ជនសង្ស័យចំនួន ២នាក់ រួមជាមួយនឹងសារធាតុញៀនចំនួន ១៤៩គ្រាប់ ត្រូវបានកម្លាំងនគរបាលក្រុងសំរោង ក្របួចបានភ្លាមៗ

ភ្នំពេញ៖ នៅថ្ងៃទី០២ ខែសីហា ឆ្នាំ២០១៩ វេលាម៉ោង ១៩៖៣០នាទី លោកវរសេនីយ៍ឯក ហម ភិរម្យ អធិការនគរបាលក្រុង បានដឹកនាំកម្លាំងជំនាញ នៃអធិការដ្ឋាននគរបាលក្រុង រួមជាមួយ កម្លាំងប៉ុស្តិ៍នគរបាលរដ្ឋបាលកូនគ្រៀល និងប៉ុស្តិ៍នគរបាលរដ្ឋបាលអូរស្មាច់ ចុះធ្វើការបង្ក្រាប ករណីជួញដូរ និងប្រើប្រាស់ នូវសារធាតុញៀនដោយខុសច្បាប់ ១លើក នៅចំនុចភូមិអូរពក សង្កាត់កូនគ្រៀល ក្រុងសំរោង ខេត្តឧត្តរមានជ័យ ។

ក្នុងកិច្ចប្រតិបត្តិការនេះ កម្លាំងយើងបានធ្វើការឃាត់ខ្លួន ជនសង្ស័យបានចំនួន ២នាក់ មានឈ្មោះដូចខាងក្រោម ៖ ទី១ ឈ្មោះ ប្រាជ្ញ សុវត្ថិ ហៅ ថា ប្រុស អាយុ ៤៥ឆ្នាំ ជនជាតិ ខ្មែរ រស់នៅភូមិចំការចេក សង្កាត់អូរស្មាច់ ក្រុងសំរោង ខេត្តឧត្តរមានជ័យ និងទី២ ឈ្មោះ លឹម លី ភេទប្រុស អាយុ ៣២ឆ្នាំ ជនជាតិ ខ្មែរ រស់នៅភូមិអូរពក សង្កាត់កូនគ្រៀល ក្រុងសំរោង ខេត្តឧត្តរមានជ័យ ។ ដោយដកហូតបានវត្ថុតាង ថ្នាំញៀនប្រភេទមេតំហ្វេតាមីនគ្រាប់ WY ពណ៌ក្រហម ចំនួន ១៤៩ គ្រាប់ ។

បច្ចុប្បន្ន ជនសង្ស័យទាំង ២នាក់ រួមជាមួយនិងវត្ថុតាងខាងលើ ត្រូវបាននាំមកកាន់អធិការដ្ឋាននគរបាលក្រុង ដើម្បីសាកសួរ និងកសាងសំណុំរឿងតាមនិតិវិធី ៕