សពបុរសម្នាក់ ត្រូវបានប្រជាពលរដ្ឋប្រទះឃើញ នៅចំណុចក្នុងចំការខ្លឹម
ស្នងការដ្ឋាននគរបាលខេត្តកោះកុង បានឲ្យដឹងថា នៅថ្ងៃ ០៩ ខែសីហា ឆ្នាំ២០១៩ វេលាម៉ោង ០៨:៣០ នាទីព្រឹក ក្រោយពីទទួលព័ត៌មានពីប្រជាពលរដ្ឋប្រទះឃើញសព នៅចំណុចក្នុងចំការខ្លឹម មួយកន្លែងម្ចាស់នៅភ្នំពេញ ស្ថិតក្នុងភូមិ អូរជ្រៅ ឃុំបឹងព្រាវ។
កម្លាំងផ្នែកជំនាញពិនិត្យវិភាគ សហការជាមួយជំនាញព្រហ្មទណ្ឌ នៃអធិការដ្ឋានស្រុកស្រែអំបិល កម្លាំងប៉ុស្តិ៍ ហ៊ុំព័ទ្ធកន្លែងកើតហេតុ និងត្រួតពិនិត្យសពដោយមានការចូលរួមពី លោកគ្រូពេទ្យបង្អែកស្រុកស្រែអំបិល, និងអាជ្ញាធរមូលដ្ឋាន ពិនិត្យឃើញសពបានស្លាប់នៅក្រោមដើមខ្លឹម មានលក្ខណៈស្អុយរលួយស្លាប់រយៈពេលប្រហែល ១០ថ្ងៃ មកហើយដូច្នេះកម្លាំង មិនអាចសន្និដ្ឋានបានឡើយ។
សពមិនស្គាល់អត្តសញ្ញាណភេទប្រុស អាយុប្រហែលជាង ២០ឆ្នាំ ពាក់អាវយឺតពណ៌ខៀវដៃខ្លី ស្លៀកខោ ខូវប៊យពណ៌ក្រម៉ៅជើងវែង ។
ដោយមានការសម្របសម្រួលពី លោក អ៊ុន សុវណ្ណធានី ព្រះរាជអាជ្ញារងខេត្តកោះកុង អោយបូជាសពនៅនឹងកន្លែងតែម្ដង ដោយសពមិនស្គាល់អត្តសញ្ញាណ និងមិនមានសាច់ញាតិ។
បច្ចុប្បន្ន អធិការដ្ឋាននគរបាលស្រុកស្រែអំបិល បានប្រគល់សពអោយទៅលោកក្រុមប្រឹក្សាឃុំ និងលោកមេភូមិចាត់ចែងទៅតាមប្រពៃណី ចំពោះ សាច់ញាតិ កម្លាំងយេីងនៅតែបន្តស្រាវជ្រាវស្វែងរក។
