សត្វទន្សោង១ក្បាល ងាប់ដោយជាប់អន្ទាក់ ក្នុងដែនជម្រកសត្វព្រៃសហគមន៍សង្ឃរុក្ខាវ័ន
ខេត្តឧត្តរមានជ័យ៖សត្វទន្សោង (គោព្រៃ) ១ក្បាលដែលជាប្រភេទសត្វកម្រមានទម្ងន់ប្រមាណ៥០០គីឡូក្រាម បានងាប់ប្រមាណ១ទៅ២ថ្ងៃកន្លងមកនេះ ត្រូវបានក្រុមអភិរក្សប្រទះឃើញ ខណៈជនខិលខូចលបលួចចូលទៅដាក់អន្ទាក់ក្នុងដែនជម្រកសត្វព្រៃសង្សរុក្ខវន្ត នៅខេត្តឧត្តរមានជ័យ។
មន្រ្តីអភិរក្សប្រចាំការនៅតំបន់ដែនជម្រកសត្វព្រៃសហគមន៍សង្ឃរុក្ខាវ័ន សត្វកម្រនេះនៅថ្ងៃទី១០ ខែសីហា ឆ្នាំ២០១៩ ខណៈពេលចុះល្បាតក្នុងព្រៃ ក៏ប្រទះឃើញសត្វទន្សោងបានដេកងាប់ ដោយនៅកន្លែងក៏ឃើញមានអន្ទាក់ ដែលគេលួចដាក់ចាប់សត្វជាប់់់់នឹងជើង ហើយតាមការសន្និដ្ឋានពីមន្ត្រីក្រុមអភិរក្ស សត្វទន្សោងអាចជាប់អន្ទាក់ពី១ទៅ២ថ្ងៃមុន។
ព្រះសង្ឃ ប៊ុន សាលួត ព្រះប្រធានសហគមន៍សង្ឃរុក្ខាវ័ន និងមន្រ្តីបរិស្ថាន បានចាត់ឲ្យកម្លាំងល្បាតព្រៃ រៀបចំនាំយកសត្វងាប់ដ៏កម្រនេះ ចេញពីតំបន់ដែលជាប់អន្ទាក់ យកទៅស្នាក់កណ្តាលដែនជម្រកសត្វព្រៃសង្ឃរុក្ខាវ័ន ដើម្បីរៀបចំធ្វើពិធីប័ង្សុលតាមប្រពៃណីព្រះពុទ្ធសាសនា ដែលសម្តែងពីការសោកស្ដាយជាខ្លាំង នូវការបាត់បង់ចំពោះសត្វកម្រនេះ៕
