ក្រុមចោរ៤នាក់ បន្លំធ្វើជាទិញខារ៉ាបាវ១កេស រួចចូលលួចលុយអស់ជាង១ម៉ឺនដុល្លារ នៅផ្ទះប្រជាពលរដ្ឋរកស៊ីវីងដូរលុយ
ខេត្តស្វាយរៀង៖ក្រុមចោរមួយក្រុមមានគ្នា៤នាក់ បន្លំធ្វើជារកទិញខារ៉ាបាវ ហើយមានអ្នកចូលមកលួចលុយកន្លែងដូរលុយផ្ទេរលុយវីងមួយកន្លែង យីហោ រក្សា ជាប់ថ្នល់ជាតិលេខ១ ស្ថិតក្នុងភូមិ ដើនពោធិ៍ ឃុំ ស្វាយតាយាន ស្រុក ស្វាយទាប ខេត្តស្វាយរៀង កាលពីវេលាម៉ោង១និ៥០នាទី ថ្ងៃទី៦ ខែសីហា ឆ្នាំ២០១៩នេះ។
បើតាមសម្តីស្ត្រីម្ចាស់ឈ្មោះ ដួង រ៉ា អាយុ ៣៤ឆ្នាំ មុខរបរលក់គ្រឿងចាប់ហួយ និងបើកកន្លែងផ្ទេរប្រាក់វីង បានប្រាប់ក្រុមអ្នកសារព័ត៌មានឲ្យដឹងថា៖ នៅមុនពេលកើតរូបគាត់មិនបាននៅផ្ទះនោះទេ គឺទៅទារលុយគេ ហើយប្តីរបស់គាត់ទៅទិញការ៉ូបាត់ ទុកឲ្យកូនរបស់នៅផ្ទះម្នាក់ឯង។
ប្រភពបានបន្តទៀតថា៖ ពេលដែលជនសង្ស័យ ធ្វើសកម្មភាពនោះ គឺមានបុរសម្នាក់ឌុបគ្នា ជាមួយស្ត្រជិះម៉ូតូមួយគ្រឿង សេ១២៥ អត់ចាំផ្លាកលេខ បានមកឈប់រកទិញខារ៉ាបាវ ដោយធ្វើល្បិចឲ្យលុយម្តង៦០០០រៀល ម្តង៤០០០រៀល ដើម្បីពន្យារពេលហើយមានម៉ូតូមួយគ្រឿងទៀត ជិះគ្នា២នាក់ មកឈប់ខាងកើតផ្ទះ ខណៈដែលក្មេងកំពុងលើកយកខារ៉ាបាវ ឲ្យជនសង្ស័យនោះ មានបុរសម្នាក់បានដើរសៀខាងកើតផ្ទះ ធ្វើសកម្មភាពលួចលុយ ដែលទុកក្នុងរោងសុវត្ថិភាព (រោងផ្ទេរប្រាក់វីង) រួចនាំគ្នាឡើងជិះម៉ូតូគេចខ្លួចបាត់អស់។
ទើបដឹងថា ត្រូវក្រុមចោរបន្លំចូលលួច ក្នុងកន្លែងរោងផ្ទេរប្រាក់វីង បានបង្កការភ្ញាក់ផ្អើលដល់អ្នកស្រុក និងរាយការណ៍ មកសមត្ថកិច្ចចុះមកធ្វើកំណត់ហេតុដើម្បីកំណត់ស្រាវជ្រាវមុខសញ្ញា តាមកាមេរ៉ាសុវត្ថិភាព ហើយទឹកប្រាក់ដែលក្រុមចោរ ធ្វើសកម្មភាពចូលលួចនោះ អស់ចំនួន៧០០០ដុល្លារ លុយខ្មែរ៦លាន៥សែនរៀល និងលុយរាយៗជាច្រើនទៀត សរុបអស់ជាង១ម៉ឺនដុល្លារ ៕
