សមាជិកព្រឹទ្ធសភាកោតសរសើររដ្ឋបាលរាជធានីភ្នំពេញ អនុវត្តន៍កញ្ចប់ថវិកាជាតិនៅថ្នាក់ក្រោមជាតិ បានល្អនិងមានតម្លភាព
ភ្នំពេញ៖ លោកអភិបាលរាជធានី បានបញ្ជាក់ថា ទោះបីកញ្ចប់ថវិកាជាតិ ដែលផ្តល់មករាជធានីភ្នំពេញមានទំហំធំក៏ពិតមែន បើប្រៀបធៀបទៅនឹងខេត្ត ប៉ុន្តែបើគិតទៅដល់ការអភិវឌ្ឍ និងតម្រូវការរបស់ប្រជាពលរដ្ឋ គឺមានតម្រូវការខ្ពស់ ដោយសារប្រជាពលរដ្ឋក្នុងរាជធានីភ្នំពេញ មានភាពស៊ីវិល័យ ទំាងការរស់នៅនិងការហូបចុក។
សមាជិកព្រឹទ្ធសភាកោតសរសើររដ្ឋបាលរាជធានីភ្នំពេញ អនុវត្តន៍កញ្ចប់ថវិកាជាតិនៅថ្នាក់ក្រោមជាតិ បានល្អនិងមានតម្លភាព ដែលធានាដល់ការអភិវឌ្ឍនៅមូលដ្ឋានប្រកបដោយប្រសិទ្ធភាព និងផលប្រយោជន៍របស់ប្រជាពលរដ្ឋនៅមូលដ្ឋាន។
ក្នុងកិច្ចប្រជុំរវាងអភិបាល ក្រុមប្រឹក្សារាជធានីភ្នំពេញ ជាមួយនឹងប្រតិភូសមាជិកព្រឹទ្ធសភាភូមិភាគ១ នៅរសៀលថ្ងៃទី៣១ ខែកក្កដានេះ លោក ជា ជេដ្ឋ ប្រធានប្រតិភូសមាជិកព្រឹទ្ធសភាភូមិភាគ១ បានឲ្យដឹងថា រដ្ឋបាលថ្នាក់ក្រោមជាតិក្នុងភូមិសាស្រ្តរាជធានីភ្នំពេញ បានអនុវត្តន៍កញ្ចប់ថវិកាជាតិបានត្រឹមត្រូវទំាងថវិកាបុរេប្រទាន និងថវិកាអភិវឌ្ឍន៍។
លោកបានបញ្ជាក់ថា ការវាយតម្លៃដូច្នេះក្រោយពេលដែលក្រុមសមាជិកព្រឹទ្ធសភាបានចុះទៅ ត្រួតពិនិត្យដោយផ្ទាល់នៅក្នុងភូមិសាស្រ្តសង្កាត់ទៀន ខណ្ឌដង្កោកាលពីពេលថ្មីៗ បានបង្ហាញពី ភាពជោគជ័យនៃការអនុវត្តកញ្ចប់ថវិកាជាតិមានតម្លៃភាព និងត្រូវតាមគោលការណ៍របស់រាជរដ្ឋាភិបាល។ ជាក់ស្តែងការប្រើប្រាស់ថវិកាបុរេប្រទាន គឺបើកបាន៤ជុំ ហើយចំណែកថវិកាអភិវឌ្ឍន៍វិញបំពេញបាន១០០ភាគរយ ទូទាត់ត្រឹមត្រូវ ដោយគ្មានការរំកិលទៅឆ្នាំបន្ទាប់ ខណៈខេត្តខ្លះនៅពុំទាន់អនុវត្តន៍បានដូចនេះឡើយ។
នៅក្នុងឱកាសនោះដែរ លោកក៏បានវាយតម្លៃខ្ពស់ ចំពោះការគ្រប់គ្រងសន្តិសុខសណ្តាប់ធ្នាប់ក្នុងភូមិសាស្រ្តរាជធានីភ្នំពេញ ថាមានភាពល្អប្រសើរ ដោះស្រាយបានទាន់ពេលវេលា ចំពោះបញ្ហាគ្រឿងញៀន ក្មេងទំនើង ចោរកម្ម។ បន្ថែមពីនេះ គឺបានយកចិត្តទុកដាក់ក្នុងការផ្តល់សេវាសាធារណៈ គ្រប់ប្រភេទ ជូនដល់ប្រជាពលរដ្ឋតាមរយៈការិយាល័យច្រកចេញចូលតែមួយ ទំាងនៅថ្នាក់ខណ្ឌ និងថ្នាក់រាជធានី។
លោក ឃួង ស្រេង អភិបាលរាជធានីភ្នំពេញបានអះអាងថា ការប្រើប្រាស់កញ្ចប់ថវិកាជាតិ ថ្នាក់រដ្ឋបាលរាជធានីភ្នំពេញ ត្រូវបានអនុវត្តន៍តាមគោលការណ៍របស់ក្រសួងសេដ្ឋកិច្ចនិងហិរញ្ញវត្ថុ សារាចរណ៍ណែនាំ ស្តីពីអនុវត្តន៍ច្បាប់ហិរញ្ញវត្ថុរបស់រដ្ឋបាលថ្នាក់ក្រោមជាតិ មូលនិធិបច្ចេកទេសនៃការរៀបចំគម្រោងថវិកាថ្នាក់ក្រោមជាតិ រួមទំាងសេចក្តីប្រកាសស្តីពីការប្រគល់ និងទទួលភារកិច្ចប្រមូលចំណូល និងការបែងចែកឥណទានចំណាយនៅថ្នាក់រដ្ឋបាលរាជធានីភ្នំពេញ។ លោកបានបញ្ជាក់ថា ទោះបីកញ្ចប់ថវិកាជាតិ ដែលផ្តល់មករាជធានីភ្នំពេញមានទំហំធំក៏ពិតមែន បើប្រៀបធៀបទៅនឹងខេត្ត ប៉ុន្តែបើគិតទៅដល់ការអភិវឌ្ឍ និងតម្រូវការរបស់ប្រជាពលរដ្ឋ គឺមានតម្រូវការខ្ពស់ ដោយសារប្រជាពលរដ្ឋក្នុងរាជធានីភ្នំពេញ មានភាពស៊ីវិល័យ ទំាងការរស់នៅនិងការហូបចុក។
លោកបានបញ្ជាក់ថា ផ្អែកតាមស្ថានភាពដូច្នេះរដ្ឋបាលរាជធានីភ្នំពេញ បានអនុវត្តន៍ផែនការ ថវិកាចំណូលព្រមនិងចំណាយព្រម ហើយរាល់ការទូទាត់ ទាល់តែមានសាច់ប្រាក់ឬបញ្ញើនៅក្នុងរតនាគារ ទើបអាចធ្វើការទូទាត់បាន៕
