សារឿន ចាន់សន្លប់ទឹកទី១ចំជាខ្សោយមែន
ភ្នំពេញ៖ក្នុងព្រឹត្តិការណ៍TV5 Boxing Knock-Out Serie by K-Cement នាយប់ថ្ងៃទី៣សីហាអ្នកប្រដាល់ជើងខ្លាំងសារឿន ចាន់ក្លិបតាព្រហ្មមានជ័យត្រូវអ្នកប្រដាល់ណាម ម៉ូរ៉ាក់ក្លិបពន្លឺសាមគ្គីខេត្តបាត់ដំបងប្រើកណ្ដាប់ដៃវាយឲ្យសន្លប់នៅទឹកទី១ ។
នរណាក៏មានជំនឿចិត្តថាសារឿន ចាន់ឈ្នះណាម ម៉ូរ៉ាក់ដែរតែស្ថានភាពនៃការប្រកួតសារឿន ចាន់បានតែត្រឹមជន្លៗតែប៉ុណ្ណោះ ។អ្នកប្រដាល់រូបនេះពិតជាមិនហាត់មែន ។ធ្លាប់ជាកំពូលអ្នកលេងកែង និង ជង្គង់មួយរូបបែរជាត្រូវអ្នកប្រដាល់ដែលមិនសូវមានឈ្មោះបោះសម្លេងផ្ដួលបាននៅមុនស្នូរជួងបញ្ចប់ទឹកទី១ទៅវិញ ។
សារឿន ចាន់ឆ្លងមិនផុតជុំទី១ផងតើរកគូឯណាប្រកួតបានទៀត ?ណាម ម៉ូរ៉ាក់ពេលនេះត្រៀមខ្លួនឡើង ទោប្រកួតជុំទី២ទៀត ។
ប្រកួតក្នុងព្រឹត្តិការណ៍នេះដែរអ្នកប្រដាល់កន្តឿលាប រដ្ឋាក្លិដីឡូតិ៍មានរិទ្ធខេត្តបន្ទាយមានជ័យបានយកឈ្នះអ្នកប្រដាល់អេលីត សាន់ក្លិបឆ្មា ស សែនសុខដោយពិន្ទុ ។
ការប្រកួតដែលមានតែ៣ទឹកនោះរដ្ឋាដែលចាប់ផ្ដើមវាយប្រហារលើគូប្រកួតតាំងពីដើមទឹកទី១ទៅនោះគេហាក់ដូចជាមានប្រៀបជាងគូប្រកួតរបស់ខ្លួន ។រដ្ឋាប្រើកណ្ដាប់ដៃវ៉ៃចេញបានល្អនិងចំគោលដៅបានច្រើន ។
ពួកគេប្រកួតគ្នាពេញទាំង៣ទឹកហើយលទ្ធផលចុងក្រោយរដ្ឋា ឈ្នះ អេលីត សាន់ដោយពិន្ទុ ។រដ្ឋាត្រៀមខ្លួនឡើងប្រកួតជុំទី២ឯអេលីត សាន់ខ្ទាតចេញពីការប្រកួតត្រឹមនេះ ។
សូមបញ្ជាក់ថាការប្រកួតជម្រុះជុំទី១នេះមានអ្នកប្រដាល់ចំនួន៣២រូបចូលរួម ។ ពេលនេះមាន៨រូបហើយដែលហាលអាវហើយក៏មាន៨រូបដែរដែលបានកក់កៅអីសម្រាប់ជុំទី២ ។
ការប្រកួតជាមិត្តភាពជាមួយថៃវិញនោះអ្នកប្រដាល់កម្ពុជាពេជ្រ ម្ទេសខ្មាំងប្រកួតចាញ់អ្នកប្រដាល់ថៃកាំឡៃ យុគ(Kamlai Yuk) ដោយពិន្ទុ ។
អ្នកប្រដាល់ទាំង២រូបនេះប្រកួតគ្នាពេញទាំង៥ទឹកកាំឡៃ យុគមានប្រៀបលើគូប្រកួតរបស់ខ្លួនស្ទើរតែគ្រប់ទឹកទាំង៥តែម្ដង ។
ការប្រកួតរវាងអ្នកប្រដាល់រួមជាតិក្រៅព្រឹត្តិការណ៍ពានរង្វានើវិញនោះឡុងរ៉ាមីក្លិបខ្លារខិនមានរិទ្ធបានយកឈ្នះអ្នកប្រដាល់ពុទ្ធ ម៉ាណូយក្លិបពុទ្ធសេរីវង្សដោយពិន្ទុដែរ ។
