ចេញទៅត្រាំពឹសនៅវៀតណាមមុនព្រឹត្តិការណ៍ AFF U-18 Championship 2019 ​

ភ្នំពេញ៖ វេលាថ្ងៃត្រង់ថ្ងៃទី២៩កក្កដានេះក្រុមបាល់ទាត់ជម្រើសជាតិកម្ពុជា អាយុក្រោម ១៨ឆ្នាំចេញទៅបោះជម្រំហ្វឹកហាត់ នៅប្រទេសវៀតណាមមួយសប្ដាហ៍ ដើម្បីត្រៀមប្រកួតពានរង្វាន់ ជម្រើសជើងឯកយុវជនអាស៊ីអាគ្នេយ៍អាយុក្រោម ១៨ឆ្នាំ២០១៩ (AFF U-18 Championship 2019 )ដែលប្រទេសវៀតណាមធ្វើជាម្ចាស់ផ្ទះ។
តាមការបញ្ជាក់ពីមន្ត្រីសហព័ន្ធកីឡាបាល់ទាត់កម្ពុជា បានឲ្យដឹងថា បន្ទាប់ពីទៅដល់ក្រុងហូជីមីញក្រុមជម្រើសជាតិកម្ពុជាអាយុក្រោម ១៨ឆ្នាំ នឹងចាប់ផ្ដើមហ្វឹកហាត់ពីថ្ងៃទី៣០ ខែកក្កដា តទៅនឹងបន្តរហូតដល់ថ្ងៃប្រកួតតែម្ដង ពោលគឺនៅថ្ងៃទី០៧ ខែសីហា ឆ្នាំ២០១៩ ដែលជាថ្ងៃប្រកួតបើកឆាករបស់កម្ពុជា ទល់ជាមួយ អូស្ត្រាលី។
ក្រៅពីការប្រមូលផ្ដុំហ្វឹកហាត់ ក្រុមកម្ពុជា នឹងមានការប្រកួតកម្ដៅសាច់ដុំដកស្រង់បច្ចេកទេសចំនួន ២ប្រកួតជាមួយក្រុមដែលនៅវៀតណាមផ្ទាល់ ប៉ុន្តែពុំបានបញ្ជាក់សមាសភាពក្រុមដែលកម្ពុជា ត្រូវប្រកួតជាមួយនោះឡើយ។
គួររំលឹកផងដែរថា កម្ពុជា ត្រូវចូលរួមប្រកួតពានរង្វាន់ AFF U-18 Championship 2019 ដែលវៀតណាម ទទួលបានសិទ្ធធ្វើជាម្ចាស់ផ្ទះ ចាប់ពីថ្ងៃទី០៦ ដល់ថ្ងៃទី១៩ ខែសីហា ខាង
មុខ។ កម្ពុជា ស្ថិតក្នុងពូល B ជាមួយក្រុមខ្លាំងៗ ដូចជាថៃ, ម៉ាឡេស៊ី, សិង្ហបុរី, អូស្ដ្រាលី និងម្ចាស់ផ្ទះវៀតណាម។ រីឯពូល A មានដូចជាមីយ៉ាន់ម៉ា ឥណ្ឌូនេស៊ី ឡាវ ប្រ៊ុយណេ ហ្វីលីពីន និងទីម័រខាងកើត ខណៈព្រឹត្តិការណ៍នេះរាល់ការប្រកួតរបស់ក្រុមជម្រើសជាតិ U-18 កម្ពុជា ក៏នឹងមានការផ្សាយបន្ដផ្ទាល់លើកញ្ចក់ទូរទស្សន៍ហង្សមាស ( HDTV ) ផងដែរ៕