប្រទេសផ្សេងៗបាន។
លោកស្រីបានបន្ថែមថា ការបង្កើតទុនបម្រុងអន្តជាតិនេះ ក៏ជួយជំរុញ និងផ្តល់ទំនុកចិត្តដល់វិនិយោគិនបរទេស ឲ្យមកវិនិយោគនៅកម្ពុជាផងដែរ ព្រោះវិនិយោគិនទាំងនោះ នឹងមានភាពជឿជាក់លើ ប្រាក់រៀលរបស់ធនាគារកណ្ដាល ខណៈមានទុនបម្រុងខ្ពស់ ដែលអាចធានាបាននូវស្ថិរភាពហិរញ្ញវត្តុ ននិងនិងអត្រាប្តូរប្រាក់ក្នុងទីផ្សារ។
លោក ជា ចាន់តូ អគ្គទេសាភិបាលនៃធនាគារជាតិ បានមានប្រសាសន៍ថា សេដ្ឋកិច្ចកម្ពុជាបន្តមានវឌ្ឍនភាពល្អប្រសើរ ដែលទទួលបានភាពអំណោយផលទាំងពីកត្តាខាងក្រៅនិងខាងក្នុង។ កត្តាគាំទ្រខាងក្រៅរួមមាន កំណើនតម្រូវការចំពោះផលិតផលនាំចេញរបស់កម្ពុជា លំហូរចូលនៃវិនិយោគទុនបរទេស និងកំណើនក្នុងវិស័យទេសចរណ៍។ កត្តាខាងក្នុងគឺស្ថិរភាពដ៏រឹងមាំនៃសុខសន្តិភាព ស្ថិរភាពនយោបាយ ស្ថិរភាពម៉ាក្រូសេដ្ឋកិច្ចនិងហិរញ្ញវត្ថុ ភាពអំណោយផលនៃបរិយាកាសវិនិយោគនិងធុរកិច្ច ការធ្វើពិពិធកម្មមូលដ្ឋានកំណើន និងការកែទម្រង់ស៊ីជម្រៅរបស់រាជរដ្ឋាភិបាល។
អតិផរណាមានកម្រិតទាប អត្រាប្តូរប្រាក់មានស្ថិរភាពល្អប្រសើរ ហើយទុនបម្រុងអន្តរជាតិត្រូវបានគរពូនឱ្យកើនឡើងខ្ពស់ ដែលបានចូលរួមពង្រឹងស្ថិរភាពម៉ាក្រូសេដ្ឋកិច្ចនិងហិរញ្ញវត្ថុ។ លើសពីនេះ វិស័យធនាគារនិងហិរញ្ញវត្ថុកម្ពុជាបានបន្តដើរតួនាទីយ៉ាងសកម្មក្នុងការជំរុញកំណើនសេដ្ឋកិច្ច កាត់បន្ថយភាពក្រីក្រនិងវិសមភាព។ បច្ចុប្បន្ន សេវាហិរញ្ញវត្ថុបានពង្រីកវិសាលភាពទូទាំងប្រទេស ហើយបានផ្តល់ឱកាសដល់ប្រជាជនកាន់តែច្រើនក្នុងការពង្រីកសកម្មភាពសេដ្ឋកិច្ចសម្រាប់លើកស្ទួយជីវភាពរស់នៅឱ្យកាន់តែប្រសើរ។
លោក ថា យ៉ាវ៖ អគ្គបេឡា និងសាខាធនាគារជាតិ នៃកម្ពុជារាជធានី-ខេត្តទាំងអស់ បានសហការនិងខិតខំប្រឹងប្រែង យ៉ាងយកចិត្តទុកដាក់ខ្ពស់ ក្នុងការងារបង់ប្រាក់ និងបើកប្រាក់ជូនអតិថិជន ការងារគ្រប់គ្រង និងថែរក្សាការពារឃ្លាំងប្រាក់កន្លងមក។ អគ្គបេឡាសូមឱ្យមន្រ្តី-បុគ្គលិកទាំងអស់ បន្តអនុវត្តការងារគ្រប់គ្រង សាច់ប្រាក់ឱ្យទទួលបានលទ្ធផលកាន់តែប្រសើរបន្ថែមទៀត។
វិន័យការងារមានសារសំខាន់ណាស់ ដែលតម្រូវឱ្យមន្ត្រីបុគ្គលិករបស់ខ្លួន ត្រូវតែគោរព ដោយសារគុណតម្លៃនៃការគោរពវិន័យនាំមកនូវកិត្តិយស សេចក្តីថ្លៃថ្នូរ បរិស្ថានការងារល្អ និងធ្វើឱ្យការងារស្នូលប្រចាំថ្ងៃ ប្រព្រឹត្តទៅដោយប្រសិទ្ធភាព។ សមិទ្ធផលជាច្រើនដែលមន្ត្រីបុគ្គលិកធនាគារជាតិនៃកម្ពុជាបានចូលរួមចំណែកកសាងនិងអភិវឌ្ឍគួរឱ្យកត់សម្គាល់រួមមាន ការខិតខំបំពេញការងារប្រកបដោយស្មារតីទទួលខុសត្រូវខ្ពស់ ការគោរពវិន័យការងារ ភាពស្មោះត្រង់ ស្មារតីសាមគ្គីជាប្រពៃណី និងឆន្ទ:អភិវឌ្ឍខ្លួនរបស់មន្ត្រីបុគ្គលិក៕
