គម្រោងផ្លូវល្បឿនលឿន ពីភ្នំពេញ-បាវិតគ្រោងចំណាយថវិកា ជិត៤ពាន់លានដុល្លារ
ភ្នំពេញ៖ ទេសរដ្ឋមន្ត្រី និងរដ្ឋមន្ដ្រីក្រសួងសាធា រណការ និងដឹកជញ្ជូន លោក ស៊ុន ចាន់ថុល បានអះអាងថា ផ្លូវល្បឿនលឿនពីរាជធានីភ្នំពេញទៅបាវិត ព្រំដែនកម្ពុជា-វៀតណាម គ្រោងចំណាយថវិកាធ្វើអស់ប្រមាណ៣៨០០លានដុល្លារបន្ទាប់ពីបានសិក្សារួចរាល់ទាំងអស់ ដោយកំណត់ថ្ងៃសម្រាប់សាងសង់។
លោកទេសរដ្ឋមន្ត្រី ស៊ុន ចាន់ថុល បានថ្លែងក្នុងឱកាសអញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការ ចំណតកំពង់ផែកុងតឺន័រ LM១៧ ជំហានទី២ នៃគម្រោងពង្រីកហេដ្ឋារចនាសម្ព័ន្ធរបស់កំពង់ផែស្វយ័តភ្នំពេញ ស្ថិតនៅភូមិ កណ្តាលលើ ឃុំបណ្តាយដែក ស្រុកកៀនស្វាយ ខេត្តកណ្តាល។
លោកបានថ្លែងថា រាជរដ្ឋាភិបាលបានអនុញ្ញាតឱ្យទីភ្នាក់ងារសហប្រតិបត្តិការ អន្ដរជាតិនៃប្រទេសជប៉ុន (JICA) ធ្វើការសិក្សាផ្លូវល្បឿនលឿន ពីរាជធានីភ្នំពេញទៅបាវិត ដែលមានចម្ងាយផ្លូវប្រវែង១៦០គីឡូម៉ែត្រ ដើម្បីធ្វើការសាងសង់ផ្លូវនេះ។ បន្ទាប់ពីធ្វើការសិក្សារួច ផ្លូវនេះនឹងត្រូវចំណាយថវិកាប្រមាណ ៣ ៨០០លានដុល្លារ ដែលការចំណាយយ៉ាងច្រើនបែបនេះ ដោយសារតែផ្លូវដែលត្រូវសាងសង់គឺមានលិចទឹក ហើយកាត់តាមបឹង ឬតំបន់លិចទឹកច្រើន ដែលមានប្រវែងរហូតដល់៨០គីឡូម៉ែត្រ បានធ្វើឱ្យតម្លៃក្នុងការចំណាយសាងសង់ច្រើន។
លោកបានលើកឡើងថា បើប្រៀបធៀបទៅនឹងការសាងសង់ផ្លូវល្បឿនលឿន ពីរាជធានីភ្នំពេញ ទៅខេត្ដព្រះសីហនុ ដែលមានប្រវែង១៩០គីឡូម៉ែត្រនោះ គឺចំណាយថវិកាប្រមាណតែ ២ ០០០លានដុល្លារប៉ុណ្ណោះ ដោយសារផ្លូវនេះ មិនមានការសាងសង់ឆ្លងកាត់បឹង ឬតំបន់លិចទឹក ដូចផ្លូវល្បឿនលឿនភ្នំពេញទៅបាវិត។
លោកបានបន្ដថា ដោយសារតែទំហំទឹកប្រាក់ ក្នុងការចំណាយសាងសង់ផ្លូវល្បឿនលឿនពីភ្នំពេញ ទៅបាវិតនេះ គឺមានចំនួនច្រើនពេកនោះ រាជរដ្ឋាភិបាលមិនទាន់សម្រេចធ្វើការសាងសង់ ឬយ៉ាងណាទេ ដោយកំពុងតែ ស្វែងរកដៃគូវិនិយោគពីវិស័យឯកជន ដើម្បីកសាងផ្លូវនេះ។
ជាមួយគ្នានេះដែរ សម្រាប់ផ្លូវជាតិលេខ១ រាជរដ្ឋាភិបាលក៏ដូចជា ក្រសួងសាធារណការ និងដឹកជញ្ជូនបានឱ្យអង្គការ JICA ធ្វើការសិក្សា ដើម្បីពង្រីកបន្ថែមឱ្យបានធំទូលាយ ក្នុងការចូលរួមកាត់បន្ថយការកកស្ទះចរាចរណ៍ ជាពិសេសរថយន្ដដឹកជញ្ជូនទំនិញឆ្លងកាត់តាមផ្លូវនេះឱ្យមានសុវត្ថិភាព។
ក្រៅពីការសិក្សាផ្លូវជាតិលេខ១ អង្គការJICA ក៏កំពុងសិក្សានៅក្នុងរាជធានីភ្នំពេញ ដែលសិក្សាបញ្ចប់នៅចុងឆ្នាំ២០១៩ ខាងមុខ ដើម្បីសាងសង់ ផ្លូវរថភ្លើងលើអាកាស ដើម្បីកាត់បន្ថយការកកស្ទះចរាចរណ៍នៅក្នុងរាជធានីភ្នំពេញផងដែរ។ ការសាងសង់ផ្លូវរថភ្លើងលើអាកាសនេះ គឺមានតម្លៃថ្លៃណាស់ ដោយតាមការសិក្សាប៉ាន់ ប្រមាណរបស់អង្គការ JICA គឺក្នុងចម្ងាយផ្លូវប្រវែង១៨គីឡូម៉ែត្រ ត្រូវចំណាយថវិកាប្រមាណ ១,២០០លានដុល្លារ៕
